مذاهب الطلبة في المذاكرة

[karimadel7]

الموضوع باين من عنوانه طبعا
انا من حكم خبرتي في الثانوية العامة -سنة ونص - هحاول اتكلم عن طرق الطلبة المختلفة في المذاكرة
طبعا نوعية الطلبة اللي بتكلم عنها هي الطلبة اللي بتذاكر و عايزه تجيب مجموع كويس

اولا:طريقة الحفظ
اشهر طريقة في الثانوية العامة بين الطلبة اللي بتذاكر خصوصا البنات -علي اساس ان اغلب الولاد مبيعرفوش يقعدوا علي الكتاب كتير
الطريقة ديه بتطبق مثل تعليمي مشهور اوي في مصر اللي هو "احفظ زي الجاموسة تعدي زي الناموسة "
بصراحة النظام التعليمي في مصر يساعد علي كده سواء بسبب طريقة التعليم نفسه او طريقة وضع الامتحان
و انت لو هتطبق الطريقة ديه و نجحت في تطبيقها بحذافيرها هتنجح في انك تجيب مجموع حلو و تدخل الكلية اللي انت عاوزها و لو الامتحانات جت سهلة ممكن تبقي من الاوائل كمان لانك اللي انت حفظه هتلاقيه في وشك
بس طبعا ديه ليها عيوب كتير منها مثلا ان السنتين بتوعك هيبقوا جحيم و هتبقي من الدرس للكتاب و من الكتاب للدرس و لو الامتحانات جت صعبة او لفة شويه انت اول واحد هتطلع تعيط من اللجنة ممكن تجيب مجموع كويس بس اكيد مش هيكون اللي انت حطه في دماغك لانك بتكون بذلت مجهود خيالي


ثانيا:الاعتماد علي الفهم فقط
العنوان ممكن يخليك تحس بالاعجاب كده و تقول " يااااااااااااااه انا عايز ابقي من العباقرة دول ايوه كده هو فيه احسن من الفهم و انا احفظ ليه ما اشغل دماغي احسن"
للاسف دول اكتر ناس بيدفعوا التمن في الثانوية العامة لسببين الاول انك في نظام التعليم المصري ثانيا ان الطريقة ديه بصفة عامة مش صح, و بتقابلهم مشاكل في اي نوع من الامتحانات مثلا لو جت سهلة هما مبيبقوش مذاكرين كويس اوي فبيخسروا درجات في حين ان اخوانهم الحفيظة بيبقوا شبه مقفلين و في الصعب بالرغم انهم ممكن يحلوا الاسئلة الصعبة الا انهم برضه الاسئلة الروتنية مبتبقاش ماشية كويس اوي معاهم فبيخسروا درجات كتير و بيضيع ده من الوقت في محاولة لتذكر الحاجات اللي مش ثابتة في الدماغ
اجمالا دول كانوا ممكن يعملوا نتائج كبيرة اوي في الثانوي و مجاميع قوية جدا بس لو كانوا اضافوا التغييرات البسيطة اللي هقولها في الطريقة التالته


ثالثا:المزج بين الحفظ و الفهم
لو حبينا نوضح قصدي اكتر يبقي انك لازم تفهم كويس الكلام اللي انت واخده حتي الادب بتاع العربي
انا عارف طبعا انكم بتضحكوا عليا دلوقتي و يمكن فيه اللي وقع تحت الكيبورد
بس انا بتكلم بجد اه الادب بيتفهم لان لو لاحظت هتلاقي انه كلام له معني _اه و الله _ يمكن ناس كتير ماخدتش بالها من ده قبل كده بس حاول تفهم الكلام و معناه و بعد كده ذاكره هتلاقي انه بياخد منك اقل من نص الوقت اللي بتحتاجه لو قعدت تحفظ كده و خلاص مواد زي الكيميا مثلا ايه اللي يخليك تحفظ المعادلة كده و خلاص ما تفهم ايه اللي حصل فيها هتلاقيك بتتوقع المعادلة لوحدك , معادلات العضوية مثلا انا عمري ما حفظتها لان كلها بتتفهم و ليها طريقة معينة بتمشي عليها ,هي الناس بتخاف من الفيزيا ليه ؟؟؟؟؟ عشان بيحاولوا يحفظوها مش يفهموها
انا ليا قرايبي في الثانوية البريطانية و منهج الكيميا بتاعهم ميختلفش كتير عن بتاعنا و بيسالوني كتير في حاجات انا اخدتها و بجاوبهم بس الفرق انهم بيتعلموا ازاي يفكروا مش يحفظوا ليه انت متحاولش تبقي زيهم ؟؟؟ تفهم المعلومة و بعد كده تحفظها بسهولة
اولا الاسلوب ده مفيد في جميع انواع الامتحانات في السهل انت هتحل كله بمنتهي الثقة لانك مذاكر كويس ولو صعب حتلاقي نفسك بتخلص السهل بسرعة و ثقة و تفكر في الصعب اللي باذن الله هتغرف تحله لانك عودت نفسك تفكر و لانك فاهم اللي انت مذاكره فبيبقي عندك مرونة في حل الاسئلة


ارجو ان الموضوع يكون عجبكم
شاركونا بارائكم