الوزارة تجيب فلوس للمدرسين منين

[مسلمة22]

السلام عليكم


المدرسين كل همهم زيادة المرتبات و مش بيفكروا هو الحكومة حتجيب منين مرتبات و التعليم ده مؤسسة خدمية لا تنتج شيئا ، الحكومة عندها 17 مليون طالب مش بيدخلوا جنيه واحد لخزينة الدولة


يعني الواحد لو مربي 17 بهيمة مش 17 مليون رجل و امرأة و طفل ، لو مربي 17 بهيمة حيستفيد منهم


طيب و عشاد الدولة تجيب فلوس زيادة للمدرسين تعمل ايه تفرض ضرائب علي بقية الشعب ، ليه يعني ده كله ما كل واحد يتعلم علي قد الفلوس اللي معاه ده لو اعتبرنا ان الوزارة بتقدم تعليم


ما تختصر الدولة في المناهج دي كلها و في عدد سنوات التعليم و في عدد المدرسين اللي بتعينهم


لو الحكومة بس سمحت بحاجة واحدة ان متقديش الطالب بنسبة الحضور ، اكتر من نص الطلاب حيتعلموا في بيوتهم و كدة حنوفر علي الدولة تعيينات جديدة و نقلل الجهاز الحكومي المتضخم ده



يعني المدرسين عايزين ايه عايزين الدولة تفرض ضرايب علي الناس ، ليه بقي عشان ييجي مدرس في بلد في وسط الغيطان و الترع و يعلم الواد فرنساوي عشان يفرح بكلمتين حفظهم ، ولا عشان المدرس يعلم الواد ازاي تعمل ميزانية لشركة رأسمالها 10 مليون جنيه و الواد اصلا شغال بعد الضهر في محل بيع طعمية



ايها المدرس لازم تعرف انك مش بتاخد فلوس مقابل التعليم ، و اديك شايف الاجيال الجديدة اخلاقها عاملة ازاي ، انت بتاخد فلوس عشان حبس الطالب و قهره و تعذيبه و بس ، فخلاص كفاياك اللي بتاخده


و بعدين اصلا الحكومة بتعتبر ان المرتب ده حصة المواطن من المال العام فكويس انك بتاخد الفلوس دي ، غيرك اللي مش موظف في الدولة مش بياخد حاجة


طبعا معلش في مدرسين بيتعبوا و طالع عنيهم بس معلش هي النظام من اوله لأخره غلط ، و في مدرسين شغلهم قليل جدا وده الاغلب ، فدول بياخدوا مرتبات دول


ربنا يولي امورنا من يحكم بالعدل


يا اخواني اقسم بالله مفيش اصلاح لأحوال المدرس الا اذا اصلحت احوال الطالب


لازم المدرسين قبل ما يدوروا علي حقهم دوروا علي حق الطالب ساعتها حتاخد حقك من غير ما تطلبه