خدي بالكِ من كلامكِ .. ماتعرفيش أنهي ودان بتسمع لكِ!

["أم طلحة"]

بسم الله الرحمن الرحيم

أولا يعني ايه عنوان الموضوع؟
دي نصائح بنقولها للبنات .. كلها بتصب في أنها تاخد بالها من كلامها لو اضطرت تكلم رجل أو حتى في أي تعامل مع الناس
وبنهدف به أننا نوصل لصورة البنت الحيية الطيبة اللي ربنا سبحانه وتعالى يحبها و يرضى عنها

ليه بنقول للبنت خدي بالكِ من كلامكِ ومش بنقولها للولد؟
ربنا سبحانه وتعالى قال:
" إِنِ اتَّقَيْتُنَّ فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَّعْرُوفًا "
فربنا وجه صيغة الأمر للنساء مش للرجال
والنبي صلى الله عليه وسلم حذّر من فتنة النساء مش من فتنة الرجال

(1)
لازمات البنات

ساعات كده بيكون للبنت "لازمة" في كلامها
هي مش قاصدة تتدلع... لكن هي تلقائية وبتقولها كده
مثلا تقول: أنا بحب البتاع الصغنوني أو الصغنتوتي ده
البنوتة دي طيوبة و بيوضة
أو مثلا لما تتعجب من حاجة تقول: اهااااااا اممممم
وحاجات كده كتير أكيد عارفينها

الاشكال طبعا مش في أنها تتكلم بها مع صاحباتها البنات
لكن تاخد بالها من كلامها وماتدخلش كلمة من الكلمات في كلامها مع رجل غريب من غير ما تقصد.

(2)
أصوات البنات في التليفونات
ولنا معها وقفتين:

* مثلا هترد على تليفون
بلاش كلمة الووووو ايوااا مين معااايا
لكن يكون الكلام "مقتضب" يعني تختصري في حروفه على قدر الامكان
الو3 حروف .. يبقى بلاش الووو اللى 5 حروف

بالذات لأن حروف المد بتطول ماتعرفيش أنتِ وقفتيها فين

لكن خير الكلام: السلام عليكم
أولا بتاخدي عليها ثواب 10 حسنات ولو كملتيها لآخرها 30 حسنة
ثانيا الكلمة دي مباشرة بتعطي إحساس للي هيرد أن اللي بترد دي بنت محترمة
ثالثا كأنكِ بتتقي شر اللي هيتصل (لو كان واحد مش كويس) بأنكِ ألقيتي عليه السلام وطلبتي منه الأمان

* صحيتي من النوم على صوت تليفون
لو حسيتي أنكِ لسه مش فايقة و"هتخرّفي" في المكالمة
الأفضل ما ترديش
كمان صوتكِ وأنتِ صاحية من النوم بيكون لسه تقيل وعقبال ما بتجمّعي الكلام وتاخدي أنفاسكِ ... كل ده ما تعرفيش الشيطان بيلعب في دماغ المتصل ازاي !!!

(3)
البنات و المواصلات

ملحوظة مهمة جدا المواصلات دي أجرة مش ملاكي
يعني مش ينفع أخد راحتي في الكلام والضحك فيها

في 26 ودان غيري بتسمعنى لما باتكلم .. بالذات لو كانت العربية 14 راكب


لو أنتِ عايزة توقفي السواق عشان تنزلي
لوقاعدة وراه مباشرة مفيش اشكال
لو بقى قاعدة ورا خالص
إما تقوليها مرة واحدة "على جنب"بصوت واضح و جامد

أو لو شايفة قدامك راجل محترم وتستشفي أنه بيساعد قولي "على جنب" بصوت عادي بين البينين بحيث يتطوع الرجل ده وينادي بدلا عنكِ

(4)
البنات و أصحاب المحلات

ساعات بنقابل نماذج غلسة من البياعين.. يفضل واقف لكِ وأنتِ بتشتري الحاجة...وكل شوية عايزة حاجة يا آنسة!

فأنتِ لو عايزة حاجة.. أو مجموعة حاجات... جمعي الحاجات مع بعضها بكل تفاصيلها وقوليهم له على مرة واحدة

بلاش كل شوية تناديه أو تفضلي تسأليه عن تفاصيل حاجات مش هتشتريها أو تفاصيل عموما مالهاش فايدة

زي مثلا واحدة عمالة تسأل البياع :
هو انتو اللي فاتحين فرع في منطقة كذا؟
أصل أنا شفت محل هناك بس مخدتش بالي

فخدي بالكِ بقى..
لأنكِ كل ما تفتحي سكة كلام هيفتح لكِ هو 10 سكك

وابحثي عن بنت بتشتغل في المحل عشان تبقى أسهل في الأخذ والرد معاها ... بالذات أن بعض البياعين خلقهم ضيق


"منقول"

[القابضة]

بارك الله فيكى

["أم طلحة"]

وفيكم بارك الله .

[أم عمار قائد الأحرار]

راااااااااااااائع جزاكي الله خير

[shimaa2009]

جزاكى الله خيرا

[أريــــ الجنة ــــد]

موضوعك مهم جداً وعجبني فيه حس الفكاهة الطريفة دي ..

بجد سلمتِ من كل شر ..

[نقاء الروح]

موضوع رااائع جدا ..

جزاك الله خيرا اخيتي ..

بس فيه نقطة مهمة اوي ال هي الاخيرة

فعلا ديه حاجة تخنق بجد .. انا اكره حاجة عندي لما يكون الواقف واحد مش وحدة

ولما يقعد يتفزلك و ده حلو و ده يجنن و ده وحش

ابقى ناقصة

احيانا اقول فيها ايه لو خلو وحدة ..

حتى ناخد راحتنا ..

[nada 3adel]

جميلة جدا النصائح ديه ميرسي جدا

بارك الله فيكي

[zhoor]

جزاك الله فسيح جناته ....

في انتظار جديدك ..

تحياتي

[سمية11]

جميل جداااااااا شكرا على الافادة

[Free angel]

بجد موضوع جميل جداااااا

وجزاك الله خير

[منة الله بلات]

والله الموضوع روووووووووووووووووعة

مشكورة جدا

[ايه كمال]

[roro93]

السلام عليكم ورحمه الله وبركاته

جزاكى الله خيرا موضوع جميل اوى
ربنا يهدينا جميعا

["أم طلحة"]

وعليكم السلام ورحمة الله وبركاته
جزاكم الله خيرا
و
نفع الله بكم.