شيء مستفز

[الدائمة الحزن]

النهارده الصبح كان عندي مشوار .. رحت وبعد معاناه كبيره
علي بال ما قدرت الحق علبة سردين _ اتوبيس بس بالمصري _
ركبت
طبعا عارفين كلكم الله يباركلهم المسئولين موفرين لنا اتوبيسات
مش مكيفه خايفين علينا طبعا علشان لما ننزل في الشارع مناخدش برد
_صحتنا مهمه ياجماعه محدش يزعل _
المهم لما ركبت الحمد لله لقيت كرسي فاضي _مفاجاه ,مش كده؟_
شويه ولقيت الناس بقه اللي دخلت وقفت_ طبعا الاتوبيس اتحول لعلبة السردين
وبقي شبيه بيها تماما ,علشان محدش يقول اننا بنتجني عليهم _
ناهيكم بقه عن الشباب والبنات الواقفين واللي بيحصل طبعا مع المطبات الصناعيه
والولاد اللي قاعده وسايبه البنات واقفه في وسط الشباب _ماعلينا _

تصوروا معايا بقه ان كل اللي فات ده ما استفزنيش في حاجه... اه والله
ما تستغربوش _ ما كلنا اتعودنا عالمنظر ده _
اللي استفزني حاجه تانيه خالص _قصدي سادسه او سابعه _
انا كنت قاعده تقريبا في اول الاتوبيس
ومن التلت الاخير من الاتوبيس برغم الزحمه والمطبات وصوت الناس العالي
والتكييف اللي مبيشتغلش و......و........و.......الخ
كانت بترن ضحكات في ودني وكأن صاحبتها قاعده فوق راسي وبتضحك
في حياتي شفت كتير صوت عالي وضحك عالي
لكن كده..عمري ما شفت
البنت كانت بتضحك بمعدل ضحكه لكل 30 ثانيه_ شيء بشع _
اللي يغيظ بقه ان الضحكه كانت بتيجي من وسط زحمه وصوت عالي ومع ذلك عاليه
تخيلوا لو كان الجو هادي ومفيش زحمه ولا ناس واقفه ولا موتور الاتوبيس اللي اشتكي
كان الصوت هيكون عامل ازاي ؟؟؟؟

طيب تفتكروا ايه السبب ؟ صوتها ده وضحكها المتكرر مع ان صوت البنات اللي كانت بتكلمهم
مكانش عالي زيها هو كان عالي بس مش مستففز
وماسمعتش ضحكات خالص غير هي بس اللي كانت بتضحك كده
اكيد كانوا بيضحكوا بس في العادي مسمعتهمش _يعني اصحابها اهو مش كده_
هو البيت والتربيه ؟ ولا ايه ؟
انا مش لاقيه سبب تاني
ياريت تشاركوني بأرائكم وتجاوبوني علي سؤالي
وطبعا متنسوش ان مشكلة المواصلات بقت بايته
بس هقبل ارائكم فيها برده