ياوزير التعليم إنت جديد لسة إوعة تلعب في العداد

[smart4u]

السيد المبجل وزير التعليم الجديد
انت أول ما تمسك تهدد المستضعفين في الأرض
خد بالك انك كدة بتلعب في العداد يا معلم لأن سياستك غير المبشرة
هي نفسها سياسة التهديد للوزراء أيام مبارك
ورغم إني مش من عادتي الخروج علي ولي الأمر عشان ده مخالف للدين
إلا إني بقول لك إنك يا إما مش عارف حال المدرس
ياإما عارف حاله وعامل إنك مش عارف
وأرجع وأقول تاني إن كثير من المدرسين بيشتغلوا بعد الظهر في أعمال لا تليق بهم نظراً لاحتياجهم الشديد للمال والحياة الكريمة اللذين لا يوفرهما لهم بيتهم اللي هو الوزارة
لكن كل لما المعلمين يفكروا في جذب الأنظار لحالهم تهددهم مع إنهم ياعيني غلابة ومش لاقيين
وبتهدد اللي هايشتغل في الدروس مع إنك قد تكون أول من يأتي بالمدرسين الخصوصيين لأولاده
طيب يعملوا إيه المدرسين يا وزيرنا ياللي المفروض تجيب لنا حقنا
ينتحروا عشان ترتاح يعني
افتكر إن الأمر دالوقتي بإيد الشعب واللي الشعب مش عاوزه بيتخلع وبيروح
يعني مش أول ما تيجي تفتح صدرك علي الغلابة وتتشطر عليهم بتصريحين خايبين

وخد يا وزير التعليم بعض أعمال بعض المعلمين بعد الظهر:

1- معلم كان بيشتغل شيال في المحمل بعد الظهر
2- واحد كان بيشتغل في مكتبة بعد الظهر
3- واحد بيشتغل سواق علي عربية سوزوكي بعد المدرسة
4-سمسار
5- واحد فاتح محل قطع غيار موتوسيكلات علي قده صغير في قرية ريفية مش في مدينة
6- كذا واحد بيفرش زى الباعة الجائلين علي الأرض
7- استرجي
8- نقاش
9- بائع موبايلات نص عمر بيشترى ويبيع

مع العلم إن معظم من ذكرت مدارسهم في مناطق مرموقة زى شيراتون المطار ومدينة نصر مكرم عبيد وغيرهم

مش زيك قاعدين علي مكتب وبيقبضوا مبلغ وقدره كل شهر
لكنهم عارفين إن وراهم التزامات أسرية لا يوفرها لهم المرتب الحقير
حان الوقت لأن يكون المعلم أول من يهتم به في الوزارة
حان الوقت أن يكون للمعلم كرامة تصان




أقسم بالله أن كل هؤلاء أعلمهم ورأيتهم بعيني رأسي وحسبنا الله ونعم الوكيل