توت توت واحد غلــــبـــــان وصل

[عاشق البلانكو الابيض]

تووووووت توووووووت صفارة بتنادينى .. يلا بسرعة الحق وجينى
ده الصوت اللى كل يوم بينادينى والحق واجرى علشان ابدا يومى
كل يوم الرحلة طويلة وبتاخد ساعات كتيرة
كل يوم لازم اركب القطر لدرجة ان رحلة العمر
كل يوم تبدأ بالقطر
يوميا اركب القطر بس قطرى مختلف عن الباقى
اسمه
قطر الغلابة اة فعلا الغلابة عارفين ليه!!!!!!!!


عندى اسباب كتيرة
منها انه بتاع المواطن الغلبان اللى مش كفاية الدنيا جت عليه
علشان كمان الحكومة تهمله وتخليه يسافر فى قطر زى سلة المهملات
وده وصف على مسمى
وسبب تانى
ان فى رحلة القطر بنقابل امن انواع البشر كتير وكتير
اه افتكرت
دا انا كل يوم اشوف الراجل الغلبان المطحون مسافر للقمة عيشه
ها ربنا يعينه ويصبره
ولا الشحات اللى كل يوم مقضيها سفر والله يسهله اكيد بيكسب رايح جاى
واهو بيغير بلاد ووجوه جوا القطر

وكمان اللى يجى ويرمى الحاجة فى اديا ويترجانى اشترى ولو حتى مش عايز
عارفنهم دول البايعين اللى مالكين قطر الغلابة ومتحكمين فيه
ولا حكاوى قطر الغلابة
اه كل يوم حكاية وقصة واشاعة وفلان وفلانة عملو وقالوا وعادوا
واسمع عن ناس مش عارفهم وعمايله اللى اثرت فيا
اه واللى يتعلب ان دى تسالى السفر اللى لازم وبالاجبار تتسمع
اه ولا قصص قطر الغلابه

كل يوم قصة بتبداا من النظرة الاولى اللى شبكت القلوب وفى اول يوم
تكون النظرات وتانى يوم الموبيلات واليوم اللى بعده نستنى بعض
بالبلدى المقابلات وبعدين ناخد على بعض وتنتهى النظرة اللى بدات
بالمعاكسة والتنازلات ومش بيحصل ده الا فى قطر الغلابه
ممكن لغياب الرقابة وخنقة الزحمة وكاننا فى غابة من الضياع
ومش عارفين هنوصل للمحطة الجاية ولا لا

اه يا سادة نسيت حاجة مهمة
مش عارف منين ابدا لكن انا طوال وجودى فى القطر بفكركم انا قلت
ان عمرى معظمه فى قطر الغلابه
لاحظت حاجات كتير وصلت لبيوتنا واتهزت ليها المشاعر
عارفين ايه اللى كانت بدايته من قطر الغلابه
الخيانة اه مستغربين ليه الخيانة الزوجيه
اه والله البدايه من الاختلاط راجل وست وكل يوم فى القطر

واخداهم رتابة وملل الحياة وهى زهقانة من جوزها رافض يخرجها او
يقول كلمة حلوة وهو زهقان من مراته اهملته ونسيته فى زحمة الحياة
والاتنين اتقابلو وبدون تفاصيل كل يوم بتحصل
شبكتهم النظرات وحركتهم المشاعر اللى انتهت بان الشيطان كان تالتهم
وكانت برضو البداية من قطر الغلابه
وممكن اقول كتير عن قطر الغلابة وافكركم تانى ان معظم عمرى فى قطر الغلابه

لكن كفاية عليكم كده
شكلكم تعبتم عرفونى كلامى صح ولا غلط
كمان احكولى
ممكن تحبوا السفر فى قطر زى قطر الغلابة ..
وهل لازم الاختلاط اللى بيؤدى الى كوارث
وجتنى فكرة بما اننا غلابه كلنا وبنحتاج قطر الغلابه
ليه مش نقسم العربيات الى سيدات ورجال
ولا لازم الاختلاط والمحترم محترم

كلمونى عن تجاربكم مع قطر الغلابه