الرسائل الربانيه

[دموع الروح]

السلام عليكم ورحمة الله وبركاته

في البداية كل سنة وإنتم طيبين ومن ربنا قريبين وعلى خطى سيدنا النبي ماشيين


أول حاجة صلوا على سيد المحبين والمحبوبين وخير العباد الربانيين سيدنا محمد عليه أفضل الصلاة وأتم التسليم


إيه رأيكم نتكلم مع بعض عن حاجة بتحصل لنا كلنا كل يوم في حياتنا ..أحياناً بناخد بالنا وأحياناً انشغالنا بيخلينا مانخدش بالنا منها
الحاجة دي هي


(الرسائل الربانية)



طب أول حاجة عايزين نعرفها يعني إيه الرسائل الربانية ؟

طول ماحنا ماشيين في حياتنا ربنا بيبعت لنا رسائل عن طريق أشخاص، أحداث، مكالمة تليفون ، كلمة من حد من اصدقائنا أو أهلنا،
رسالة ع الموبيل، موقف بنشوفه واحنا ماشيين في الشارع، من كلمة سمعناها في درس حضرناه، من معلومة عرفناها .......

بيكون فيها إيه الرسائل دي؟

بتكون مثلاً في موضوع معين شاغل بالنا أوي وعايزين نحله بالطريقة اللي ترضي ربنا ومش عارفين نوصل لحل فنلاقي (الرسالة الربانية)
من خلال حد يقول لنا كلمة يكون فيها مفتاح حل الموضوع اللي شاغلنا.

بتكون مثلاً في حاجة احنا ناسيينها أو طاعة احنا مقصرين فيها ونلاقي (الرسالة الربانية)
إننا نشوف حد بيعمل الطاعة دي قدامنا أو بيدعونا كمان إننا نعمل الطاعة دي معاه.

بتكون في آية في ورد القرآن بتقرأها تلاقيها بتحل مشكلة كبيرة مكنتش عارف هتحلها ازاي،

كتير امثلة في حياتنا على الرسايل اللي مممكن نكون مش بناخد بالنا إن دي جاية لنا من ربنا عن طريق الناس أو المواقف

تفتكروا ليه بتجي لنا الرسائل دي؟

علشان ربنا رحيم..رؤوف بينا وعليم بحالنا وضعفنا، وعالم إننا ملناش غيره ومن غيره هنضيع في الدنيا دي،
فمن رحمته بينا بيرشدنا ويهدينا للصح بس احنا اللي أحياناً من كتر ماحنا مشغولين في الدنيا واللي فيها مش بناخد بالنا.

اتكلمت كتير ودلوقتي جه دوركم


عايزة اسمع من كل واحد/ة فيكم يحكيلي عن حاجة حصلت له حس فيها بــ (رسالة ربانية) وحس فعلاً إن ربنا بيهديه بيها للطريق الصح
أو بيوجهه للطريق اللي فيه رضاه أو بيفتح له طاقة نور لحاجة معينة.

مستنية أسمع منكم أحلى موقف حصل لكل واحد فينا وحس فيه أوي بقرب ربنا مننا وحبه لنا علشان نكون عباد ربانيين بجد
ونتعلم مع بعض إزاي بجد نشوف ربنا في مواقف حياتنا علشان لمّا نعرفه نحبه
ولمّا نحبه نشوف إيه أحلى حاجة بيحب يشوفها مننا في عبادتنا.. في أخلاقنا..في تعاملاتنا مع بعض ونعملها