شباب ع القهوة ( بنظرة جديدة )

[..Just Stop]

سلام عليكم

لاول مرة افكر انى اكتب مقدمة وقولت انا هكتب مقدمة نار وهتعجبكم وهتنبهرو بيها وهتكملو الموضوع للاخر بس للاسف دا مش هيحصل لانى مش هكتب مقدمة اصلا!!

فى يوم من الايام كنت قاعد على القهوة فمر شريط حياتى ( اسوة بكتاب حياتى يا عين ) ادام عنيا

وافتكرت السنين الكتيرة اللى انا قضيتها فى التعليم وبالفعل اتعلمت ( قصدى حفظت المناهج ونسيتها بعد الامتحان ) واخدت الثانوية ودخلت الجامعة واجتهدت لدرجة انى كل سنة كنت بنجح بمادتين بس !!

قضيت سنين الجامعة ضحك ولعب وجد وحب وشوية مذاكرة لزوم الجامعة يعنى

والحمد لله نجحت واخدت البكالوريا ( زى ما بيقولو )

وطبعا لما انا اخدت الشهادة مقعدتش ساكت كدا انا عملت اللى كل الناس المفروض تعمله

اخدت الشهادة وعلقتها على الحيطة بواسطة مسمار صلب ( من انتاج مصانع عز طبعا )!!

وقولت انا هاخد راحة شهر على بال ما الوظيفة الحكومى تيجى اهو منها تبقا راحة وانتظار قطر الشغل الحكومى ومنها استعد للشغل تلاتة فى واحد ( زى بونكس للغسيل كدا )

والشهر خلص بسرعة والشهر التانى بردو خلص ولما الشهر التالت والرابع خلصو قولت مبدهاش بقى فين الشغل الحكومى اللى انا مستنيه

قولت الحل انى اصبر كمان لحد ما الشهر الخامس يعدى ولما الشهر التامن عدا هو كمان مقدرتش اصبر اكتر من 12 شهر لحد ما صبرى نفد

وفى يوم قررت انى انزل ادور على شغل فى قطاع خاص

لانى سألت اصحابى اللى متخرجين قبلى بتلات سنين على حل لمشكلتى قالولى تعالى دور معانا! على شغل وف خلال سنتين تلاتة هتلاقى شغل ان شاء الله

وطبعا كعادتى انى لازم استفيد من نصايح الاخرين لان النصايح دى متولدة عن تجارب سابقة

فاخدت بنصايحهم وفضلت ادور على شغل فى قطاع خاص

وف نفس الوقت كنت بتخابس عليهم وبدور من وراهم على شغل حكومى بس هما سبقونى واتخابثو قبلى

وكانت النتيجة واحدة ان محدش فينا لقى شغل

ولا فى القطاع العام ولا فى القطاع الخاص وفى الوقت دا طبعا والدى كان جاب اخره معايا لانه كان مستنينى اتخرج واشتغل واريحه واعيشهم فى بيت شرح وبرح واعوضهم عن سنين البؤس والحرمان

اللى عاشوها علشان اتعلم واتخرج

وبعد وصلة الاحلام دى نرجع للواقع المرير اللى احنا عايشينه

والدى كان راجل عنده بعد نظر مش مرض فى العين !لا انما كان بيعمل حساب لقدام فكان حاسس بينا كشباب عاطل

وحاسس بالمعاناة والايام السودة ( اقصد المعنى الحرفى لكلمة سودة ) اللى بنعيشها

المهم فضلت ادور على شغل واستمريت فى الروتين اليومى دا مدة مش كبيرة ومش قليلة فى نفس الوقت

ففكرت انى افتح محل دباديب وهو فى الفلانتاين داى هنعمل احلى شغل بس
بصيت لحال العشاق دلوقتى لقيت ان محدش بيطيق حد واكتشفت بالصدفة انزمن الرومانسية انتهى
لان الناس بتقول كوز المحبة اتخرم
ولان سمية بتقول ( هدوق قلبه طعم الذل هخليه من حياته يمل )!!

لحد ما ف يوم من الايام ( خير اللهم اجعله خير ) ربنا هدانى لفكرة انما ايه جبارة فكرت انى افتح قهوة( او كافيه لزوم الانجليزى يعنى ) كشغلانة مؤقتة على بال ما الشغل الحكومى يجى

ولو مكنتش شايف قهاوى كتير ادامى كنت قولت انى اول واحد يفكر فى الفكرة الجبارة دى بس اكتشفت ان ناس كتير فكرت فيها قبلى ونفذتها

بس اكتشفت ان القهوة دى بيقعد عليها ناس كتير اوى شباب فى عمر الزهور وناس فى عمر الزهور الدبلانة بردو فجه فى بالى انهم ناس حالتهم زى الفل والاشية معدنوطول النهار يطلبو طلبات

فكلمت واحد فيهم وقولتله يا بيه حضرتك بتشتغل ايه( اصله متشيك كدا وشكله بن ناس )

فرد عليا رد مكنتش متوقعه قاللى دنا قاعد على القهوة استنى شغل انا وباقى الشلة دى

فكانت القهوة دى مقر للعواطلية ومن يومها غيرت اسم القهوة من قهوة ابو محمود ل(حزب العواطلية )

وعلى فكرة القهوة دى هيا اللى انا قاعد عليها دلوقت وبحكيلكم منها ذكرياتى ومازلت مش لاقى شغل بردو

وشكرا لكل بنى ادم وصل للسطر دا لان ناس كتير مقرتش الموضوع

(للاسف يعنى )بسب المقدمة البايخة اللى انا قولتها!!

وبكدا لازم تستنو سنتين تلاتة علشان اكمل لكم باقى القصة اللى فى نهايتها مش هلاقى شغل برده

والبركة فى وزارة القوى العاملة

..... the end
اه كنت هنسى
مش منقول