داخل ثالثة ثانوى ( علمى رياضة ) ... و محتاج مساعدة

[Mistakable]

السلام عليكم

اولا كل سنة وانتم طيبين وان شاء الله سنة كويسة علينا كلنا سواء اللى فى ثانوى او اللى خلصو

ندخل بقا فى الموضوع, دلوقتى انا داخل ثالثة ثانوى وواخد علمى رياضة ان شاء الله, وطبعا مفيش عدد طلبة ومعرفش مدرسين كويسين مع العلم انى اختارت المدرسين فى سنة تانية اسوء اختيار لان المدرسين الكويسين مكانوش مهتمين بالطلبة بتوع السنة الفراغية عشان قليلين
المهم انا دلوقتى مش عايز اتأخر فى المنهج والمفروض انى اقفل المواد اللى عليها 50 درجة عشان الحق هندسة ان شاء الله, وكنت عايز اسئل شوية اسئلة كدة للى كانو فى سنة ثالثة واستفيد من خبرتهم
ومعليش اذا كنت حاطول عليكم

1- المادة الادبية انا كنت مختار اقتصاد واحصاء بس حاغير علم نفس لانى شفت ناس كتير بتقول انه الاحسن وكمان لاحظت ان الاوائل على مستوى الجمهورية معظمهم كانو واخدين المادة دى كــ مادة ادبية

2- اية الكتب الخارجية اللى حتساعدنى ومش حتضيع وقتى فى حاجات مش بتيجى فى الامتحانات وخارج المنهج بالنسبة لكل المواد وخصوصا الفيزياء والرياضة 2 مع العلم انى حاركز بنسبة 100% على كتاب المدرسة ودليل التقويم بس انا حاخد الكتب الخارجية كمساعدة

3- بالنسبة لمادة الفيزياء و الرياضة 2 ... طبعا دول اصعب مادتين فى السنة عندى بالنسبة للمواد الباقية عشان كدة عايز اعرف اية الخطوات اللى امشى عليها عشان اجيب فيهم 50 / 50 ان شاء الله

4- بالنسبة لمادة المستوى الرفيع... انا ان شاء الله حاخد الانجليزى بس مش عارف اى حاجة عن نظام المستوى الرفيع والمادة دى بتتاخد من اول السنة ولا من امتى ؟

وعلى فكرة انا من المهندسين ولو فية ناس واخداها جد وعايزة تجيب مجموع بغض النظر عن السنة الفراغية وتنسيقها, ممكن ونساعد بعض ونشجع بعض لان السنة دى معتقدش ان فية ناس كتير حتكمل علمى حتى اللى كانوا فى تانية علمى

مستنى ردودكم