انا هتكلم بصراحه

[hope205]

انا لسه مخلصها ثالثه ثانوى وخيارى واقع بين طب بشرى و طب اسنان اولا طب بشرى الجميع ينظر اليها وكانها التفاحه صعبه المنال بسال اختى وهى فى كليه طب بشرى عن الاحسن قالت لى ان سنوات الدراسه كتيره وبعد متخلصى سنوات النيابه ممكن ممتتسبيتيش ده غير ان لازم ازاكر فى الست سنين كويس علشان ا حصل على مكان معقول وانا بصراحه تعبت من المذاكره انا عارفه ان اى كليه عملى محتاجها مذاكره بس مش ست سنين وده غير معامله اولاد الدكاتره الخلاصه ما استفدتش حاجه غير ان طب بشرى عذاب وفى الاخر الماديات مش قد قد انا حسيت ان طلبه طب هنجمعلهم تبرعات لحد 30 سنه بعد مايشتغلوا اما المميزات من وجه نظرى انى زمان كانت بحب العب انى دكتوره وبكشف على الناس وبقولهم انت هتموت بعد شهر يرد المريض بعنى مفيش امل يادكتور وعيط واجيبله مناديل كلاينكس وبعدين فى حكايه الخمسه عين اما طب اسنان اتقلى انه اسهل و ماديا احسن اما المشكله الازليه ان حرام ادخل كليه غير بشرى لو المجموع كبير ان شاء الله غير ان اصحابى هايقولوا احنا فى طب بشرى وانتى لا المهم انا قررت انتحر مع المريض اللى هيموت بعد شهر ومش عارفه اعمل ايه مع العلم انى مش صبوره وبفكر فى الماديات كتير انا اسفه على الاطاله واتمنى انكم تساعدوا اختكم الصغيره

[the matrex]

لنفس الأسباب أخترت طب أسنان

[دراكو مالفوى]

وانا رغم علمى ان صيدلة واسنان احسن من طب
بس تقولى ايه الواحد بيحب المظهرة..وانه يتقال عليه دكتوووووور وخلاص

[MoHammed Youssef]

شعب يحب المظاهر والكلام
هتفرح لما يتقال عنك دكتور مثلا

[دراكو مالفوى]

المشاركة الأصلية كتبت بواسطة mohammed youssef

شعب يحب المظاهر والكلام
هتفرح لما يتقال عنك دكتور مثلا

وحضرتك اللى داخل طب داخلها علشان هو عايز يبقى دكتور ويتقال عليه دكتور فلان
واللى داخل هندسة علشان عايز يبقى مهندس ويتقال عليه المهندس فلان
واللى داخل شرطة علشان يكون ظابط ويتقاال عليه كذا
وفى الاول والاخر كله علشان الفلوووووس
هو الواحد بيتعلم ليه يعنى؟؟؟
هتقلى بقى ميول وخيول وفلول والكلام ده
اقلك هع هع هع

[hazemhosny]

الموضوع يا اخوانا مش كدا لو فكرنا بعقلنا شوية هنعرف ايه الكلية المناسبة لينا بعيد عن المظاهر وعن اى حاجة اكيد كل واحد نفسه يدخل كلية معينة وبيتعب علشان يدخلها وكل واحد عنده مجموعة اولويات بيحطها بالترتيب ويشوف ايه اكتر حاجة بالنسبة ليه هتبقى كويسة ومناسبة لاولوياته انا عن نفسى لو جالى طب بسرى انا هدخل على طول علشان دا حلمى من زمان وتعبت زى ما كلنا تعبنا علشان احققه لو مجاليش هحزن على كدا المهم ان لازم كل واحد يبقى عنده حلم ويبقى متمسك بيه لاخر لحظة وربنا يوفقنا كلنا

[المؤمن الصغير]

في الثانوية العامة ده كان حلمي وحلم بابا والأسرة إني أدخل طب وربنا كرمني الحمد لله ودخلت طب، طبعاً الصورة مش مثالية زي ما أنا كنت متخيل، لدرجة إني ساعات كنت بتخنق من الكلية ومن المذاكرة لكن ماما سألتني في مرة بعد ما كنت قاعد أشتكيلها من الكلية وإن إحنا آخر ناس بنخلص وأكتر ناس بنتعب قالتلي: لو رجعت تاني للتنسيق كنت هتكتب طب رغبة أولى ولا لأ؟؟ قلتلها: الصراحة كنت هكتب طب برده. عناد يعني!! وكمان حد قال لي: إنك مش هتاخد مكانة اجتماعية ببلاش، بغض النظر عن اقتناعي بوجهة النظر دي أعتقد إن الدافع الأساسي هو وجود ميول للكلية وقبل كل شيء توفيق الله.
آسف على الإطالة.