رباعيات فى حب الله

[حنان الجبلاوى]

يارب انت اللى عالم .. بقلبى محبتك .
مش بس خوف من نارك .. أو شوق لجنتك .
أنا حبى لك مخلوق معايا ..
كل همى رضاك .. وكلى شوق لرؤيتك .

جتلك وأنا خجلان .
اغفر لى يا رحمن .
طالب رضاك عنى ..
وفـ جنتك طمعان .

سرحت فـ الملكوت .
وفى الحياة والموت .
سجدت لجل أشكرك ..
يا صاحب الجبروت .

شايفك بتبكى .. كتير يا صاحبى .. شايل جواك هموم .
تشكى اللى سابك .. واللى باعك .. واللى ظلمك يوم .
دا ربك للمؤمن أقسم..
بجلاله وعزته .. ما يردش دعوته .. وينصر المظلوم .

عرفت انك راضى عنى .
يوم ما بالمحنة ابتلتنى .
دايمًا .. سامع دعايا ..
وبكرمك يارب فاكرنى .

وقف البشر ضدى .. أو كانوا جنبى .
ما يهمش غير رضاك .. وحدك يا ربى .
وليه أخاف .. وليه أحزن ..
وانا اللى خدتك .. وكيلى وحسبى .

خلقت الكون وبرغم براحه .. رحمتك أوسع .
وأنا مهما ضليت طريقى .. لرحمتك برجع .
أشكى لك عبادك وقسوتهم عليَّا ..
أسجد لك .. وأبكيلك .. وأدعيلك .. وتسمع .

إليك دعايا وشكوتى .
اهدى يارب خطوتى .
قدرنى على طاعتك ..
نورلى قلبى .. وسكتى .


سامحنى يا رب لو يوم غفلت .
اغفر لى ذنبى لو يوم غلطت .
ما انت الغفور .. وانت الرحيم ..
هتسامحنى .. لو ف يوم أذنبت .

جعلت كل شئ بميزان .
رفعت السما من غير عمدان .
وانا عايش وراضى بحكمك ..
وعارف .. كل شئ بأوان .

بقلمى

[عبد العزيز الشراكي]

( يأيها الإنسان ما غرك بربك الكريم ) صدق الله العظيم .
فقال الإنسان : غرني كرمك يا رب
اللهم اغفر لنا ذنوبنا