حبايبى الحلوين اللى داخلين تانية ثانوي يدخلووووو :)

[dandan2000]

السلام عليكم ورحمة الله وبركاته ازيكوا يا كتاكيت لا لا احنا خلاص مابقناش كتاكيت احنا كبار وكمان سنتين ولا تلاتة وحنخش كلية وفيها حيكون هدفنا مش لينا ايوة مش لينا لو اخلصنا نيتنا تكون لاعلاء دين الله ولخدمة الوطن ماكنش حد اتهاون فى عمله واقسم بالله انا كان نفسى اوى اخش طب والله كل هدفى انى انصر دينى لان انا عارفة ان اى واحد فينا يقدر يعمل حاجات كتير اوى ....انا بداية السنة بعد ماخلصت اولى كانت جدتى عايشة معانا وتعبت اول ما بدات دروسى وتوفت وربنا يرحمها كانت عزيزة عليا اوى اوى اوى وشىء صعب لما تلاقى اللى تحبه بيصرخ من الالم وانتا واقف مش عارف تعمل ايه وطبعا رغم كده كنت بذاكر لان كنت حاطة هدفى بس مذاكرتى ماكنتش منظمة وبعدها جت الثورة والاحباطات والقلق ازاى يجيلى نوم وبابا واخويا واقفين يحرسوا العمارة وانا عمالة كل شوية اسمع طلقات نار لا وبيبقى عندى امتحان ...الظروف دى عدت علينا كلنا ومبقاش لينا اى نفس للمذاكرة وحسينا بالضياع بس جيه النصر الحمد لله وكلنا حضنا بعض ....كان فاضل عالامتحان شهرين بالضبط قلت كده بجد مش حقدر احقق حاجة وانا ماكنتش باخد دروس فى كل المواد .....جماعة كل دى كانت مقدمة لموضوعى انا عارفة غريبة شوية بصوا بقى انا مش عاوزاكوا لا تدخلوها طحن ولا تقضوها لعب وترفيه ((خير الامور الوسط )) يا جماعة الانسان بيغلط واكيد لازم لازم فى مواد حتديها حقها ومواد حتركنها شوية ومواد تعد تذاكر فيها يبقى لازم تعمل جدول ....جدول ايه انا يادوبك بمشى على يوم والباقى لا .....ماحنا قلنا حط فى دماغك اعلى هدف لينا كلنا النصر لسيدنا محمد صلى الله عليه وسلم ...نعلى من الاسلام نوريهم ان المسلمين خير امة اخرجت للناس يجى خوارزمى وبن سينا وبن خلدون تانى وفيها ايه

الجدول :1 - تسمى بسم الله وتدعى ربنا يوفقك فيه على اد نيتك
2- ننظم الجدول حسب المواد والدروس (حشرحها )
3-نخلى يوم اجازة خالص او نص و نص لو فيه امتحان مثلا
بسوا يا جماعة دلوقتى فيه نوعين من الجداول
الاولانى : تنويعى (من اختراعى ) يعنى فى اليوم تاخد 4 مواد بس كل مادة ماتزدش عن ساعتين مثلا ((السبت يمشى حسب المواد الكبيرة معنى بردو كيمياء تاخد الساعات الاكبر لان دى اكتر مادة محتاجة تركيز وطويلة كمان يبقى كيمياء ساعتين بعديها راحة بعدين ساعة انجليزى وساعة عربى وساعة رياضة وحاول زى مانا كاتبة مايبقاش مثلا كيمياء وراها عربى لان الاتنين حفظ ))
التانى : تكثيفى ((من اختراعى بردو ) يعنى تاخد تلت مواد والمادة اللى درسها جى هى اللى تبقى محط التركيز بمعنى (( السبت عندى كيمياء يبقى الجمعة والخميس تركيزى كيمياء وتكون 3 ساعات ومعاها ساعة لغة تانية وساعة رياضة ))
احنا قلنا مش عاوزين ناخد حق مادة على حساب تانية بالنسبة للغة طبعا حيبقى عندى اتنين انجليزى وايطالى او فرنسى او المانى طيب يبقى بما ان الاسبوع 7 ايام يبقى فيه 3 ايام لغة تانية .......و4 ايام انجليزى وحسب بقى الدروس ممكن تاخد كل يوم الانجليزى او تاخد يوم كده ويوم كده براحتك يعنى والانجليزى حتاخد 3 ايام منه المنهج و1 القصة ومعاها امتحان على اد ما وصلت فى المنهج حلو كده
العربى نفس الحكاية حسب جدولك اذا كان تنويعى او تركيزى تاخد فرعين منه على اد الساعات يعنى لو ساعتين تاخد نص ونحو لو ساعة تاخد قصة بس وده حالة خاصة لان القصة لازم تقرا الللك بتاع الكاتب كله ودا بياخد وقت يوم تانى ساعة يبقى ادب وحتة بلاغة بردو شوف اللى يريحك المهم تكون واخد الفروع كلها ف نهاية الاسبوع .
الرياضة تاخد مرتين جبر ومرة حساب مثلثات ومرة تفاضل .
اخر حاجة احب اقول تتفرج فى الاخر على اللى عملته وتحمد ربنا ويا ريت تقرا ان شاء الله صفحة من القران والله بريح الواحد اوى وركز ويلاش كل شوية تقوم وتعمل timer الموبايل مثلا ساعة كذا اول ميعمل تيييييييييت يبقى stoppppو تقوم تصلى او تعمل او تشرب وبلاش تحرم نفسك من حاجة وشوف ايه الوقت اللى بتبقى مستريح وعاوز تذاكر سواء بالليل او بالنهار ولو حصل مثلا ملكش نفس تفتح كتاب ولو اليوم كله ما تشدش على نفسك وسيب الكتاب بس يوم الاجازة بتاعك تعوض فيه اليوم اللى راح ده او توزع ساعاته على بقيت الايام وبلاش تحسس نفسك انك نسيت ولا مذكرتش كويس طالما انتا مشيت على خطتك وركزت متخفش وامانة عليكم تدعو لى انا ليسه عندى امل ادخل الطب وادعو لجدتى ربنا يسكنا فسيح جناته والسلام ختام وبالتوفيق يا اخواتى واخوتى