أنا مضرب عن الإضراب ومش هأروح يوم 8/10 ده ولن أعمل أى وقفات أو أعتصامات تانى أبدا

[أحمد على فارس]

أولا ده بيان المستقلة وعشان كده أنا مضرب عن أى إضراب أو أى مليونية أو أى إعتصام
اعلنت النقابه المستقله على لسان وكيل النقابه الاستاذ ايمن البيلى البيان الخاص بالمليونيه الثالثه صباح الخميس29-9
واعلن سيادته ان المليونيه الثالثه ستكون السبت 8-1०
وعلى هذا اعلنت حركه شباب المعلمين القيام باعمال تامين المليونيه وانشاء وحده طبيه لعلاج معلمى المليونيه وانشاء منصه واحده ليتجمع حوله المعلمون بدلا من عده منصات كانت موجوده فى المليونيه الاخيره والتى ادت لتشتيت اراء المعلمين
واعلنت الحركه على لسان النقابه عدم استمرار الاضراب حتى يوم المليونيه حرصا على تعليم ابنائنا مشدده على اهميه اعطاء الطلاب حقهم فى الشرح وفى حقهم فى شرح الدروس المتاخره نتيجه الاضرابات السابقه التى اعاقت سير العمليه التعليميه للطلاب
وعلى هذا اعلنت النقابه المستقله البيان وسط ترحيب شديد من المعلمين الذين ابدوا استعدادهم للمشاركه بفاعليه كبيره عن المليونيه السابقه هذا وقد اعلنت حركات المعلمين على الفيس بوك تضامنها مع البيان مؤكدين على وحدتهم واستمرارهم فى اعمالهم بالمدارس حتى يوم المليونيه القادمه

كتب محمد وفائى

لى تعليق على البيان
أولا الباين بيقول على الأستاذ أيمن أعلن سيادته أحنا هنبدأ نسيد بعض يبقى خربت والحمد لله طالما فيه أسياد يبقى الباقى عبيد يبقى باظت
وبعدين البيان بيقول حرصا على تعليم أبنائنا يعنى بيدين نفسه بنفسه وبيدنا فى الإضراب اللى علمه المعلمين وبعدين مقلش البيان المليونية دى عشان إيه بالظبط
عشان كل ده أنا مش هأروح المليونية دى ولا أى مليونية تانية وأحسن حاجة أعملها أخلى العيال اللى عندى فى المدرسة يخدوا عندى دروس خصوصية وهأعملهم تخفيض عن سعر السوق عشان أشجعهم ييجوا عندى وبكده أحصل ال200% وجايز أكتر واللى معرفتش أخده من الحكومة يبقى أخده من الأهالى وبكده بدل أولياء الأمور كانوا بييجوا يتخانقوا معايا فى المدرسة هييجوا أوضة الدرس يدفعوا وهما مبسوطين وفرحانين وبيشكرونى كمان
وكل واحد يلعبها مع نفسه ويشوف مصلحته بقى

[العربى446]

اخى احمد مش عارف اقول لك ايه طبعا انت عارف رأى فى الاضرابات وكتر المليونات لكن انا حاسس بروح الياس والاحباط وانا اقولك وصدقنى ان بكره سوف يكون افضل من النهارده وعندنا امل ياتى اليوم اللى نجد الدوله تهتم بالتعليم والصحة لانهم هما السبيل الوحيد للرقى

[محمود ال الشيخ]

يمكن الراجل كتب كلمة ( سيادته ) من باب الاحترام

باين الوضع اللى فيه المعلمين جعل الكل يخبط فى بعضه

يا مغيث اغثنا يا رب

[خالد البطل]

لقد دبت روح اليأس في المعلمين اليأس من الإصلاح ومن نيل الحقوق اليأس من مشاركة باقي المعلمين بفاعلية وعندهم حق لم أجد أثر لما فعلناه لم أجد إلا الإهمااااااال من الجميع وكأن هؤلاء المتظاهرين والمضربين لاقيمة لهم في المجتمع . وان سائقي الأتوبيس أهم منهم وكذلك رجال الشرطة وعمال البنوك وموظفي البريد والمحليات وعمال النظافة . إن الثورة للأسف الشديد لما تصل إلى عقول السادة المسئولين في بلدنا الثورة موجودة في عقول وأحلام شبابنا فقط

[أحمد على فارس]

أصل أنا بصراحة حاسس إنى أنا مخدوع وكل الناس بتضحك على وبيعلموا صفقات على قفايا
الحكومة بتلعب بيا والإخوان بيعملوا صفقة على حسابى والنقابة العامة دى من زمان وهى مع الحكومة والنقابة المستقلة بتعمل صفقة مع الحكومة واولياء الأمور متحدين مع الوزارة ضدى القنوات الفضائية بتشتم فينا المشايخ فى خطب الجمعة بيشتموا فينا
يبقى لازم أنا كمان أعمل صفقة مع نفسى لصالح نفسى
أدى دروس خصوصية على قد ما أقدر
مش لازم أدى بخمسين وستين جينه هأدى الدرس بعشرة جنيه فى الشهر وأضارب فى بورصة الدروس بتخفيض السعر للحد الأدنى وأشتغل وأمشى نفسى بدل ما أستنى حد ينصفنى مش هلاقى
إن شاالله أعمل للعيال فى المدرسة دادة لغاية أما أديهم درس وبعد كده لما أتشهر أرفع السعر شوية شوية وتبقى دى صفقة العمر والشغل الصح