شر البلية ما يضحك

[C A N D Y]

اكيد طبعا كلكوا شوفتوا امتحان الفيزياء الجميل السهل اللى من كتاب الوزارة و اكيد طبعا اللى فى مستوى الطالب المتوسط كالعادة
الامتحان ده بقى من سهولته ندمت على كل لحظة ذاكرت فيها فيزياء و سبت العربى و الاحياء
و طبعا عشان مش ليا قرايب فى مجلس الشعب مكانش قدامى غير انى الخبط اى حاجة فى الورقة و اطلع ادحك و اقول باعلى صوت حسبى الله نعم الوكيل
مستغربين ليه؟؟ اه كنت بدحك
احلى حاجة ان كل اللى فى اللجنة طالعين يصوتوا و يعيطوا و انا طالعة ادحك ببساطة لانه امتحان يدحك و لان اللى حاطه مش عارف ينزل له نموذج اجابة صحيح
كنت بدحك من شدة الذهول و من اللى بيحصل حولى و بعدين كويس انها جت على اد الضحك يعنى من الاخر انا اتهبلت و اهو احسن من اللى حصل لناس كتييير ابسطهم واحد جاله شلل فى اللجنة و معرفش يعمل حاجة و شلل هنا مش تعبير مجازى هو فعلا جاله شلل و اتنقل المستشفى .. و واحد تانى قرأ اول سؤال و معرفش يكمل قراءة .. مش قولتلكوا كويس انها جت على اد الضحك
هم بيعملوا فينا كدة ليه؟؟؟؟؟ لو كانت على اد ان الامتحان صعب كنا قولنا ماشى اهو على الكل و التنسيق هينزل بس التنسيق عمره ما هينزل ببساطة لان فى ناس كتيييير مقفلة الفيزياء .. اكيد طبعا عباقرة و احنا الاغبياء ما هم العباقرة فى البلد دى اللى يستحقوا طب عن جدارة هم اللى معاهم الامتحان الساعة 12 بليل يبقوا طول السنة فى النوادى و يذاكروا اخر شهر و التمن ساعات اللى قبل الامتحان . انا مش بتكلم عن المنيا انا بتكلم عن كل واحد ليه قريب فى الحكومة فى مدرستى انا بس كان فى بنتين و ولد معاهم الامتحان و انا مش بهجس دول كانوا شاريين اللجان السنة اللى فاتت و كان بيتلع لهم النموذج قبل نص الوقت يعنى تعبوا نفسهم و نقلوا كلام مش فاهمينه السنة دى بأى قالوا يتعبوا نفسهم اكتر شوية و يحفظوا النموذج قبل ما يدخلوا الامتحان . معنى كدة ان التنسيق عمره ما هينزل و حتى لو نزل هيقللوا الاعداد يعنى عليه العوض فى طب و صيدلة و السن و اقتصاد و حتى المعاهد.
كنت بقول هما بيعملوا فينا كدة ليه؟ جايز زى ما بيوهمونا انهم عايزين يقضوا ع الدروس و لو كدة فعلا يبقوا بيقضوا على نظام فاشل هم السبب فيه بطريقة افشل ما هم مش يسيبونا مليون سنة نحفظ و نكتب و ييجوا يفاجئونا مرة واحدة و فى الامتحان كمان طب على الاقل فاجئونا فى اول السنة و بعدين عايزيننا نبتكر زى برا علمونا صح قبل ما تحتوا امتحان كدة.
انا على فكرة عارفة عن الغش و التسريب و الامتحانات دى من زمان بس عمرها ما ضايقتنى عشان انا بذاكر و بحل و بقفل و محدش هياخد مكانى فى الجامعة لكن السنة دى ذاكرت و محليتش و اللى مش يعرف الفرق بين الحرارة و الكهربية مقفل الامتحان طب بالذمة دا داخل طب يعمل ايه؟؟يموت الناس اكتر ما هى بتموت من الاكل الفاسد و لو قلنا مش هيكمل طب للاخر اهو برده خد مكان واحد كان ممكن يعمل حاجة و يفيد مصر.
انا مش بقول كده عشان مذاكرتش و لقيتهم بيقولوا صعب قلت صعب انا جايبة السنة اللى فاتت 98% و كملت علمى علوم كنوع من التقدير لاهلى .. كل اللى عملوه عشانى كانوا عايزينى ادخل طب زيهم او حتى صيدلة برغم انى كان نفسى فى هندسة و اكيد طبعا كنت بحب الفيزياء جدا و بحب احل المسائل الصعبة و من غير مبالغة كنت من اشطر الناس فى الفيزياء بس الامتحان ده جابلى ذهول لانى حليت امتحانات ثانوية عامة من 95 لحد 2007 و مشفتش امتحان كدة و كل الصويت بقى اللى حوليا و كدة انا الحمد لله حليت كتير كويس بس لبخت و سبت حاجات سهلة كنت اصلا عارفاها لانى فقدت اعصابى و زى ما قلت اعدت اضحك.
و انا شايفة بق انهم بيعملوا كدة عشان حاجتين اولها انهم يملوا الجامعة باللى ليهم قرايب فى الحكومة و احنا ندخل خاص ولا نولع (طب ما يعملوا لهم جامعة كدة تلمهم كلهم انشاللا يدخلوا كلهم طب بس ما يظلموناش بالشكل ده) و ثانيها انهم يشغلوا الناس عن البنزين و الحديد و الاكل اللى بيغلوا كل يوم دا بدل ما يجيبو امتحانات اللى ذاكر يعرف يحلها عشان يخففوا عنهم بعد كل اللى دفعوه و عانوه .

ولا نكتة اننا نعيد الامتحان انا اصلا خلصت و واثقة ان انا لو عيدت حاجة مش هجيب فيها درجة

و طبعا كالعادة تصريحات الاستاذ يسرى الجمل قبل الامتحان:
الامتحان سهل و من كتاب الوزارة و فى مستوى الطالب المتوسط
و تصريحات سعادته بعد الامتحان:
نسبة النجاح فى العينة العشوائية 88% (طبعا ما يقدرش يقول نسبة السقوط 12% ) و اللى فوق ال 90 6% و المقفلين 4% (و طبعا دول اللى معاهم الامتحان ) و سنعمل على توزيع الدرجات طب و هم هيوزعوها على ايه اصلا؟؟؟؟؟؟؟ و انا سمعت ان فى مسائل فى التصحيح اللى كاتب القانون هيمشوهالو و ده برضه ظلم لان فى ناس مكملة المسائل للاخر .

اللى يضحك بأى اكتر انهم يحاولوا يوهمونا ان ورق الامتحان اتسرب فى المانيا هههههههه بجد تدحك لانى لما كنت برا فى مدرسة بريطانية كانت امتحانات ثانوية عامة بتبقى فى المدرسة قبلها بشهر و عمر ما فى امتحان اتسرب مع ان مفيش شمع احمر ولا الحاجات اللى زى قلتها دى

و اخر حاجة تدحك عشان مبقاش دحكت لوحدى افتحوا جرنان بكرة و ياريت يكون الاهرام او الاخبار هتلقيهم كاتبين (بلدنا بتتقدم بينا ) اه عندهم حق هم فعلا بلدهم بتتقدم بيهم و احنا بلدنا بتقع بينا اصل لو مش ملاحظين احنا بلدنا غير بلدهم

معلش انا طولت و دا مش وقت تطويل انا مش عارفة انا ايه اللى خلانى افتكر الفيزياء تانى بعد ما كنت عاهدت نفسى انى اركز فى اللى جاى بس انا كنت بذاكر الاقتصاد و فجأة اتخنأت و عيطت و بجد لما عيطت فرحت اولا فرغت كل حاجة جوايا و ثانيا لانى عرفت ان انا بحس و عندى دم و ثالثا عرفت ان انا فقت من الذهول اللى انا فيه و ادركت ان صيدلة راحت .. ياللا كل اللى يجيبه ربنا كويس معدتش تفرق المهم ان انا اركز فى اللى جاى و لسة المصيبة جاية فى الاحياء -ادعولى .

[dama]

بصره يا بنتي والله
انا كنت طالعه مهيسه من الامتحان جداااااااااااااااا انا وصحبتي
حتي في واحده في الشارع بتقولنا اكيد الامتحان كويس بصينالها كده وقولنالها اه الحمد لله كويس خااااااااااااااااااااالص

انا برده مش فارقه معايا الامتحانات تتسرب دي لاني بقفل ع طول الحمد لله انا جايبه السنه اللي فاتت 98.5
واللي بيسرب عادي كنت بقول ربنا مش هيوفقهم
بس الحمد لله في الفيزيا السنه دي نيلت الدنيا

ده انا حتي قسمت 90علي 30 = 30
ياااااااااااااااااااااااااااه ده انا سعيده بنفسي خالص
بس الحمد لله ع كل شئ ومش هقدر البلاء قبل وقوعه

[SENDRILLA]

اللي انتي قلتيه ده يا اختي
قلناه كتييييييير وعدناه كتير
ومعادش منه فايده
وكل ماااقرااه اقول
اقري توقيعي احسن
في رعاية الله

[C A N D Y]

داما ههه دحكتينى تانى اصلى افتكرت حاجة .. فى الامتحان كان فى ضباط امن فى المدرسة المفروض ان هم بيحافظوا ع النظام بس كانوا هم اللى بيتلعوا الاجابات المهم بعد الامتحان الناس كلها نازلة تعيط و انا بدحك فواحد فيهم قال اما اسأل البنت دى شكلها حلت كويس فقاللى الامتحان اخباره ايه يا بنتى بصيتله كدة شوية و بعدين قلتله زززززززززززززففففففففتتتتتتتتتتت بصوت عالى فقاللى ربنا يوفقكوا يا بنتى و قال لواحد جنبه البنت دى غريبة قوى .. يعنى بعد امتحان الفيزياء ده عايزيننى ابقى عاقلة كمان


سيندريللا
عارفة و الله بس كان لازم اقوله انا كمان عشان ارتاح و ربنا معاكى

[ZOMORDA]

واللة انا فرحتى اكبر ببتاع التعليم وزيرنا حبيبنا بشكرة اوىىىىىىىىىىىىى على اللى عملة فينا

[C A N D Y]

هو احنا لينا بركة غيره

[حسناء يحيى]

ليس كل ما يذاكره المرء يجده.........تاتى الامتحانات بما لا تحتوى الكتب

[حسناء يحيى]

يا مشخلعنا يا مدلعنا

[sabry54]

ححسبنا الله ونعم الوكيل فى واضعى الامتحان والوزير .اللهم ارفع مقتك وغضبك عنا

[RaMoS]

ده مشخلعنا علي الاخر بجد انا فخور بيه
انا دماغي مكنتش في مكانها في اللجنه لدرجه انا قمت افرج اصحابي علي ورقتي وهي فاضيه في اللجنه

وطبعا الضحك ده شيء اساسي
هنعوز ايه اكتر من كدا

تاني حاجه احب اشكرك علي الموضوع الجميل ده لانك بجد عبرتي عن الكلام اللي جوانا
بس للاسف منقدرش نغير حاجه في اللي انتي قولتي عليه زي ما قولتي دي مش بلدنا
بس المصيبه انا رياضه 2 يعني مستقبلي ضاع بنسبه 150%
يلريت الواحد كان وفر الفلوس بتاعت الدروس طول السنتين دول ودخل كليه خاصه من غير وجع دماغ

[C A N D Y]

بس للاسف منقدرش نغير حاجه في اللي انتي قولتي عليه زي ما قولتي دي مش بلدنا
بس المصيبه انا رياضه 2 يعني مستقبلي ضاع بنسبه 150%

ان شاء الله نقدر نغير كتيير .. احنا مش اقل من اللى غيرو كتير قبل كدة
و بعدين اللى مكتوب ليك هتاخده بدام عملت اللى عليك .. انا معدتش فارقة معايا طب من تجارة .. المهم النجاح مش مهم فى اى فرع و انت ان شاء الله ربنا يوفقك و تدخل هندسة

و بعدين متكرهش مصر اكره الناس اللى بوظوها و اولهم رئيسنا المستقبلى جيمى و اكره الناس السلبية اللى واقفة تتفرج بس
انا كنت بفكر نعمل اعتصام بعد الامتحانات قدام وزارة التعليم.. حد معايا؟؟؟؟ ( متخافوش انا بهزر بس ليه لأ ؟؟؟؟؟؟)

[RaMoS]

انا معاكي في اي حاجه ممكن ترجع لنا حقوقنا احنا مينفعش نقف نتفرج كدا الواحد حاسس بالظلم ده اوي
بس العيب في مين في اهالينا انهم ناس شرفاء وعايزنا ننجح بشرف وانهم مش عايزنا ناخد حق غيرنا
ولا علشان ملناش حد غير ربنا في البلد دي
ولا العيب في طلبه الجمهوريه كلهم مش بيفهموا حاجه وولاد الضباط والناس الكبيره في البلد هما المتفوقين ويقولوا الامتحان سهل
انا اللي صعبان عليا اكتر من نفسي اهلي مش قادر اشوف تعبي وتعبهم طول السنه بيضيع كدا بسهوله والنتيجه جامعه خاصه ولسه هيتحملوا مصاريف تانيه اكتر من كدا يبقي حرام عليا انا
بس في الاخر مش قدامي غير اني اقول حسبي الله ونعم الوكيل وفي النهايه ده نصيب

[C A N D Y]

انا اللي صعبان عليا اكتر من نفسي اهلي مش قادر اشوف تعبي وتعبهم طول السنه بيضيع كدا بسهوله والنتيجه جامعه خاصه ولسه هيتحملوا مصاريف تانيه اكتر من كدا يبقي حرام عليا انا

نفس الاحساس مش عارفة ازاى بعد كل اللى عملوه مش هحقق لهم اللى كان كان نفسهم فيه و بعدين لو كان على اد جامعات خاصة كنا قلنا ماشى بس اصلا الشهادة مش معترف بيها و مش بيرضو يشغلو حد بيها
و بعد امتحان الاحصا دا شكلهم عملوا اللى هم عايزينه

حسبى الله و نعم الوكيل

[white horse]

اه عندهم حق هم فعلا بلدهم بتتقدم بيهم و احنا بلدنا بتقع بينا اصل لو مش ملاحظين احنا بلدنا غير بلدهم

لا بجد موضوعك جااااامد بس احنا قولنا كتير أوى .. و لو فكرة الاعتصام دى ماشية .. يبقى انا معاكى على طووول D:

[محمد ابولبن]

والله اهنا ضعنى بس المشكلة بالنسبة لعلمى علوم يعنى حنينة اما بالنسبة لعملى رياضة فضعنى بالثلث فيزياء تفاضل ميكانيكا جبر احصاء
مقدرش اقول الا حسبى الله ونع الوكيل