|
||||||
| حي على الفلاح موضوعات وحوارات ومقالات إسلامية |
|
|
أدوات الموضوع | انواع عرض الموضوع |
|
#1
13-09-2010, 09:20 AM
|
|||
|
|||
متيجوا نتكلم جد شوية ...كفاية شعارات .. اتكلم .. اعمل حاجة
السلام عليكم ورحمة الله وبركاته طبعا بعد ما سمعنا جميعا خبر نيه احد القساوسه الأمريكان حرق المصحف الكريم زعلنا وحسينا ان دة ماينفعش وقعدنا نقول حسبنا الله ونعم الوكيل واتكلمنا كتير اوي جميل اوي كلامنا بجد حاجة بتفرح اي شاب مسلم انه يلاقي شباب زيه في نفس سنه حامل رسالته لكــــــــــــــــــــــن لحد امتى هنفضل نقول زعلانين وحرام ودة ذنب الحكومات؟؟؟؟ لحد امتى هنفضل نشجب وندين ونقول شعارات وكلام؟؟؟ لحد امتى هنفضل بس بنتكلم؟؟؟ تمام القس ده تراجع عن قراره لكــــــــــــــــــــــــــن والله لو رآنا هذا القس متمسكين بكتاب الله لما جاء في باله هذا التفكير وذلك خوفا مما يصيبه من المؤمنين لكن الحقيقه انه مجرد كلام أكيد مش الكل بس كتير اوي مننا كدة طب مش كفايه بقى؟؟؟؟؟ مش كفايه نعد نقول كلام وخلاص؟؟ مش تيجوا بقى نتكلم جد شويه ونشوف احنا رايحين على فين؟؟؟ بصوا ياجماعة تعالوا نشوف كام حادثه مرت علينا بأبشع من ذلك او بالمثل هنلاقي كتير اوي ناسيين غزة والحصار ناسيين الحرب على غزة وقتل الاطفال ناسيين الهجوم على اسطول الحريه ناسيين أسر بنات المسلمين والله أعلم بحالهن وأسر شباب المسلمين ناسييين قرب هدم المسجد الأقصى ناسيين ضم الحرم الابراهيمي ومسجد بلال لليهود ناسيين الاساءة للرسول الكريم ناسيين كل ده بس لما كل موقف منهم حصل كان ايه موقفنا؟؟ نفس الموقف زعلنا شويه وقعدنا ندين ونشجب ونتكلم لكن وماذا بعد؟؟ لا شيء نحن كما نحن واليهود كما هم والأعداء في تقدم ولازلنا في تخلف سبحان الله نفسي أعرف محتاجين ايه عشان نعرف بقى اننا مقصرين في حق الدين دة؟؟ محتاجين ايه عشان نقول بعلو الصوت؟؟؟؟ كفاااااااااااية تخلف كفاااااااااااااية خضوع كفاااااااااايه بعد عن دين ربنا محتاجين ايه عشان بقى نغير موقفنا ونخلي كل موقف يغيرنا بجد مش مجرد كلام بنقوله محتاجين ايه بس ياجماعة؟؟ بجد من الحاجات اللي عجبتني اوي مواضيع كتيرة عملها اعضاء كتير مننا و زينا ومن اكتر الحاجات اللي شجعتني اعمل موضوعي ده هنا في القسم بس لو نتحرك لكـــــــــــــــــــــــــــــ،ن هل يكفي الكلام؟؟ احنا زعلنا عشان المصحف كان هيتحرق بس لازم نلاحظ حاجة المصحف لو تم حرقه فهما كدة هيكونوا حرقوا عدة نسخ بسيطة لكن الأصل موجود لكن انت كمسلم فينك من كتاب ربنا؟؟؟ فينك من اتباع احكام ربنا اللي في كتابه؟؟؟ ازاي ربنا يقول على حاجة حرام قطعا وانت لازلت بتقول هفكر هنفكر في ايه ياجماعة بس؟؟ عاوزين ننصر كتاب ربنا يبقى ننصره بالعمل مش بالكلام ننصره باتباع تعاليم ربنا ننصره باننا نقول سمعا وطاعة يارب يقول تعالى:"وماكان لمؤمن ولا مؤمنة اذا قضى الله ورسوله أمرا أن يكون لهم الخيرة من أمرهم يبقى لازم نقول سمعا وطاعة بصوا ياجماعة احنا قد ايه؟؟ احنا كتير اوي اوي اوي بس بجد بدون اي فايده بصوا ع الصور ديه  شفتوا احنا قد ايه؟؟ مفيش حد مكان صغير فاضي احنا كتير اوي ديه صورة لصلاة المسلمين في المسجد الحرام  ديه صورة لحجاج البيت الحرام شفتوا بقى احنا قد ايه؟؟ والله العظيم اللي يشوف الأمة ديه في الحج او اي عمرة او حتى صلاة التراويح يقول الأمة ديه مستحيل تتهزم دة بس لو سبنا حجاج البيت يروحوا ع اليهود يخلصوا عليهم لكــــــــــــــــــــــــــــن للأسف الشديد كتير بس بدون اي فايده عارفين مشكلتنا ايه ياجماعة؟؟؟؟؟؟ انا بس بنقول احنا الحمدلله بنصلي ونصوم وعارفين ربنا كويس جميل جدا اننا نعمل الطاعات بس الطاعات مش تكفي لازم نبعد كمان عن الحرام :::شوفوا كدة رسول الله بيقول ايه ما نهيتكم عنه فاجتنبوه وماأمرتكم به فأتوا منه مااستطعتم فانما أهلك الذين من قبلكم كثرة مسائلهم واختلافهم على أنبيائهم رواه البخاري ومسلم عارفين يعني ايه ياجماعة؟؟؟ يعني رسول الله صلى الله عليه وسلم بيقول ان الحاجة الحرام نبعد عنها فورا بدون تفكير فاجتنبوه الحرام نجتنبه اما الطاعة فقال فيها فأتوا منه مااستطعتم على قد طاقتنا يعني يعني البعد عن الحرام مهم جدا بدون اما نفكر او اننا نقول ليه او كمان شويه او ....او.... او ولازم نبعد عنه فورا مش بمزاجنا وربنا ماأمرش بحاجة غير اما كان فيها خير لينا ومانهاش عن حاجة الا وفي اتيانها شر لينا دة مؤكد طيب ياجماعة مش ناويين بقى نكون مسلمين بجد؟؟ مش ناويين نحمل هم الدين دة؟؟؟ مش ناويين نتغير عشان ربنا يغيرنا ربنا بيقول :: ان الله لايغير ما بقوم حتى يغيروا ما بأنفسهم يعني لازم نغير نفسنا عشان ربنا يغير حالنا ويساعدنا وينصرنا ربنا كدة كدة هينصر دينه لكن ممكن ينصر دينه بينا او بغيرنا فلازم نغير نفسنا عشان ربنا يستعملنا في نصرة دينه مش يستبدلنا خد قرار بقى وكفايه وقوفك على نفس النقطة كلنا زعلنا من حكايه نيه القس لحرق المصحف لكن مافكرناش نزعل ولا للحظة واحدة في بعدنا عن كتاب الله ازاي بنقول كتاب الله ده حياتنا ونزعل لو حد أهانه واحنا مش متبعين كلام ربنا اللي في كتابه خلونا نتكلم بصراحة أكتر ::: خلونا نتكلم في حالنا هنا ايوة هنا بما اننا دايما بنتقابل هنا يبقى لازم نشوف ايه اللي بنعمله وكل واحد يقف مع نفسه وقفه كل واحد يشوف بيعمل حرام ولا لأ؟ كل واحد يشوف ايه اخباره في وجوده هنا في المنتدى وبالتالي كمان خارج المنتدى لما ربنا يقول في كتابه ::: قل للمؤمنين يغضوا من أبصارهم ويحفظوا فروجهم ويقول في آيه تانيه ::: وقل للمؤمنات يغضضن من أبصارهن ويحفظن فروجهن واحنا لحد دلوقتي لازلنا مش واخدين بالنا من النقطة ديه لازلنا لحد الآن عادي بنحط صور محرمة في تواقيعنا او مواضيعنا وعادي نبص عليها وعادي وعادي طب ازاي بقى؟؟؟ ازاي نقول زعلنا على النيه لحرق المصحف واحنا مش بنعمل باللي فيه؟؟؟ ازاي نكون بجد أمة النبي ومن شباب امة النبي ولازلنا بنقول نفكر وعادي مش عادي والله لما ببص على حال الأمة بجد بحس اننا شكلنا غريب شكلنا مش من الغرب ولا من المسلمين العرب احنا مش شكلنا بننتمي لأي امة ماينفعش والله لما ربنا يقول ::: ولا تخضعن بالقول فيطمع الذي في قلبه مرض واحنا لحد الآن كبنات لازلنا بنهزر مع شباب عارفين ايه الخضوع بالقول؟؟؟ الخضوع بالقول هو كترة الضحك والهزار والكلام الكتير اللي بيخلي فيه تعود بين الشاب والبنت الخضوع بالقول ياجماعه هوان البنت تتكلم بشكل يخلي الشاب اللي قدامها يتعود عليها ويبقى كدة مدخل للصحوبيه والكلام دة ولما ربنا بيقول :: ولا متخذات أخدان وفي آيه تانيه :: ولا متخذي أخدان ونيجي احنا لازلنا بنقول عادي اما يكون ليا اصحاب شباب كبنت وان نيتي خير والشاب يقول عادي يكون ليا اصحاب بنات وانا نيتي خير مهما كانت النيه كويسه وخير فالعمل المحرم لا يصلحه النيه ابدا وبرده في نفس الآيه تلاقي شاب عادي يقول لبنت بحبك بدون اي رابطة شرعيه بينهم والبنت برده كذلك وربنا أصلا حرم ان بنت تقول لشاب لايحل لها انها بتحبه وهكذا بالنسبه للشاب لازلنا برده بنعمل حاجات من ديه ولما ربنا يقول ::: ومن الناس من يشتري لهو الحديث ليضل عن سبيل الله بغير علم وسيدنا عبدالله بن مسعود قال ان لهو الحديث هو الغناء واحنا لازلنا بنسمع أغاني وبنقول عادي كل الدنيا بتسمع هتيجي علينا احنا؟؟؟؟ بصوا ياجماعة ديه حاجات بسيطة من حاجات كتير غلط بنعملها احنا مش ملايكة كلنا بنغلط بس غلط عن غلط يفرق ولازم بعد كل غلط نستغفر ربنا ونحاول بجد اننا نبعد عنها بجد ياجماعة لازم بقى نفكر في اننا نتغير وازاي نتغير اكيد كلنا عارفين كويس ايه الحرام او الغلط اللي بنعمله خلونا نكتب كل حاجة حرام بنعملها وحبه حبه نحاول نتخلص من واحد واحد مستحيل حد يتغير ميه وتمانين درجة في يوم وليله لكن بالتدريج والمحاولة والمجاهد هنتغير حبه حبه لازم بس تنوي نيه التغيير وتتخلص من ع الأقل حاجة غلط بتعملها ولو بسيطة واستعين بربنا على كدة حط في بالك انك بتقول ان كتاب ربنا مهم عندك وبعد كدة تقول مش هقدر ابعد عن اللي ربنا حرمه يبقى ماينفعش نحاول ياجماعة بنيه مخلصه اننا نتغير مش مرة واحدة لكن حبه حبه بالاستعانة بالله كل حاجة هتبقى سهله ان شاء الله ولاحظ اننا لو مااتغيرناش ربنا هيبدلنا بناس تانيين هيقدروا ينصروا الدين ياريت بجد نبقى شباب مسلم عارف قيمة دينه وعارف قيمة رسالته ويشيلها صح بجد ياريت حد فينا يحمل هم الأمة ياريت احنا كشباب مع بعض ناخد بايد بعض لطريق ربنا مش معقول نكون عباد العزيز والأمة مذلوله بالشكل ده مش معقول نكون عباد القوي واحنا ضعاف بالشكل ده لازم بقى نعرف اننا شباب من أمة النبي مش معقول نفضل على حال مايرضيش النبي صلى الله عليه وسلم فلتجعل من همتك نصرة الدين بتغيير نفسك أولا ثم من حولك واذا استصعب عليك أمر فقل حسبي الله ونعم الوكيل واعلم انك ان تصدق الله يصدقك لو كنت صادق في الرغبه بالتغيير الله عز وجل سوف يساعدك في النهايه أنا آسف جدا ع الاطاله وعارفه ان الموضوع طويل وممل
بس والله من رايي انه مهم لان المواقف اللي عدت علينا تحاول تعادي الدين كتيرة اوي واحنا برده مفيش اي تحرك ولا تغيير خط خطوة ربنا يكرمك بيها وانوي نيه صح خليك قد اسلامك زي اما ربنا أعنم عليك بدينك خليك محتفظ بعروبتك مش بتقلد غيرك وخلاص لازم نتناصح فيما بيننا ونكون قد كل مسئوليه وقل ::: الله المستعان آسف جدا ع الاطالة والسلام عليكم ورحمة الله وبركاته اللهم استعملنا في نصرة دينك ولا تستبدلنا
__________________
 حملناك يا مصر بين الحنايا وبين الضلوع وفوق الجبين عشقناك صدرا رعانا بدفء وإن طال فينا زمان الحنين فلا تحزني من زمان جحود أذقناك في هموم السنين
|
| العلامات المرجعية |
«
الموضوع السابق
|
الموضوع التالي
»
العرض الشجري
|
|
جميع الأوقات بتوقيت GMT +2. الساعة الآن 01:09 AM.
