|
||||||
| اجتماعيات طالب منتدى خاص بالطلاب لتبادل المعارف والحلول للمشكلات التعليمية والمسابقات والألغاز الهادفة |
 |
|
|
أدوات الموضوع | انواع عرض الموضوع |
|
#1
27-03-2009, 12:28 AM
|
|||
|
|||
(((___هام لجميع طلاب الثانوية العامة___)))
السلام عليكم ورحمة الله وبركاته اولا ازيكم عاملين ايه؟ أسأل الله العظيم رب العرش الكريم ان تكونوا فى عافية وستر دلوقتى واحنا ماشيين فى شهر تلاتة وامتحانات الثانوية العامة تبتدى الناس تتكلم عليها لانها زى ما بيسموها فى الصحف (بعبع)او (الشبح) البيت كله بيبذل فيها مجهود أهلك بيصرفوا عليك فيها كتير املين انك مش تخذلهم وانك تكون حاجة كبيرة وانت بتكون غالبا بادىء دروس من شهر 8 يعنى بتذاكر ما يعادل 10 شهور عشان خمس او ستة امتحانات نظرى فمن خبرتنا وتجربتنا فى الموضوع دة نحب ننصح اخوانا واخواتنا بالى يفيدهم الفترة المقبلة وطلب من المشرفين انهم يدمجوا موضوع (هام جدا قبل دخول لجان الثانوية العامة) بالموضوع دة وهو موجود بالركن العام بس هنا حبيت اواكب فيها شوية الى حصل السنة الى فاتت أولا سؤال لكل طالب وطالبة الفترة دى أحسن حاجة اعملها ايه؟ طبعا انتوا عندكوا مواد اساسية (عربى انجليزى) العربى بيقابلك اول سؤال فيه الى هو التعبير ودة كل الى فيها ان المدرس هايقولك كام نصيحة بتمشى عليهم عشان مش تنقص درجات كتير وانا عن نفسى الى عملته فى تانية وتالتة الاتى تقرأ عنوان الموضوع كويس جدا عشان تحدد أفكاره وتعرف هو بيتكلم عن ايه بالظبط بنبدأ بأذن الله بكتابة عنوان الموضوع وبعد كدة على جنب كلمة الافكار وتحتها حوالى 7 او 8 أفكار بس يكونوا منفصلين من غير تكرار بمعنى أصح وتكتب كلمة الموضوع وتبتدى بمشيئة الرحمن بس اهم حاجة خطك يكون كويس وبردة يستحسن انك تسيب الموضوع للاخر ودة الى الغالبية بتعمله اخر السنة وماتخافشى هايتبقى وقت ان شاء الله وعشان تريح المصحح حط الاستشهادات بين علامات ترقيم مناسبة زى "_" عشان تبان للمصحح لانه بيدور عليها وتيجى كدة فى شهر خمسة تحفظلك مجموعة لا بأس بها من ابيات الشعر _مش لازم كتير_المهم انهم ممكن يدخلوا فى مواضيع متعددة وتلتزم بعلامات الترقيم وحاول تحط اساليب نحوية زى اسلوب التعجب (ما أجمل ..أجمل ب)و(كم من ...)وهكذا انا عن نفسى كنت ببدأ الموضوع بأستشهاد وانهيه بأستشهاد أتذكر فى تانية ثانوى ابتديت انا وأقرب واحد ليا بجزء من كلام ابن المقفع وكان من بره الدرس (أبذل لصديقك مالك ودمك) _كل واحد فينا كان فى مدرسه تانية فى الامتحانات_ بكدة ان شاء الله مش هاتقل عن 9 من 10 وتخليك بردة متابع ان كانوا هايجيبوا تعبير وظيفى ولا لا نيجى لسؤال القصة لتانية العمليه بسيطة لانها فعلا قصة جميلة من كاتب اسلوبه جميل وعن شخصية نادرة فعلا فأنت بتحاول تجيب اى شىء يتصل بالاجابة عن السؤال اما تالتة فالسؤال الشهير اذاكر اى جزء اصلها كبيرة اوى؟ ساعتها أقولك لو شفت اى امتحان تلاقى الجزء الثالث لازم يجى (مع العلم انها موضوعة من حوالى تلات سنين يعنى ماكنتشى موجودة فى التسعينات عشان لما تحل اسئلتها فى امتحانات الثانوية العامة) انا عن نفسى كنت مذاكر الجزء الاول بنسبة 98%ونص الجزء التانى وسبت للعربى عشرة ايام كاملين كنت كل يوم باخدلى جزء من القصة ويستحسن انك تذاكر الجزء التالت مع العلم ان الواحد اكتشف انه جزء بسيط مش صعب ولا حاجة اما القراءة والادب فأمرهم سهل والبلاغة تعتمد على الفهم وأهم حاجة هى الاساليب الانشائية والاستفهامية والغرض منها_ يعنى الفرق بين النصح والالتماس والتحذير والرجاء وهكذا _ واساليب القصر والاطناب لازم تكون عارفها كويس النصوص لازم تكون عارف التعليق الى بعد كل درس كويس والى موجود فى الكتاب المدرسى لانه بيركز عليه عشان يعرف مين الى متابعة من مين الى سايبه اما النحو فالتدريب على الامتحانات السابقة هو أهم شىء لان نوعية الاسئلة بتتكرر :::::::::::::::::::::::::::::::::::::::::::::::::: : (فوائد من الامتحانات السابقة) فى امتحان 1995 فى تانية جاب السؤال الاول من أول 8 فصول كما هو معتاد غالبا بس كانت اسئلته فى المعانى صعبة جدا ومتشابهة جدا اما السؤال الى جه من اخر 8 فصول فكانت اسئلة معانيه اسهل شوية من السؤال الى قبليه والوتيرة دى بيمشى عليها فى امتحانات كتير انه بيكون عارف ان الاغلبية مذاكرة اول 8 بس فبيصعب اسئلة المعانى فيها فى امتحان 2006 كان جايب الاختيارى 4 وبعد كدة تختار (الاولى والتانية .التانية والتالتة)ودى صراحة مش أعتقد انها ممكن تيجى تانى بس تخلى بالك كويس لو جه زيه وبردة فى نفس الامتحان الناس متعودة ان السؤال الاجبارى فى النصوص هو الاول فهو جاب السؤال التانى هو الى اجبارى وكانت ضياع درجات لناس كتير من غير أى لازمة فتقرأ عنوان السؤال كويس فى السنة الى فاتت جاب موضوع التعبير لافف شوية او يعنى للى مش مركز يعنى تقريبا عشان كان قريب من كاس الامم الافريقية فوضع المقدمة عن كاس الامم الافريقية وهو كان عاوز فقط روح التعاون فى احدى المجالات الاخرى وبردة للى كتب الموضوع كله عن كأس الامم كانت ضياع درجات على الفاضى فى سنة 2004 جاب المعجم من (استبق) ناس كتير عملوها (سبق) بس تخلى بالك ان غالبا (ا+س+ت)بتكون زيادة للافعال السداسية ولكن مادتها كانت (بقى)وليس (سبق) كل امتحان وبيكون فيه تكات صغيرة بس دة الى انا فاكرة والى شايف انه أهم من غيره :::::::::::::::::::::::::::::::::::::::::::::::::: :::::::::::::::::::::::::::::::: نيجى للمادة التانية وهى الانجليزى أول سؤال بيقابلك المحادثة ودة تكون مدرب عليه وتكون عارف الاجابات والاسئلة الشهيرة بعد كدة المواقف او بيسموها محادثة قصيرة او مين بيكلم مين ودى بتعتمد بردة على حفظ المواقف المعروفة والاشخاص الى بيجوا وبيتكرروا الاختيارى واعادة كتابة الجمل بيعتمد على فهمك للقواعد قطعة الفهم بتعتمد على مقدار قدرة تخمينك وحفظ للكلمات ويستحسن انك تقرأها بهدوء مرتين وتقرا الاسئلة وتقراها للمرة التالتة عشان تعرف تطلع مفتايح الاجابة وتركز فى الاختيارى بتاعها لانه غالبا بيكون رخم شوية (غالبا التانية) لازم يجيب فيها واحدة توقع شوية يعنى من الاخر أعصر مخك شوية فى السؤال دة واهم سؤال بعد كدة هو الموضوع الى بتكتبه لان درجته بتبقى عالية ويستحسن عشان تجيب فيه درجات عالية انك تستخدم كلمات جديدة فيه وممكن لو انت متمكن تجيب حكم فيه زى (العقل السليم فى الجسم السليم) والحاجات الى زى دى وسؤال الترجمة مش بيكون صعب بس أهم حاجة انك اياك تسيب مكان كلمة فاضية وحاول تخمنها على اد ما تقدر اما الترجمة التانية فحاول تستخدم فعل او اى كلمة قريبة من الى مكتوبة بالعربى وان شاء الله تعدى لان درجتها مش كبيرة كدة يبقى اتكلمنا عن اول امتحانين _غالبا بتمتحنهم_ طب والفترة دى أعمل ايه فى العربى والانجليزى؟ طبعا زى اى مادة تحل عليهم وتراجع عليهم بس الاهم فى الانجليزى حفظ الكلمات والجمل الجديدة ودليل التقويم مهم جدا وهاتكلم عليه بعدين ونيجى بقى لاهم مادة فى الثانوية العامة كلها وهى الفيزياء المادة الى الناس بتدخل امتحانها رجليها بتخبط فى بعضها رغم ان امرها هين باذن الله أول حاجة تكون مذاكر كل جزء فيها كويس تخلى بالك من الكلام الى بيكون موجود بين الاقواس فى الكتاب زى (النغمات التوافقية والنغمات المتوافقة)على حسب ذاكرتى وبدأ فى الامتحانات الاخيرة يركز على الحاجات الى بين السطور انا كنت مجمعها على المنتدى هنا السنة الى فاتت صوت مش عارف هى لسة موجودة ولا لا يعنى عشان توفر على نفسك لازم تكون قارىء لكتاب الوزارة ومكمل الحاجات الى انت مش حافظها منه الباب الاول وهو الموجات ودة أمره سهل وطبعا الضوء فصل مهم جدا الباب التانى باب جميل وعاوز تفكير وخاصة قوانين الطفو بس الاهم ان الناس مش بتركز على اللزوجة ومسائلها ومش بتحاول تشوف الجديد فيها ودى كانت احدى غلطاتى السنة الى فاتت الباب التالت الغازات بيعتمد بقدر كبير على الحفظ ودرجاتها بتكون غالبا على التجارب والرسوم البيانية الرابع مهم جدا وهو الكهربية ولازم تكون مذاكر الحث الكهرومغناطيسى كويس وتكون حالل أسئلة الدليل الى عليه الباب الخامس اوعى تقلبه وحاول تسيبله وقت كافى لان غالبا الى بياخدوا دروس بيعدوه على السريع كدة عشان يلحق يدخل فى المراجعة وانت ماشى فى المنهج مش تسيبه خدلك اجزاء منه لانه نظرى ومش صعب بس لان كلامه علمى حديث فبتحس انه خيالى شوية بس هو مش خيالى طب الفترة دى أعمل ايه فى الفيزياء؟ أولا تتابع دليل التقويم مع مدرس بطريقة منتظمة واحسن طريقة انك تراجع الفصل وتحل اسئلة الدليل والكتاب الى عليه وياريت اسئلة كتاب الامتحان وبعد ما تخلص مثلا التلات فصول بتوع الباب الاول تراجع مراجعة شاملة على الباب والباب التانى تعمل نفس النظام وتزود مراجعة وهى مراجعة البابين على بعض انا عن نفسى ابتديت النظام دة من نص تلاتة تقريبا بمعدل ايام السبت والاثنين والاربعاء وخلصت تقريبا على اخر شهر اربعة وشهر خمسة تقعد تركز على الحاجات المميزة وتحل شامل لو قدرت ان شاء الله لانى صراحة حصلت ظروف فعملت معايا دروب فى الفترة الاخيرة بس الحمد لله عدت على خير وطبعا انت تعلم على الاسئلة المميزة لانك مش كل مرة هاتقعد تحل الكتاب كله من أول وجديد طب وفى امتحان الفيزياء هايكون ايه النظام؟ أولا لازم تدخل الامتحان وانت واثق من نفسك ومش ترعب نفسك وانت ماشى بأسئلة جديدة والكلام الفاضى دة ثانيا تكون نايم كويس مش عشان فيزيا تسهر طول الليل تروح الامتحان مش عارف تفرق بين السؤال الاول وسؤال الرسم البيانى ثالثا امتحانك غالبا بيكون قريب اوى من امتحان السودان يعنى السنة الى فاتت لما شفت كلمة كانت تقريبا بتعادل النغمات المتوافقة لو عاوز تروح تشوفها هتلاقيها فى سؤال من الباب الاول فى ما شرط حدوث كل مما يلى لما شفتها قلت للى اعرفهم أكيد هايجيب كلمات غريبة من الكتاب ودة كان اغبى حاجة عملها معانا انه جاب اول كلمة فى الامتحان غريبة فلاقيت اللجنة كل ما ولد تنزله الورقة ينزّل راسه معاها كأنه شاف عفريت على الورقة بس عشان تتفادى كدة زى ما قلتلك لازم تقرأ الكتاب المدرسى وتكمل مذكرتك او ملخصك وغالبا كتاب المثالى مش بسيب حاجة وانا عن نفسى كنت بسيب كل حاجة وبذاكر منه مع العلم ان دة مش وقت تغيير مصدر المذاكرة الى ذاكرت منه كمل منه وبردة عرفنا من امتحان السودان ان فيه حاجة ممكن تيجى اسمها الاولمبياد سبحان الله قريت الاختيارى بتاعها الساعة سبعة الصبح وفهمتهم على السريع لانه مش كان وقت مذاكرة طبعا وكان عددهم تقريبا 29 اختيارى وسيبت المسائل وفكرت فى المسائل عادى اما الاختيارى فأتحل بسرعة جدا فى حين ان كانت فيه ناس قاعدة تفكر فيه وطبعا كان هياخد وقت طويل اوى لانه مسائل وجديدة على الى مش شافها رابعا ما تسمعشى كلام اى حد ان دى مهمة ودى مالهاش لازمة ودة هانقف مع بعض فيها بعدين :::::::::::::::::::::: فوائد من الامتحانات السابقة فى امتحان 2006 كان عاوز اثبات قوة التفريق اللونى للمنشور الثلاثى غالبية الناس كتبت أخر قانونين الى هما بنشيل فيهم جزء من المقام مع البسط ويطلع المطلوب ونقصوا فى السؤال دة لواحده درجتين ودى أهم حاجة تخلى بالك منها فى امتحان الفيزياء انك مش تكتب الاجابات تلغرافات لا حاول تجيب كل شىء يتعلق بالسؤال وبردة تخلى بالك من التعلليل 2-فى سنة 2004 على ما أتذكر انه كان جايب تعليل متعلق باللزوجة وكان حاطط بس على كلمة (اللزوجة) نص الدرجة ودة الى انا بقول عليه فى السؤال الى قبليه ما تحاولشى تكتب أى حاجة ناقصة فى الامتحان 3-ودة اهم حاجة ايه الى انا عن نفسى استفادته من امتحان الفيزيا 2008 _تخلى بالك ان فيه كلام مكتوب عادى كمصطلحات وجنبه معناه بالانجليزى او كلمة مرادفة ليه تخلى بالك من الكلام دة كويس وعلى ما أتذكر انها كانت (الاسبكترومتر)* _ مش تهمل اى سؤال فى الكتاب الى بتحل منه مثال على ذلك اول مسألة قابلتنى فى الامتحان كانت مسألة اللزوجة سبحان الله انا كنت كل ما أحل كتاب المثالى اجى عند اخر مسألتين ومش أحلهم والكلام دة من أول السنة عشان كدة غلطت فيها رغم ان الى عارفها هاتكون بسيطة جدا عليه _أنك فى الاسئلة النظرية لو لاقيت نفسك مش فاهم أوى السؤال فأكتب أى حاجة ممكن تتعلق بالجزئية الى هو طالبها لان ما لا يدرك كله لا يترك كله _أى مسألة تشوفها صعبة أدامك ما تحسسشى نفسك أنك شفت صاعقة ادامك لا أهدى كدة وصلى على رسول الله وبعد كدة بص كويس للمعطيات الى جايبهالك فى المسألة وحاول تحدد أيه أقرب قانون يجمع بين الاشياء دى بس دة تعمله لو كانت يعنى مسألة غريبة الاطوار عليك ودة الى انا عملته فى مسألة الكهربية فى السؤال التانى تقريبا والحمد لله حليتها على بسرعة _مش أول لما تشوف رسمة بيانية جديدة تسيبها لا انت بتعتمد فى الرسم البيانى على أوضح الارقام وبترسم عليها الخط المستقيم مش لازم تحسس نفسك انك بترسم رسم مدنى ولو غلطت فى مللى العمارة هاتقع _حاول تبقى فى الامتحان أهدى ما يمكن لانك هاتشوف حاجات أحيانا ترعبك يعنى انا فى اللجنة سمعت صوت عربية اسعاف فيه ايه؟ واحدة اغمى عليها وعربية تانية فيه أيه تانى واحدة تانية أغمى عليها فأنت عشان تتجنب المظاهر دى خليك بس فى ورقتك واى صوت تسمعه مش تنتبه ليك حط فى دماغك انك ادامك تلات ساعات ان شاء الله هحاول فيهم بقدر امكانى أنى اجيب أعلى درجة ممكن أجيبها ولما تلاقى أعصابك فلتت سيب القلم وأذكر ربنا وأقرأ أى سورة صغيرة وكمل حل وان شاء الله هاتلاقى العملية ماشية كويس _لازم تشوف امتحان السوادن الى بينزل تقريبا فى شهر خمسة عشان تعرف شوية تحدد ملامح امتحانك :::::::::::::::::::::::::::::::::::::::::::::::::: ::::::::: مادة تانية من المواد المهمة جدا وهى الكيمياء الكيميا طبعا معروفة ان العضوية عليها درجة كويسة وسهلة ان شاء الله لازم تكون مذاكرها كويس وباب الكهربية تكون فاهمه اكتر مانت حافظة والباب السادس سهل وبسيط بشوية مثلثات بتعرف قوانينه كويس جدا اما اول خمسة ابواب فسهلة واهمها الرابع والخامس لان فيه ناس بتنساهم بسرعة واهم حاجة فى الكيميا هى دليل التقويم فقط ولا غير لانه ولا مرة جاب مسئلة خارج نطاق مستوى كتاب الوزارة ومسائل الدليل وتحلهم كلهم وخاصة مسائل الباب السادس وماتقولشى على اى حاجة موجودة فى كتاب الوزارة او الدليل انها مش مهمة عشان مش ترجع تندم تانى وتخلى بالك وات بتحل امتحانات الثانوية العامة لازم تعرف ان منهج الكيمياء دة ملغى منه كتير جدا مقارنة بالمنهج القديم فهتلاقى كل كتاب مختلف عن الاخر فى الامتحانات لانه طبعا بيحط مكان الملغى أسئلة من الكتاب نفسه فزى ما قلت اهم حاجة فى الكيمياء دليل التقويم وكتاب الوزارة وتكون طبعا مذاكر المنهج مش داخل سايب منه حاجة نيجى بقى للاحياء الاحياء مادة جميلة جدا للى بيفهمها بس مشكلتها ان فيه حاجات بتدرسها بتكون فيها غلطات وتفضل طول السنة تدرسها عادى واخر السنة بعد ما ظبطت المنهج تلاقى واحد يقولك غلطة من 17 غلطة فى الكتاب المدرسة والكلام الفاضى دة انت ملتزم بالكتاب والى بيصححلك مدرس مش دكتور وغالبا الناس الى فى المنتدى بتكون متابعة الدكتور هشام والدكتور هشام افضل من يمكن متابعته فى الاحياء وهاتضمن معاه التقفيل ان شاء الله او على الاقل 49 دة ان اضربت يعنى الاحياء فيها فصول مهمة فى الدرجات زى التكاثر والاحساس اما الوراثة والدى ان ايه فبيعتمدوا على الفهم مع الحفظ بس الفهم طبعا بنسبة أكبر بكتيير خلاصة الاحياء زى الكيميا كتابة الوزراة ودليل التقويم وتكون عارف كل اجزائها كويس وتكتب اى حاجة ممكن تخص السؤال عشان مش تنقص درجات على الفاضى وحاول فى امتحانها تسرع ايدك شوية لانك مش فى امتحان خط المهم يكون خطك مقروء وفى نفس الوقت كل معلومة مكتوبة لانى افتكر انى كتبت فيها حوالى 22 صفحة يعنى اتبقى من كراسة الاجابة ورقة واحدة فقط مش بقول كدة عشان تخافوا لا عشان تبقى سريع نسبيا فى الحل مش تنام على الاسئلة والى بيتابع الدكتور هشام ما يخافشى من اى حاجة ان شاء الله اما الاقتصاد والاحصاء فهم مادتين سهلين جدا بس مشكلة الناس والى عملت قلق السنة الى فاتت انهم مش حلوا دليل التقويم بتاع الاحصاء بالرغم انه مهم جدا وتبق بردة عامل حسابك ان علمى علوم تقريبا بيكون ادامه يجى اسبوع ادام امتحانها انما علمى رياضة يوم ونص يعنى علمى رياضة يركز على المادة دى الايام دى شوية كدة وهى سهلة ان شاء الله وصراحة امتحان الاحصاء دة الامتحان الوحيد الى فى الثانوية الى اتوترت فيه لانى مش لحقت اراجعه يعنى امتحان الفيزيا حليت الست اسئلة وراجعت أربعة كويس انما الاحصاء كان لافف شوية وانا مش كنت مستعدلة زى بقيت المواد اما رياضة اتنين فبتعتمد انك تكون عارف أكبر قدر ممكن من الافكار وتكون مدرب على كل حاجة يعنى على ما اتذكر كان اصحابى يقولوا مش هانحل سؤال نظرية ذات الحدين أبدا بس انا يوميها استنيت الناس ادام اللجان لاقيت تقريبا كل اصحابى حلو مسئلتها عادى وامتحان السنة الى فااتت يكون مرجع ليك انك تشد فى المادة دى كويس ومش تسيب منها ومش تنشن على اى حاجة وانا عن نفسى اعرف عدد كويس معدى ال45 فى الامتحان الغريب بتاع السنة الى فااتت واهم حاجة تركز فى المعطيات كويس لان مثلا اول غلطة قابلت معظم الطلبة بل والمدرسين انهم مش شايفين (س)فى مسئلة التكامل الى عن طريقها الحل هايتغير عن المعتاد وسيبك من اى حد يقولك الامتحان دة مش يتحل وتعجيز والله كل حاجة كانت بتتحل وفيه ناس بتجيب لان الله لا يضيع أجر من احسن عملا وفرع الميكانيكا تقريبا هو الاكتر فى الدرجات وحاول بقدر امكانك تكون حالل اسئلة كتاب الوزارة فى الفرع دة بالذات اما التاريخ فمكنتش صراحة أعرف ناس فيه كتير بس على معلوماتى الضئيلة انه محتاج حفظ كويس يمكن تقريبا اكتر من اى مادة تانية تقريبا لسة الفلسفة وعلم النفس بس انا مش درستهم صراحة بس غالبا اى مادة يهمك فيها انك مش تكون سايب حاجة فيها على النص وتكون مخلص أكبر قدر من الاسئلة عليهم وياريت لو حد هنا أدبى وكان كويس فيهم يتفضل ينصح اخواته اما الفرنساوى فدى مادة بتعتمد على الكلمات وطبعا اهم سؤال فيها هو الوثيقة لانه 15 درجة كاملين وامتحان الفرنساوى عيبه ان الغلطة فيه بتبقى بدرجة لان الامتحان مش بيكون كبير بس عليه 50 درجة كاملين واهم حاجة فيه انك تحل وثائق كتير وبلاش موضوع التنشين فى الوثائق دة الا لو كان حدث فعلا مهم زى ما حصل فى سنة 98 انه جاب على كاس الامم الافريقية و2006 تقريبا عن نقل تمثال رمسيس كدة تقريبا بفضل الله وحده لا شريك الله اتكلمنا عن كل مادة بقدر معلوماتنا وطبعا طالما كلامى كلام بشرى يبقى يقبل النقض ويقبل الصح والغلط ولو فيه اى حد ادى او اكبر من او من ا لاساتذة عنده تعليق او نصايح تانية يتفضل يكتبها فالمهم هو الاستفادة مش المهم مين الى عمل الموضوع :::::::::::::::::::::::::::::::::::::::::::::::::: :::::::::::::::::::::::: ::::::::::::::::::::::::::::::::::::::::::::::: ::::::::::::::::::::::::::::: ::::::::: ::: نيجى بقى للنصايح العامة 1-قلل من اتصالاتك الى مالهاش لازمة والى بتكتر اوى فى شهرى 4 و5 تلاقى كل شوية واحد يتصل بالتانى انا تعبان انا محبط انا مش قادر .فلوذاكرت هايكون أحسن من الكلام دة بكتير 2-حاول تساعد غيرك بقدر امكانك فى غير ضرر لنفسك فأن الله فى عون العبد ما كان العبد فى عون اخيه غير ان مساعدتك لاخوك او اختك هاترضى ربنا اولا وهتساعدك ان المعلومة تثبت فى دماغك ثانيا وثالثا ودى الاهم ان ربنا يعينك طالما بتعين اخوانك وبلاش مبدأ انى اضيع مجهودى ليه لغيرى او اسهر مثلا طول الليل وفى الاخر اروح اودى لاصحابى الاسئلة المهمة الى شفتها وكأنهم كدة زاكروا احسن منى المبدأ دة تقوله ماشى وانت قاعد فى اللجنة انما طالما انت موجود خارج اللجنة اوعى تبخل عن اى حد بمعلومة انت عارفها وحاول تكون مساعد كبير فى درجات اخواتك يعنى مثلا انا فضلت سهران يوم امتحان الاقتصاد والاحصاء للساعة اتنين على النت عشان أحل لناس معينة شوية اسئلة من دليل التقويم فى الاحصاء والامتحان طبعا بيكون الساعة 9 غير ان الواحد بيصحى الفجر بس الحمد لله زى ما بساعد غيرى ربنا قادر انه يساعدنى اكتر ما مساعدتى لأى حد وتكون حاطط فى دماغك ان مساعدتك لغيرك لله وبس لان لو هتساعده عشانه هو يبقى أنت بتضيع وقتك فأن ما عند الله باق 3-بتيجى كدة من الفترة دى الاشاعات ان مش عارف مين الى هايحط الفيزيا ومين الى هايحط الاحياء دى حاجة اولا مش تهمك خالص لان الى يهمك ان الامتحان يتحط ادامك وتكون فاهم وعارف كل حتة فيه 4-الى يقولك على دة مهمة زود شوية فى التركيز عليها الى يقولك على دى مش مهمة ذاكرها واوعى تسيبها لانه طالما مش هو الى حاطط الامتحان يبقى مش عارف ايه الى جواه ولا يعلم الغيب الا الله 5-سيبك من كلام الجرايد نهائيا فى الفترة دى وان مش عارف ايه الى هايجى منه ودة الى مش هايجى منه انت الى تعمله ان مصدرك الاساسى هو كتاب الوزارة ثم دليل التقويم ثم بقى مصادرك الى بتحل منها بس كتاب الوزارة والدليل هما الاساس لاى مادة 6-كل واحد بيرتاح لكتاب معين عن نفسى وفى رأيى الشخصى افضل كتب الاحياء هو الامتحان و2500 سؤال وافضل كتب الكيميا الامتحان ومندليف وافضل كتب الفيزيا الماسى والامتحان والمثالى وافضل كتب رياضة 2 لامى والمعاصر والممتاز اما العربى والانلجيزى فكان اعتمادى فيهم على المذاكرات حاول يكون ليك كتاب كويس تراجع منه لما تكون فاضى الى هى بمعنى أصح المراجعة السريعة 8-متراكم عليك مفوت كتير يبقى ايه الحل اشد ولا انام؟ اسيطر على مشكلتى ولا أسيبها هى تسيطر عليا؟ اروح للاحسن ولا اميل للاسوء؟ طبعا الاسئلة مجاوبة عن نفسها شد حيلك ادامك وقت كويس وتلحق تجيب فيه كتير مع العلم انى عن نفسى فى تالتة بالذات كانت فيه حاجات بشوفها لاول مرة ايام الامتحانات زى ما بنقول حتى فى الدين طالما ان الروح لم تبلغ الحلقوم فيحق لك ان تتوب اما انت طالما لسة فيك نفس ولسة فيه ولو ساعة واحدة تستغلها احسن ما تهملها وتزود من مشكلتك مثلا قبل الامتحانات بحوالى شهر واحد جالى مرض الجدرى طبعا فضلت اسبوع كامل مش بذاكر لغاية تقريبا يوم 12\5 بس الحمد لله الواحد عوضها فى الفترة الى بعديها وانت وانتى تحطوا فى دماغكم الكلام دة كويس طالما ربنا ادالك عقل يوازى 9 أبراج من الكتب فى ناطحات السحاب يبقى تستخدمه من الاخر Use it or u will lose it 9-حط فى دماغك كويس ان قدرك لابد ان ييصيبك مع العلم ان الله يعلم مستقبلك افضل منى ومنك ومن على وجه الارض جميعا 10-بلاش تمشى وانت رايح اللجنة بورق وتقول اصلى ناسى اصلى مش فاكر اصلى سايب دى فحاول انك فى اليوم دة تنام بدرى شوية وتصلى الفجر و تبص كدة على كام حاجة معينة ولما الساعة تيجى 7.5 تسيب كل حاجة وتنزل كدة بهدوء وانت واثق من نفسك ثانيا ومعتمد على الله أولا لانك حتى لو كنت بتذاكر فى اليوم 4 ساعات بس شوف انت بتذاكر من كام شهر 11-حاول تشرب عصير وانت رايح الامتحان اصل فيه ناس بتجيلهم الحالة قبل الامتحان وتقول مش بعرف اكل او اشرب او اى حاجة دى حالة طبيعية لان الجهاز العصبى الذاتى بيعمل تغيرات فى معدتك وامعائك وكدة فتيجى تاكل حاجة تلاقى بطنك تتقلب وتقعد تجرى كل شوية على الحمام يبقى يستحسن تشرب حاجة وانت ماشى ورايح الامتحان يمكن انا كنت قبل اى امتحان مش اعرف اكل اى حاجة ماعدا الثانوية كانت الامور عادية لان دى اكتر امتحانات فى حياتك بتدخل مذاكر ليها 12-ما تحاولشى تقعد كتير ايام الامتحانات مع الناس المحبطة والكذابة انت تحط فى دماغك لو دة ذاكر فلنفسه ما ذاكرشى بردة لنفسه ما عليك الا النصيحة والمساعدة انما ما تاخدشى (جرعة )احباط من حد 13-أدعى ربنا انه يوفقك واطلب من والديك بالذات انهم يدعولك 14-لو كنت بتذاكر بالليل فدة شىء مش وحش لانى سمعت مرة من الشيخ ابو اسحاق وهو بيشرح حديث ان اعمال الليل تأخذ وقتا اقل مما عليه بالنهار ووقت طبعا ما بعد الفجر الى الضحى يعنى من 5 ل8 بيكون مبارك فيه وبيمر ببطأ عن اى وقت بس المهم انك تيجى من اخر شهر اربعة تبتدى تأجل نومك واحدة بواحدة ساعة كدة بحيث انك قبل شهر ستة تبقى بتنام بكتيرك الساعة 12 وبتصحى الساعة 6 15-خليك اد المسئولية الى عليك واعلم ان اى حاجة انت بتعملها فهى بتفيدك انت اولا واخيرا 16-هتلاقى ناس كتير لما تيجى تاخد قرار انها تبطل ضياع وقت وتذاكر بقى صح يقوموا مجمعين كل الكتب ويرص كل مادة لواحدها ويقعد يعمل فى جدول حوالى ساعتين بس انا شايف انك الافضل لما تقول انا هذاكر تبتدى من اليوم الى انت فيه مش تأجل عشان اليوم دة مش يفضل ماشى معاك لاخر السنة 17-فيه ناس تانية بقى تفضل تسمع اغانى اتخنقت وطلعت كنت بضيع وقت أحسن وافضل ليك انك مثلا تقرأ قراّن أو انك تكون حاطط فى دماغك كويس ان الله قادر على اى شىء 18-تخلى بالك كويس ان الثانوية العامة فعلا هى الحاجة الوحيدة الى مش فيها تعويض لانك مش هاتدقر تعيد سنتين كاملين عشان تدخل كلية معينة انما فى الجامعة فى أحلك الظروف بتقدر تأجل سنة فالمهم ان فيه مجال للتعويض 19_أعرف انك فى الثانوى بالذات مش أنت بس الى بتتعب بل البيت كله بيكون على أعصابه فخليك راجل وأد المسئولية وتخلى بالك انك ممكن تقرأ اى معلومة ولو ليلة الامتحان وتجيلك فمش تستهون بقيمة أى وقت مهما كان قريب من الامتحان 20_اخر نصيحة من كلام الله (وتوكل على الحى الذى لا يموت وسبح بحمده) ومن كلام رسوله صلى الله عليه وسلم (أحفظ الله يحفظك أحفظ الله تجده تجاهك اذا سألت فأسأل الله واذا استعنت فأستعن بالله) :::::::::::::::::::::::::::::::::::::::::::::::::: :::::::::::::::::::::::::::: أرجوا انى اكون وضحت ليكم بقدر امكانى ملامح الفترة الجاية بالنسبة ليكم والى عنده مشكلة فى اى حاجة يبعت ل محمود طه وانا هارد عليها بمشيئة الرحمن وان شاء الله مش هتأخر عنكم فى اى حاجة مادامت بأيدى وأرجوا انكم تعذرونى انى مش متواجد زى السنة الى فاتت لان النت مش عندى وأسئل الله العظيم رب العرش الكريم ان يوفقكم جميعا انه ولى ذلك ومولاه والقادر عليه نسألكم الدعاء بالتوفيق والهداية وجزاكم الله خيرا واسف على الاطالة فى امان الله 
|
|
#2
27-03-2009, 02:32 AM
|
|||
|
|||
|
اقتباس:
طب انا اجيب بابا وماما والمدرسين يقروا الجملة دى ولا اعمل ايه بقى
يلا مش مهم  فعلا مش باعرف اركز ف المذاكرة غير باليل وايام الامتحانات بتكون متشقلبة بالنسبة ليا خلاص هاانت ربنا يسهل شكرا لحضرتك يا دوكتر عالنصايح دى لان ف الوقت ده بنحتاج اى حد يوجهنا او عالاقل نحس باهمية المجهود اللى المفروض نعمله عشان نعرف نكمل جزاك الله كل خير وجعله بميزان حسناتك ان شاء الله شكرا بجد آخر تعديل بواسطة Rien ، 27-03-2009 الساعة 02:36 AM
|
|
#3
27-03-2009, 02:00 PM
|
||||
|
||||
|
دكتور سعيد وفقك الله الي ما يحبه ويرضاه جزاك الله خيرا
|
|
#4
27-03-2009, 02:02 PM
|
|||
|
|||
|
بجد نصائح تحفه
شكرا لحضرتك
__________________
والحب له قوانين آخري..!
|
|
#5
28-03-2009, 09:59 PM
|
||||
|
||||
|
السلام عليكم ورحمة الله وبركاته
اولا احب اشكرك جدا عالموضوع يعنى ماشاء الله ما سبتش حاجة الا واتكلمت عنها اقتباس:
هى اكيد الكلمة كانت موجودة فى القطعه بس يجوز تكون سبق على اساس ان استبق على وزن افتعل اعتبرنى ماقلتش اى حاجة خالص اقتباس:
بسم الله ماشاء الله طيب وبالنسبة للى لسه مابدأش واحنا دلوقتى فى اخر شهر مارس ده يعمل ايه بعون الله ؟؟؟؟؟؟ اقتباس:
معاك حق والله كلها اتصالات تجيب احباط اقتباس:
هى مرة فى امتحان العربى واللى راجعته هو اللى غلطت فيه ومن ساعتها ماكررتهاش عموما جزاك الله كل خير
|
|
#7
29-03-2009, 08:19 PM
|
||||||||
|
||||||||
|
اقتباس:
اقتباس:
ربنا هايسهلها ان شاء الله جزاكى الله خيرا على المرور اقتباس:
اقتباس:
اقتباس:
لسة ما بدأتيش تبتدى عادى خالص طالما فيه وقت ولو كان يوم اقتباس:
العفو وجزاكى الله خيرا اقتباس:
وجزاك مثله يا حبيبى يبقى طمنى عليك اقتباس:
العفو اختى الفاضلة جزاكى الله خيرا
|
|
#8
08-06-2009, 12:24 PM
|
||||
|
||||
 والنعمة انت حتة سكرة يادكتور
|
|
#9
08-06-2009, 06:17 PM
|
||||
|
||||
|
جزاك الله خيرا بس مفيش تلخيص؟؟
__________________
ما أصعب الاحساس بالفشل
|
شكرا كتير لحضرتك و جعله الله في ميزان حسناتك ان شاء الله يا دكتور
|
#13
10-06-2009, 11:01 PM
|
||||
|
||||
|
جزاك الله خيرا ورزقك الفرد وس الاعلي
__________________
من أجمل ما سمعت  Downloaللتحميل
|
|
| العلامات المرجعية |
«
الموضوع السابق
|
الموضوع التالي
»
العرض العادي
|
|
جميع الأوقات بتوقيت GMT +2. الساعة الآن 07:54 PM.
