العداله الاجتمــــــــــاعيه اولا و ثانيا و ثالثــــــــــاً

[mohammed ahmed25]

العدالة الاجتماعية على طريقة وزير المالية
___________________________________________
العدالة الاجتماعية على طريقة وزير المالية «أخيرا انتهت إجراءات معاش الضمان الاجتماعى» قالتها ماجدة ــ التى تساعدنى فى أعمال البيت مرة كل أسبوع ــ كان وجهها متهللا وهى تزف لى الخبر فقد كانت ماجدة تجرى وراء هذا المعاش منذ عدة شهور وبالتحديد بعد الثورة، «رفضوا ضم الولدين التانيين وقالوا المعاش لـ3 أفراد فقط، ومن أول الشهر الجاى هاقبض 165 جنيه، 55 جنيه لكل واحد، زى بعضه نوايه تسند الزير» اكملت ماجدة التى تعول وحدها أسرة مكونة منها واربعة ابناء فى مراحل التعليم المختلفة بعد طلاقها من زوجها الذى كانت تعوله أيضا.
ولو كان الدكتور سمير رضوان وزير المالية يعرف مدى حاجة ماجدة وأمثالها الماسة لمعاش الضمان الاجتماعى لكان أصر على رفع الحد الأدنى لهذا المعاش للمستوى اللائق الذى يوفر أساسيات الحياة لهم ولكن المذهل أن وزير المالية لم يجد أبوابا لترشيد الموازنة سوى مخصصات الفقراء وأصحاب الدخول المحدودة فضحى بكل سهولة بالزيادة الزهيدة لمعاش الضمان الاجتماعى التى كانت تتضمنها النسخة الاولى من الموازنة ليصبح 200 جنيه بدلا من 165 جنيها، لتبقى الموازنة «المعدلة» على الحد الأدنى لمعاش الضمان الاجتماعى دون زيادة، ثم فاجأنا الوزير بنفس السهولة بالعدول عن زيادة الحد الأدنى للمعاش العادى إلى 300 جنيه كما كان مقررا فى الموازنة الاولى ورغم تواضع الزيادة إلا أن نحو 4 ملايين مصرى ممن يحصلون على معاشات تقل عن 300 جنيه كانوا بانتظارها لتحسين احوالهم المعيشية، وتوالت المفاجأت الثقيلة لوزارة المالية فنراها تتراجع ايضا عن زيادة حد الاعفاء الضريبى على الدخول من 9 الاف جنيه حاليا إلى 12 الفا ليوفر الوزير 3 مليارات اخرى للموازنة، وكان يستفيد من هذه الزيادة صغار الموظفين الذين كانوا يراهنون عليها لتحقيق بعض التحسن فى دخولهم، اما اخر هذه المفاجات فهى خفض الحد الادنى للاجور، فرغم الاستياء الشديد الذى اثاره رقم الحد الادنى الذى اعلنته الحكومة وهو 700 جنيه والذى لم يلب طموحات الناس قبل الثورة وبعدها الا ان وزير المالية اعلن فى النسخة المعدلة من الموازنة التى اعتمدها المجلس العسكرى ان الحد الادنى 684 جنيها بانخفاض 16 جنيها عما تم اعلانه فى الموازنة الأولى!!
الشيئ الغريب أن الحكومة التى حرصت على ابقاء الوضع على ما هو عليه للشرائح الفقيرة لم تستجب لمطلب وضع حد أقصى للأجور على الرغم من ان هذا البند قد يسهم فى تغطية جانب من عجز الموازنة، وبعد ذلك كله مازالت الحكومة تتحدث عن العدالة الاجتماعية!!
http://www.shorouknews.com/Columns/Column.aspx?id=505166
__________________________________________________ __________
رغيف العيش هو العدالــــــــــة الاجتمــــــــاعيه
كلنا عارفين رغيف العيش .. رغيف العيش البلدي بتاع الطبونة.. مش الشامي او اللبناني ولا بتكلم عن الفرنسي والكايزر والايطالي … الخ الخ الخ.. اصل في انواع خبز كتير في الدنيا بس انا بتكلم عن رغيف العيش البلدي اللي هو اول ما تسمع كلمة رغيف العيش بييجي في بالك.. ونروح بعيد ليه لو مش عارفة صورته اهي قدامك ومش لوحدة عندك رغيف العيش وعندك ناس بتحارب عشان تحصل عليه.. رغيف العيش بقى رمز… او مجموعة رموز في بعضها .. يعني مجموعة مطالب الطبقة الكادحة والفقراء والغلابة تختصر في كلمة رغيف العيش هم مش طالبين كتير في منهم لما تسالة بيقولك انا عايز رغيف العيش ومنهم بيطلب اشياء اخرى ولو فضلت ماشي معاه حتلاقي وصل بيك للاخر انه عاوز يوفر رغيف العيش لي ولاهلة .. او ممكن تسمع حد يقول مش لاقي تمن رغيف العيش.. او مثلا انا بس عايز رغيف عيش.. ولو حنيجي على المتشردين واطفال الشوارع ممكن تلاقي رغيف العيش دا حلم او صورة جميلة تداعب خيالة في اخر اليوم وتفكرة انة قضى اليوم كلة جعان بيحاول يستعطف دا ويطلب من دا ويشحت من دا عشان يجيب رغيف عيش.. يمكن كان عايز حاجة اكبر مثلا رغيف عيش ويحلي بسميط .. بس فعلا بتيجي ايام كتير تعدي من غير ماحد يعطف عليه ويديلة اي حاجة ..ما تستغربوش .في منهم كتير بيعدي عليه اليوم كلة من غير ما تدخل في بقة لقمة.. يمكن انت بتنظر ليهم على انه مخلوق قذر جرذ شارع كلة امراض وميكروبات كل همك ان تبعدة عنك احسن يلمسك ويوسخك او ينقلك مرض.. او تخاف من عصابة اطفال الشوارع انا لو طلعت فلوس واديت واحد منهم دول زي العصابة حلاقي عشرين واحد اتلم عليا عايزني اديلة هو كمان فلوس .. وفي بعض اوقات مش معاك اي فكة ومش حتمد ايدك وتديلة 5 جنيه حتة وحدة .. دول عالة على المجتمع ولازم نخلص منها بقى انا قرفتوءادي يا سيدي واحد من اطفال الشوارع الي بينغص عيشتك وانت ماشي في الشوارع.. منظرة مقرف ويثير اشمئزازك.. او تصرفاته مافيهاش ايتيكيت.. واسلوبة وهو بيكلمك مش راقي.. انا متعاطفة معاك .. حقيقي انت وجعت قلبي واحزن عليك لانك انسان مريض .. مريض بالكبر والحقارة والتعالي.. مريض فاقد للاحساس بالاخرين وقلبك موجود بس عشان يدق ويضخ دم.. دم!! هو انت عندك دم؟ زي ماعندك قلب بس لضخ الدم دمك دا بس بيغذي انسجتك واعضائك عشان تعيش .. تعيش لنفسك انا ومن بعدي الطوفان . تعيش في وسط الناس والمجتمع والبلد لنفسك بس, اي مطلب يخصك فوق الجميع والي يتعارض مع مصلحتك تحاربة .. انت اللي عالة على المجتمع.. واطفال الشوارع والمشردين والفقراء والغلابة والطبقة الكادحة ضحيتك وضحية امثالك اللي مليتة البلد وركبتة وبقى اسمكم المجتمع.. وكأن البلد دي بتاعتك واي حد تاني مش في الحساب..
رغيف العيش اتكلم ححكيلكة اللي حصل معايا وان ماكانش حصل معاكم يا ريت يحصل بجد.. ابتدى الموضوع عادي قاعده مع صاحبتي من يومين وبتقولي جعانة وعايزة اطلب حاجة من برة بس الفلوس مقصرة شوي..وكان معايا اديتها كملت وجابت وجبة.. والنهاردة كلمتني قالتلي انها راحت الكوافير وعملت فورمة جديدة وصبغت ودفعت 300 جنيه بعد الليلة كلها عند الكوافير.. مش قصة كبيرة او جريمة وانا مش بهاجمها او بنتقدها انا بس خطر على بالي بعض المقارنات.. ”تمن الوجبة ما يقارب 6$.. في كام مليون او كام عيلة دخلها اليومي اقل من 1 $ فقط لا غير” .. والمقارنة التانية ” كلفها عمل فورمة وصبغة لشعرها 300 جنيه والموضوع دا بيتكرر 2-5 مرات في السنة.. وفي ناس بقالها سنين بتحارب عشان تتثبت وترفع مرتباتها من 110 جنيه في الشهر عشان يبقى 300 جينيه” و بس يا سيدي وي ستي هو دا اللي حصل.. اللي حصل اني فكرت ازاي احن عايشين وازاي غيرنا عايش هو مالوش ذنب انة اتولد فقير. وانا ماعملتش حاجة عشان اتولد غنية او مكتفية ماديا وعايشة في مستوى كويس.. انا واللي زيي بتقابلنا مشاكل مادية .. بس هل حصل بات حد مننا جعان؟ ءا ءا عارفة انك ممكن تبقى مكتئب ومالكش نفس تاكل فنمت جعان او الوقت كان متاخر والتلاجة فضيت من الخفايف وانت مكسل تطبخ حاجة.. لكن ماحصلش انك نمت جعان عشان مش لاقي تاكل.. ولا احن ربنا بيحبنا فخلقنا كدا وبيبعتلنا وخلقهم غلابة عشان بيكرهم.. اوعملوا حاجة وحياتهم دي عقابا ليهم وكرها فيهم.. في الفترة الاخيرة انحصرت افكاري في الاكل بس.. مش طفاسة ولا انا وحدة مفجوعه وبفكر في الاكل زي ماخطر في بالك.. الاكل من اهم اساسيات الحياة مش حتعيش من غير اكل.. ببساطة .. اتسممت عليا اللقمة .. في حد مش عارف الكلمتين دول؟ فاكرين الثورة؟ فاكرين عفاف شعيب؟ فاكرين النقد والاحتقار والكره والغضب اللي نزل على دماغها بعد جملتها الشهيرة “احن منهارين”؟؟ انهيارها تلاه شرح عن معاناة قفل المطاعم وماقدرتش تطلب بيدزا وريش وكباب.. وبعدها بشوية لما يقولولها البلد فيها وفيها وفيها قالت لو في مم ” مم يعني اكل” يبقى خلاص .. رغم اني لما سمعتها نزلت عليها بكم هائل من الشتايم ولحد دلوقتي بشتمها وبسخر منها وبحتقرها الا انها قالت حاجة صح.. اهم حاجة المم.. الناس عايزة تاكل. بس مش زي عفاف شعيب.. مش عايزين بيدزا وريش وكباب.. عايزين رغيف العيش.. وانا كلمني رغيف العيش.. بقيت كل ما اجي اكل ابص للاكل وافتكر ازاي قدامي صينية فيها وجبة كاملة وفي ناس بتحلم برغيف العيش؟ ناس شايفة ان لو توفرلها فرصة للعمل او تحسين ظروف العمل ومعيشتهم هي فقط لضمان رغيف العيش ليهم يبقى هم كدا عايشين في عدالة اجتماعية.. ؟؟ انا مش مسكينة ولا عندي ازمة وطالبة تعاطفكم معايا في ازمة سدة النفس الي صابتني وقلة النوم عشان بفكر ازاي انا عايشة وازاي غيري عايش.. عشان كل ما امسك رغيف عيش الاقي بيقولي في غيرك الاف بل وملايين انا منتهى املهم.. كل حديثهم.. ازمتهم.. حلمهم.. شفتي قد ايه انا مهم؟ ناس ماتت وهي بتطالب بيا عايزيني عايزين رغيف عيشما تاكلنيش كدا بسهولة واللي يزيد منك ترمي في الزبالة…. تعبت من القهر الوقاع على الناس وفقر الناس وظلم الناس ومعاناة الناس.. واكتر تعبت وزهقت وقرفت من انانية ناس كل همها نفسها وغافلين عن ملايين.. مش عايزة حل مشكلتي النفسية الي نشات من التفكير في غيري وتانيب الضمير وعقدة الاحساس بالذنب.. عايزة عدالة اجتماعية
اشكال العدالة وتعدد المجتمعات
طول الوقت من وانا صغيرة ومن قبل ما اتولد ومن ساعة ما بدات البشرية وهو في ناس جعانة وفي فقر وظلم ودايما بسمع عن العدالة الاجتماعية بس الحقيقة ما حصليش الشرف وقابلتها انا حتى ما بقيتش اعرف هي مين وشكلها ايه وبتحصل فين .. هي حاجة مبهمة بالنسبالي فانا لا عشتها ولا شفتها ومفهومها مختلف كتير من شخص لشخص او من شريحة لشريحه.. لكن لو حتكلم بابسط صورة او حتكلم بلساني من 20 سنة وانا طفلة .. لو سالتني يعني ايه عدالة اجتماعية.. حفكر شوية اجتماعية من مجتمع وعدالة من عدل يعني ببساطة يبقى في عدل في المجتمع.. بس كدا بمنتهى السهولة.. طب كبرت ولقيت العدل مش موجود والعدالة مش عمياء زي ماكنت فاكراة.. ولقيت المجتمع دا 50 مجتمع في بعض.. طب احن بنتكلم في انهي مجتمع؟ وانا عايزة عدالة لانهي مجتمع؟؟ وايه العدالة الي بطلبها؟؟؟بغض النظر ان البلد عباره عن عدد من المجتمعات مش واحد وانا بكمل كلامي لما اقول المجتمع بقصد بي كل طبقات الشعب وفئاته وشرائحه بدون اي استثناء.. اللي هي في الاصل تشكل المجتمع المصري.. والعدل هو العدل مافيهاش فصال دي.. ما ينفعش اعيش في مكان شايفة في طبقة عايشة في قصور وشايفة طبقة عايشة في الشارع والمصيبة ان في ناس مستكترة عليهم الشارع..ومطلبي الوحيد هو تحقيق العدالة الاجتماعية ودا مطلب مشروع.. ومطلب ملايين من الشعب يمكن الاغلبية .. الا من احب ان اطلق عليهم “سرطان المجتمع” الانانيين الي بيراعوا مصالحهم حلاليف المجتمع وما يهمش اي حاجة تانية او اي حد تاني.. واذا كنت بتسعى لتحقيق اي مطلب او بتفكر في اي شيء في مصلحتك او مصلحة جماعه تنتمي ليها او حزب والموضوع يخصك انت ومن توافقت مصلحتك منهم انت لست الا خلية سرطانية في مجتمعنا.. ايضا اضيف ان كل ما يقتضي فعله لتحقيق العدالة الاجتماعية هو مطلب ضمني وبالتالي مشروع والسعي فيه واجب من اجل ان نعيش في بلد فيها عدالة اجتماعية
http://modawenon.tumblr.com/post/6758089170

[أيمن الوزير]

نحلم بالحد الأدني للأجور وللأسف حتي اللحظة لم يحدد والمرتب لم يتحرك ومازال هناك في الوزراء من يتقاضون الآلاف وحسبي الله ونعم الوكيل

[الميدان]

شالوا رضوان جابوا الببلاوى

وأصحاب المرتبات الخيالية والدخول الأسطورية

هم من يختارون الوزراء وربما يضعون السياسات للوزارات

إذا لاعدالة اجتماعية ولاحريات

إلا على لسان محمود سعد وابراهيم عيسى ويسرى فوده وبلال فضل

دمتم بخير