خليك ف حالك بقى ومتقرفناش

[naghm_rna]

-اييه ده شايف يا احمد الشباب اللي هناك اللي عمالين يضربو الولد الغلبان ده
ياعم واحنا مالنا خليك في حالك بقى

-تعالى بسرعه نساعد الراجل العجوز ده شكله شايل حاجات كتير ومش عارف يشيلها
ياعم واحنا مااالنا اكيد في حد هيشوفو ويساعده

-شوفتي يا سوسو البنت ديه شكلها لسه جديده في الجامعه ومش عارفه حاجه تعالي نساعدها
يووه واحنا مالنا بقى بعدين بصراحه مش فايقه اعمل فيها مرشده سياحيه دلوقتي

-ايه ده يا محمد الحق اصحاب اخوك الصغير بيولعو سجاير لبعض تعالى بسرعه ننصحهم او نكلم اهلهم
وانا مااالي ياعم اهم حاجه ان اخويا مش بيدخن يولعو بقى واحنا مالنا

-ده فيه إزاز(زجاج)واقع على الارض ممكن يعور اي حد تعالي بسرعه نشيله
حيييلك حيييلك نلم ايه يا عم واحنا مالنا هو احنا اللي كسرناه؟؟؟

-البنت ديه شكلها ملفت اوي وحجابها مش كويس والشباب كلهم ماشيين وراها
تعالي نروح ننصحها بهدووء كده يمكن تسمع كلامنا
يابنتي واحنا مالنا بصي كده وراكي الحمد لله مفيش حد ماشي ورانا
ملكيش دعوه بيها بقى

-لالالا مش معقول ده فيه خناقه جامد هناك لازم نروح نشوف في ايه ونهدي الناس شويه
بقلك ايييه متنرفزنييش يعني احنا اللي هنعرف نهديهم مش بعيد نضرب
احنا مالنا بقى

اه صح واحنا مالنا
نشوف ناس بتتقتل ونقول واحنا مالنا
نشوف بنات ماشين بعد الفجر لوحدهم ونقول واحنا مالنا
نشوف عيال مشرده في الشارع وعاملين يضربو في ده ويعاكسو في ديه
ونقول واحنا مالنا
نشوف شباب مشغلين الاغاني على اعلى صوووت والاذان عمال يأذن
ونقول واحنا مالنا

وحاجات كتييييييره من ديه انا بقول ابسط ابسط حاجه بتحصل
ياترى انتو بردو لما بتشوفو حاجه غلط بتقولو وانا مالي
او حتى بتخافو؟؟؟
طب ياترى الناس اللي بتقول وانا مالي ديه بيكون عندها حق فعلا
ان الواحد يفضل في حاله وملوش دعوه بحد ولا ايه؟؟؟؟
معقوله كده نبقى في حالنا لدرجه نمشي كاننا مش شايفين حاجه الا مصلحتنا وبس؟؟؟

في كلام كتير عايزه اقوله في الموضوع ده بس انا عايزه اعرف رايكم
اتفــــضلو.....