يوميات متبهدل في كندا

sara777 · #1 12-10-2006, 01:50 PM

<div align="center">اول يوم شغل مهم فى حياة اى انسان وديما لازمه استعداد خاص

اول يوم شغل بالنسبة لى كان مختلف

صحيت بدرى جدا

ولبست البدلة ..ولمعت الجزمة.. وخنقت نفسى بالكرافتة.. ومسكت شنطة اللاب توب.

وبما اننى لااملك لا املك لاب توب فحطيت كتاب انيس منصور 200يوم حول العالم لان حجمه ووزنه جوه الشنطة يبان كما لوكان لاب توب

نزلت الجراج اخد عربيتى فافتكرت ان الشغل فى وسط البلد وده حايكلفنى اجرة ركن العربية فى جراج عام وده غالى

قلت ياواد بلاش تبذير وروح اركب الاتوبيس..

وانا مستنى الاتوبيس.. دعبست فى جيبى على فكة ..علشان الاتوبيس ...ملقتش
وبعدين

... وهنا مافيش كمسرى علشان يفك.. فلازم يبقى معاك دولار فكة تحطه فى الصندوق اللى ادام السواق

طيب اجيب منين دلوقتى دولار..?

لمحت جانبى واحدة ..قلت اترازل عليها

رحت قايل لها صباح الخير مع ابتسامة
ردت صباح الخير مع ابتسامة برضه

قلت لها الجو جميل النهاردة
ردت وهى بتترعش ياعينى من البرد ايوه ملاحظة ده

( نسيت اقولكم درجة الحرارة ساعتها كانت تحت الصفر)

بلعت ريقى
وسألتها الساعة كام?
بصيت على ايدى لقتنى لابس الساعة الرولكس بتاعتى.. راحت رميانى بنظرة معناها جرى ايه ياأفندى هو مافيش غيرى تشتغلوا عالصبح

رديت بسرعة وقلت لها انا اسف ...وشرحتلها الموضوع ...فضحكت
وقالت طب ماتقول كده من الصبح واتفضل ياسيدى ادى الدولار.. واتمنى لك يوم سعيد

قولتلها شكرا من كل قلبى (وفى عقلى بأقول ياسلام لو كنتى حلوة شوية كنت هبدتك موعد غرامى... بس سامحينى.... ماأقدرش )

ركبت الاتوبيس ...
والاتوبيس هنا مسرح بذاته
قعدت ورا اتنين ستات بيتكلموا ومن غير ماأقصد سمعت الحوار الاتى بينهم .....

-وبعدين بعد ما جاه متأخر قولتيلوا ايه
-ابدا بدء يغير هدومه واول ماقلع الشراب عاديكى على الريحة اللى طلعت منه ...اف اف... لاتطاق
-وبعدين قلتله روح اغسل رجلك ...رد عليا وقال ايه تعبان
ردت صحبتها معقول رد عليكى كده عينى عينك
-اه تخيلى

رجالة اخر زمن
-عنها ورحت مكلمة البوليس وقولتلهم جوزى بيتحرش بيا
(وطبعا القانون هنا بيمنع التحرش بالستات حتى ولوكانت حرمك المصون )
واكيد ريحة الشراب تعد تحرش هنا :D .... ربنا يرحم ستاتنا .

ماعلينا ...

وصلت الشغل
وشوفتها

كانت اول واحدة ااقابلها ولو كل ستات الشغل حايكونوا من العينة دى تبقى مصيبة

بلاش نسبق الاحداث

ومدت ايدها وسلمت زى اى لقاء تعارف ..
قدمت نفسها انا ميشيل وحضرتك ?

مدت ايدى انا كمان وقلتلها بوند..... جيمس بوند
وعنها وراحت مسخسخة وضاحكة ضحكة ممطوطة لو عملتها نجمة الجماهير نادية الجندى فى فيلم من افلامها كانت الرقابة قصت الفلم كله موش بس الضحكة

ابتسمت وقلتلها انا اسمى وليد

ردت وقالت اسم غريب ماسمعتهوش قبل كده
قلت لها اه معناه فى اللغة بتاعتنا مولود صغير
ردت تقصد.. بيبى..?
قولت لها.. تمام كده

قالت لى خلاص من هنا ورايح حاأندهلك بيبى.. شرفت الشركة يابيبى ..عن اذنك بقى ماأعطلكش يابيبى

يا ميشييل.. ده انتى تعطلى بلد

يتبع...........

</div>

#2 12-10-2006, 01:54 PM

ههههههههههههههههههههههههه ايه دا يا ساره حرام عليكي ههههههههههههههههههههههه

رهيبة والله ياريت تكمليها يا سارة

sara777 · #3 12-10-2006, 01:56 PM

هههههههههههههههههههه سعيدة اوي يا محمد انك اول واحد ترد عليها
هكمل ان شاء الله
بس رايحة اجيب عيال اختي من الحضانة
ييياااااااااااا دي الهم

جميله · #4 12-10-2006, 02:15 PM

يلا يا ساره كملي بسرعه

ههههههههههههههههههه

الموضوع لذيذ اوي

LA STELLA · #5 12-10-2006, 02:51 PM

ههههههه

موضوع لذيذ

كملى كملى يا سارة

انا متابعة اهو معاكى

جميل الموضوع

الاماراتية · #6 12-10-2006, 02:52 PM

ساااااااااااره وااااااااايد حلوه وننتظر الاجزاء الاخرى

sara777 · #7 12-10-2006, 02:55 PM

شكرا يا جميلة علي مرورك اللي نور الموضوع يا عسل

مممممممممممممم وحبي حابي شكرا يا عسل وان شاء الله الباقي جي في السكة
فطومي شكرا يا روحي علي مرورك الوايد حلووووووووووووووو :P
ههههههههههههههههههه

sara777 · #8 12-10-2006, 03:07 PM

<div align="center">حبة... وبدء يهل الموظفين...

دورتا: بولندية... حاجة كده قمر وطبعا سلمت عليها.
بس ياخسارة متجوزة
طبعا حتسألونى طب وعرفت ازاى ?
يعنى ودى عاوزة فكاكة كانت محترمة..

قصدى لابسة دبلة فى ايدها الشمال
..وانا لما باشوف الدبلة فى الشمال باعرف على طول ان ده طريق مسدود

... يعنى عيال وزوج ومشاكل وكده يعنى

بس للامانة دورتا بعد شوية حاتثبت لى العكس ..انه الزوج والعيال عمرهم مايبقوا عقبة ادام ست متجوزة.

وبلاش نسبق الاحداث ...التقيل جاى ورا ..بس انتوا خلوا الرقابة تغمض عينها :D

سرحت فى الشغل ..وانهمكت علشان اكون عند حسن ظن المدير بتاعى ..وبخاصة انه كان متوسم فيا نجاح مستقبلى باهر

وفى وسط الملفات وتكتكة الكيبورد بتاعة الكمبيوتر

.. سمعت نقر على المكتب وصوابع ذات مخالب قصدى اظافر بتنقر على سطح المكتب

عملت نفسى موش واخد بالى .

. وقلت ادخل يالى بتخبط

وطبعا كالعادة ضحكة مجلجلة تعقبها رنة مسحوبة فى الصوت ديما مخرجين الافلام حدانا بيخلوا الراقاصات فى اى فيلم يضحكوها دلالة على الخلاعة

بس ياجماعة لما تيجى من ميشيل تبقى حاجة تانية

حلوة ياميشيل يابنت الايه

وانا غارق فى افكارى تنبهت ان ميشيل لسه بتضحك
-وقالت لى ممكن ادخل مولاى
-قولتلها حلوة قوى احنالحقنا بقيت كده مولاى خبط لزق من بيبى لمولاى
ترقية كبيرة مااقدرش عليها
-نسيت اسألك يابيبى انت منين?
-انا ياميشيل من بلاد تركب الجمال
-بلاد بتاريخ عمره 7تلاف سنه
-بيبى انت هندى

-هندى مين ياميشيل دوكها بيركبوا الافيال
-صعبة يابيبى سهلها شويه

-طيب ياستى انا ساكن على ساحل البحر الابيض المتوسط
-اسبانى

.. يياى.. اموت فيك يابيبى :D كان من زمان نفسى اعرف واحد اسبانى

ورفعت وشها للسقف وقالت اشكرك يالورد

يابنت المخبولة.. ارد عليها ااقولها ايه دى

-لأ ياميشيل موش اسبانى
-يووووه غلبتنى معاك يابيبى
-بس اروح اخلص حبة شغل وارجعلك

وعطتنى ضهرها ومشيت.....

دخل عليا كرش براجل... قصدى راجل بكرش... ضاحك بشوش..
بصيت على ايده مالقتش فيها ساندوتش
بصيت على الايد التانية برضه فاضية.
.غريبة

عندى صورة مرسومة فى خيالى ان كل واحد طخين وبكرش لازم يبقى فى ايده ساندوتش او هكذا علمونا مخرجيين السينما عندنا سامحهم الله

قدم نفسه الكرش.. قصدى الراجل صاحب الكرش
-انا هنرى وانت ?
-انا..موش هنرى.. :D

سخسخ الراجل على روحه :D
-...حلوة قوى هههههه...
ضحكت انا كمان وقولت له اسمى وليد
وهو لسه بيضحك قلى واضح ان احنا حنكون اصحاب بس باقولك ايه مالكش دعوة...بلورنا

-رديت انا مين لورنا دى?
وهوبرضه لسه بيضحك ..مراتى ياقفل :D

قولت اجارى الجو فقلت له يومك مسوجر ياهنرى :D

هههههه وهو بيكمل ضحك حارجعلك تانى ياوليد... تشاو.... :D

واضح ان الراجل ده مابيبطلش ضحك الا فى حالتين لما بياكل ولما بينام

وسألت نفسى سؤال خبيث ...
ايه اللى يحصل لو الراجل ده مات ?
...هههههههه...اكيد برضه حيموت من الضحك :D

كان واضح من الاول كده ان ميشيل بنت شقية ..وانا باموت فى دباديب النوع ده

كنت حاسس انها هيفاء وانا الواوا

كان مكتبى ادام مكتبها كنت ملاحظ من وقت للتانى انها بترمقنى بنظرات اعجاب

بعد كام يوم لقيتها جاية الصبح وبتسألنى
- قولى يا بيبى
-رديت على نفس النغمة يا عيون بيبى
-ردت وقالت لى بسرعة كده بقيت عيونك
-قلتلها وليه لا
-سألتنى تانى الا صحيح يا بيبى انت مرتبط يعنى عندك جيرل فرند?
-ايوه كده ياميشيل اطلعى من البيضة
تصنعت الخجل
-وقلتلها لأ.. بس فى الحقيقة.. فى ناس متكلمين عليا

بصيت لى باستغراب

-وقالت لى ..وليه الناس يتكلموا عليك انت بتعمل حاجات غلط ..
..اوعى يابيبى.. ازعل منك بعدين

-لأ ياميشيل انتى فاهمة غلط.. ده تعبير بنستخدمه فى بلدنا .
-اه ...طيب جاوب بقى... مرتبط?

-طيب قوليلى الاول بتسألى ليه?...انتى معجبة والا حاجة.?
وغمزتلها بعينى كما لو كنت عمر الشريف والا حاجة

تصنعت الغباء وقالت
-لأ يابيبى انت فاهم غلط

-انا :آى.. خدعونى قلبى وعنايا... واللى افتكرته جوه فى قلبى ..اتاريه موش ليا .. ..اتاريه موش ليا ... زى سيد درويش ما كان بيقول..

جاه تليفون لميشيل فى المكتب بتاعها فستأذنت وسابتنى ..

وده برضه وقته يا ميشيل

بس انتم تفتكروا ايه معجبة وبتدارى والا ايه ?
طيب ليه سألتنى كل الاسئلة دى

فى انتظار اجابتكم
وخلوا الاجابات تشطح بعيد علشان هى كانت بتسألنى كل الاسئلة دى لحاجة ابعد من خيالكم

عرفتوا ايه هى

الاجابة بعد فاصل الاعلانات

بيبسى... حاجة ساقعة.. كازوزة... لب...... تسالى .....ترمس...

يتبع......

</div>

LA STELLA · #9 12-10-2006, 03:20 PM

حلو يا سارة

كملى ..>>>>>>>>

zizo2_2 · #10 12-10-2006, 04:33 PM

انا قريت الجزء الاول يا سارة وان شاء الله هبقى أقرا الجزء التاني بعدين علشان تعبان شوية وان شاء الله أكمله وأقولك رايي

ayooosh · #11 12-10-2006, 04:46 PM

ايه الجمال ده يا بت

هههههههه

جميل اوى

و انا مستنيه الجزء الجاى

بس بعد الفطار بقى

علشان عينى وجعتنى من القرايه

هههههههههه

شكراااا ليكى

ومنتظرين البقيه

عاشقـــ الانمى ـــة · #12 12-10-2006, 05:23 PM

إيه دا كله إيه دا كله إيه المجهود الجبار دا يا سارة :P
أنا لو منك أروح أرشح نفسى لأكبر جائزة فى العالم

:D

فتاة_الإسلام · #13 12-10-2006, 10:05 PM

جميل الموضوع يا سارة.. مستنيين البقية بإذن الله...

sara777 · #14 13-10-2006, 02:40 PM

زيزو
شكرا اوي لمرورك وياريت تكمل وتقولنا رأيك ايه

ايه شكرا يا عشل علي مرورك العشل :D
نورتي والله

حنونة شكرا يا سكر لمرورك وان شاء الله هكمل

علا شكرا اوي لمرورك والباقي جي في السكة

sara777 · #15 13-10-2006, 03:04 PM

بعد ماميشيل خلصت التليفون سابت مكتبها ونزلت على طول.... كده من غير سلام ولاكلام
..هيا ايه الحكاية

ده انا اللى بسأل نفسى

وانا سارح لقيت دورتا واقفة قدامى ومن غير مااقصد لقيت نفسى فى البلكونة عندها وهى كانت فاتحة الشبابيك

ايه ياستى انتى ده انتى ماعندكيش اى نوع من الحيا

... ده انا كنت لسة باقول عليكى محترمة

دورتا كانت بتتعامل معايا بتلقائية شديدة..

وسألتنى وده ماجاش على بالى
-واضح انك مهتم بميشيل
السؤال كان مفاجاءة لى لانى كنت باحاول انى كمان ابدو طبيعى فى تعاملاتى مع كل اللى حوليا

دورتا: ميشيل شقية وانانية واكيد لما توثق علاقتها بيك حاتستغلك ..خد بالك.. انا اعرفها اكتر منك

وسابتنى ومشيت

.. وكانها تمت مهمتها على اكمل وجه... وصحتنى من حلم جميل

وليييييد......وليد...ده هنرى كان بيندهنى..من ورا مكتبه
-ايوه ياهنرى.. رديت انا
قلى ..افتح الاميل بتاعك باعت لك ملف مستعجل ومحتاج حبة اهتمام منك ..وابقى اشكرنى بعدين

وببراءة الاطفال فتحت الاميل علشان الاقى حبة صور ستات
بصيت له بمعنى ياعم هنرى احنا فى شغل محترم ..عيب

افتكر انى مبسوط..
فقلى ..-حاابعتلك تانى
-لأ ياعم شكرا انا موش بتاع الحاجات دى.

فبص لى بنظرة غريبة
- وقال لى.. اه ..فهمت...

تانى يوم الصبح ..صحيت نشيط

وواقف على محطة الاتوبيس ..والاقى مين جاى عليا الست اللى اخدت منها الدولار فاكريناها?
طبعا بما انها صاحبة فضل عليا كان لازم ابتسم لها

وطبعا هى استغلت الموقف ودخلت فى صباح الخير.. وانت ساكن هنا?.. انا كمان... الله.. طلعنا جيران ..ابصر ايه ..مدرك ايه..........

الاتوبيس جاه عملت فيها راجل ودفعت لها علشان مايبقاش فيه حد احسن من حد ..وحاولت ااقعد بعيد عنها
لكن الصدفة ماكانتش حلوة قعدنا جنب بعض..وهيا هاتك يارغى اكلت ودانى لمدة نص ساعة...
كل اللى طلعت بيه وفاكره كان اسمها.

اسمها كان صعب ان انساه.. اصله فكرنى بالذى مضى.. اسمها كان مونيكا.. بس من غير لوينسكى

وصلت الشغل بصيت على مكتب ميشيل ماكانتش موجوده صبحت على الموجودين وقعدت على مكتبى

سرحت تانى فى ميشيل.. ياترى ايه اللى حصل وماجاتش ليه النهاردة?

ماكانش ادامى غير دورتا ومين غيرها بعد ما هنرى اخد فكرة حلوة عنى انى ماليش فى الستات ..وبدء يخفف تعامله معايا..

دخلت على دورتا

-صباح الخير
-ازيك النهارده..
- فيكى حاجة جديدة النهاردة يا دورتا ...فستان جديد ده?

دورتا انشكحت خالص وواضح انى بسؤالى ده صحيت عندها حالة الانثى فانتبهت وقالت لى
- لأ.. موش جديد ولا حاجة ..عجبك?
قلتلها يجنن عليكى

-وشعرك النهاردة مختلف انتى غسلتيه والا حاجة?
..واه من لسانى طبعا كنت باهرج لكن الغريبة انها افتكرتنى باتكلم جد
وجاوبت ..لا

لحد هنا وماكانش ينفع ماادخلش عدل فى الموضوع
وبدون لف سالتها
- هى ميشيل عيانة?
-اه هو انا ما قولتلكش?
-لا ماقولتيش..طب موش المفروض نكلمها نطمن عليها?
دورتا:انت شايف كده?

فى عقلى الناس دى مابتفهمش ..والا انا اللى ميشيل وحشتنى وعاوز اشوفها?

من غير مانضيع وقت كلمنا ميشيل موش فاكر هى قالت ايه او انا رديت ازاى
بس كنت سعيد لان ميشيل سمحت لى ازورها فى بيتها وكمان قالت لى وحشتنى يابيبى

وانا رايح ازورها فكرت اخد بوكيه ورد

دخلت محل الورد اللى كان ادام الشركة اللى انا شغال فيها

تخيلوا لقيت مين واقف يبيع ورد .....
....موش حتصدقوا مين...??????

يتبع...