وتهنا فى محطة مترو !!

[LA STELLA]

السلام عليكم ورحمة الله وبركاته

=================


الحكاية بكل بساطة ،،، انه فى يوم من الايام وقد كان هذا اليوم هو يوم امس الاربعاء ،،
المستر اللى بيدينا فيزياء طلب منا نروح له الدرس فى المرج !! ( ساعات بيعملها معانا وينططنا فى المواصلات ) لدرجة ان وانا و زميلاتى مروحين بنبقى بنقول : المستر فسحنا من كتر اللف يعنى ،، بنروح بمواصلة وبنرجع بغيرها


اللى حصل لنا يوم الاربعاء انى خرجت مع ايمان "زميلتى " عشان نروح المرج ،، فقررنا ولاول مرة نروحها بالمترو ،، جربنا قبل كدة مرتين نركب من المرج لكن مجربناش ننزل فيها ،، وهنا كانت المشكلة !!

طبعا محطة زى محطة عزبة النخل وزيها زى معظم المحطات بندخل ونعدى من الماكينات ع نفس مستوى سطح الارض ،، السلالم اللى موجودة هناك عشان نحول من اتجاه المرج لحلوان والعكس




وعدينا وركبنا المترو ،،،
والمترو مشى بينا
بس بسم الله ماشاء الله كان بيمشى خطوة ويقف 2 ،، وزى ما قلت دى اول مرة هننزل فى محطة هى اول الخط ودا كان المشكلة



جه المترو بقى قبل المحطة بشوية ووقف خالص
مش دقيقة ولا 2
وقف له كدة 6 او 7 دقايق ساعتها
مننا من نطق الشهادتين ، وايمان تقول لى احنا كدة نبقى متنا شهداء عشان فى سبيل العلم :D
(افتكرنا قطر الصعيد ) ههههههههههه
وكنا مستغربين الهدووووووء الفظيع اللى كانت فيه بقية السيدات
بس انا كنت مذهولة جدا بس لان المترو صمت خالص خالص ومحدش نبه او قال انه فيه عطل او حريقة او اى حاجة "اتارى ان دا طبيعى اصلا "
واخيرا المترو اتحرك ودخل المحطة ، وهللنا وقلنا : هييييييييييييييييييييييه



بعد كدة بقى لما رجعنا اخر النهار ،، وحكينا للمستر اللى بيدينا عربى ، قال لنا ان دا طبيعى وان المترو بيستنى على ما رصيف يفضى له ( حسسنى انه موقف ميكروباص الصراحة ) عشان فى المرج مافيش ارصفة كتير " ودى بقى مش فاهماها ومااهتمتش "



واخيرا وليس اخرا نزلنا فى المحطة المذكورة اعلاه

محطة زى المرج بقى عشان ندخل لها او نخرج منها بنطلع سلالم للماكينات لان الماكينات فوق مستوى سطح الارض ،، عاملة كدة زى محطتى غمرة و السيدة زينب ،، على ما اعتقد ومش متأكدة


نزلنا ،، لقينا سلم قدامنا ،، الطبيعى يعنى ان احنا هنطلعه عشان نخرج بقى من المحطة


طلعنا السلم دا ،، وكانت كل الناس نازلة ومحدش بيطلع غيرنا احنا بس ( ودا عرفنا سببه بعدين بردو )
وكان فيه كم غير عادى من الناس نازلين طبعا


طلعنا ووصلنا لمكان الماكينات ،، طبعا الماكينة اللى ظاهرة لنا من ناحيتنا علامة السهم دى اللى بنعدى منها اما اللى ظاهرة علامة اللى هى دايرة كدة وفيها خط فى النص دى عشان بتوع الناحية التانية واتصدمنا لما لقينا كل الماكينات نفس نظام الحالة التانية دى


قلنا اما نسأل حد ونقول له : عاوزين نخرج؟ نعدى ازاى؟
فلقينا بنت هتعدى فقالت لها زميلتى : لو سمحتى يا انسة ،، احنا عاوزين نخرج .. نخرج ازاااى؟
ردت علينا وقالت : لا ماهو انتم هتنزلوا وتطلعوا سلم تانى ،،، ومشيت وسابتنا
احنا طبعا مفهمناش ومستغربين ،، سلم تانى ايه بس !!!!



قعدنا نلف شوية فى المحطة من فوق كدة ولقينا بنت تانية سألناها وقالت لنا نفس الكلام بس بشوية تفسير

سلم تانى ؟؟!!! فين دا بس


قالت لنا : طب ثوانى هعدى وهوريهولكم

عدت من الماكينة ونزلت معانا السلم
وواحنا نازلين كنت بقول لزميلتى : عشنا وشفنا بقينا تايهين جوا محطة مترو وبنمشى نسأل الناس هو سلم الخروج منين !!!!!
"حاجة تكسف"


نزلنا من السلم والبنت شاورت لنا وفهمتنا انه فيه سلم للدخول وسلم للخروج ،، فين بقى سلم الخروج دا !!

كان بعيد شويتين صغننين عن السلم دا ( اهى المحطة كلها سلالم اصلا )
شاورت لنا ع لافتة مكتوب عليها " خروج exit "
وقالت لنا ان السلم التانى عندها هناك كدة فشكرناها ومشينا ناحية السلم الموصوف منها دا


وصلنا للسلم دا ولقيناه فاااااااااااااااااااااااااااااااضى خالص

وطلعنا والحمدلله خرجنا من المحطة !!!! طبعا بعد اما ضاع فيها حبة وقت غير عادى طالعين نازلين السلالم بصراحة



__________________________________________________ ________
بصراحة موقف عبيط اوى ،، ورخم جدا ،، ومكانش المفروض يحصل ،، بس ساعات بتحصل حاجات ومواقف من النوع دا مع اللى رايح مكان لاول مرة او بيزور حتة او بيجرب حاجة لاول مرة وخصوصا لما تكون الحاجة دى معندوش علم مسبق بيها !!


بصراحة يعنى احنا بعدها كنا بنضحك ع نفسنا ومن اللى حصل لنا ،، ان الواحد يتحط فى الموقف نفسه دى كانت عاملة زى المغامرة لينا ،،


اكيد يعنى انتم كمان حصلت مواقف مش شرط مشابهة او قريبة بس ممكن يكون دا فكركم بيها ،،



______________________
عموما يعنى الموقف دا فكرنى ساعتها بموقف تانى حصل لنا فى الزمالك
لقينا عسكرى واقف المفروض يعنى ان اللى تايه بيسأله
فبنقول له : لو سمحت هو فين شارع المرعشلى
رد وقال : لا والله معرفش اصلى مش من هنا

______________________
ملحوظة : اى حد لو شايف مكانه مش هنا يبقى ينقله لقسم مناسب لان بصراحة انا حاسة ان فى بعض اقسام المنتدى محتاجة تتنظم بدل التكرار ليها ،، وانا احترت احط دا فين لانه موقف شخصى
والسلام عليكم ورحمة الله وبركاته