( The risk of dividing Sudan into Egypt P.1 )

[MoHaMeD ELsHeRbEnY]

السلام عليكم ورحمة الله وبركاتة
ازيكم يا جماعة
اخباركم اية
يارب تكونوا بخير
عارف انى وجه جديد عليكم لكنى قديم اوى من زمان
لكن الظروف والانشغالات الكتير اضطرتنى انى ابتعد شوية عن كتابة الموضوعات
اما الان فلم اعد استحمل الابتعاد اكثر من ذلك
فالبداية للى ميعرفنيش احب اعرفكم بنفسى
انا اسمى محمد الشربينى ( اللورد سابقاً )
من مدينة دكرنس . المنصورة
طالب جامعى الفرقة الرابعة كلية اداب جامعة المنصورة
قــــســــم الــــتــــاريــــخ

حبيت النهاردة اتكلم معاكم عن موضوع خطير جداً يعتبر من اهم المواضيع الحيوية الحالية
وعلى الرغم من كدة الاعلام يعتبر مُبتعد عنه تماماً تماماً مع انة اهم من اى شئ بيتناولوة الان

وهى مشكلة تقسيم السودان والاخطار الناتجة عنة بالنسبة لمصر
المشكلة دى فعلاً تسير ازعاجى بشكل غير عادى اقسم بالله من جميع النواحى
بصراحة الموضوع طويل وكبير وخطير جداً فمش صح اننا نتناولة كلة فى موضوع واحد وبناء علية انا هقسمة لمجموعة اجزاء نتناولة كل فترة مع بعض بأذن الله

لو هنبدأ نتكلم عن بعض الاخطار الى اتكلم عنها احمد ابو الغيط سابقاً هنلاقى انها حاجات مزعجة جداً
وطبعاً كلكم عارفين احمد ابو الغيط احد فلول النظام السابق فأكيد فية اخطار كتيرة غير واضحة او غير معلنة فى اتفاقيات سرية وما شابة
المهم نشوف احنا الى معروف ومعلوم لينا ونتكلم مع بعض يمكن نوصل لحل لية لا !

اول خطر تناولة احمد ابو الغيط هو الصراع المسلح بين فصائل الجنوبيين
فطبعاً بعد الانفصال دة متوقع جداً ان تشتعل نار الخلافات بينهم وفية وثائق بتقول ان هناك اسلحة بكميات كبيرة جداً ورهيبة موجودة هناك من قبل اسرائيل
دا مش كدة وبس دا فية هناك تواجد عسكرى اسرائيلى فى الجنوب

( يبقى اول خطر لينا تأمين الحدود الجنوبية للسودان من قبل مصر )


طيب الدكتور سيد فليفل لو حد يسمع عنة كان موجود فى ندوة عندنا فى الكلية وهو استاذ بمعهد الدراسات والبحوث الافريقية
وقال حاجة مهمة اوى قال بما ان اسرئيل زرعت اقدامها فى جنوب السودان
اذاً فالمنطقة دى هتصبح منطقة نفوذ اسرائيلى وهتطالب بأعادة توزيع المياة مرة اخرى وبدل ما كانت الماية متوزعة على بلدين مصر والسودان هتتوزع على تلاتة مصر والشمال والجنوب
وما يزيد الأمر خطورة ما كشفه تقرير حديث لمركز المعلومات واتخاذ القرار التابع لمجلس الوزراء المصري بأن احتياجات مصر من المياه ستفوق مواردها بحلول عام 2017 نظرًا لاستمرار النمو السكاني السريع، حيث تحتاج إلى 86.2 مليار متر مكعب من المياه في حين مواردها لن تتجاوز 71.4 مليار متر مكعب.

دا طبعاً على الحسابات القديمة ان نسبتنا زى ما هيا فما بالكم لما تتقسم كمان مرة !
( ويبقى تانى خطر هو خطر المياة العذبة )

هكتفى بأول خطرين فقط المرة دى عشان نقدر نناقشهم مع بعض
وان شاء الله الجزء التالى سأتناول الحديث فى البداية عن نهر النيل منذ عصر محمد على فى التاريخ

منتظر ارائكم ومناقشتكم معى بأذن الله فى هذا الموضوع الشائك
فى رعاية الله