الانتداب الجزئي ..!!! افيدوني

[romanc_rd]

السلام عليكم ورحمة الله

لو سمحتم انا عاوزه اسألكم فى حاجه

دلوقتي انا متثبته 2011 معلم رياضيات ابتدائي وعامله تغيير مسمى وظيفي لاعدادي والقرار طلع وواخده بيه رقم اني اتحول بس لسه اسامينا مش نزلت فى المديريه لكن معايا ما يثبت اني تحولت لمدرس اعدادي

وكنت منتدبه لمدرستي الحاليه السنه اللى فاتت من قريه طنت بشتغل فيها قعدت فيها شهر ولقيتهم جايبنلي جواب انتداب لمدرسه تانيه فيها عجز لحين عودة مدرسه من اجازتها المرضيه

يعني انتداب من انتداب وخلوني اروح بحجه انه ينفع الانتداب من الانتداب

ولما المدرسه رجعت كانت قبل الامتحانات باسبوعين رفضوا رجوعي بحجة انه ممنوع التنقل ايام الامتحانات .. واشتكيت لوكيل الوزاره وساعتها عرفت انه مينفعش انتداب من انتداب واني لو اشتكيت هيروحوا فى داهيه فاضطروا فى الاداره يرجعوني بسرعه عشان معملش مشاكل

الكلام ده كان فى السنه اللى فاتت فى نفس توقيت دلوقتي


النهرده بقى لقيتهم جايبنلي جواب انتداب ماضي عليه الموجه الاول رياضيات لمدرسه تانيه لسد العجز

وانا عاوزه الغي الانتداب ده لعدة اسباب

1- المدرستين اللى بشتغل فيها واللى مفروض انتدب ليها فى ظهر بعض يعني الحوش فى ظهر الحوش والاتنين فى بيئه وحشه جدااا وزباله وكلها بلطجيه وبتوع مخدرات وانا اصلا بحاول انقل من مدرستي .. لكن المدرسه التانيه بتطل على زراعات يعني المدرسه فى وسط زراعات وهيه فترتين والفتره التانيه اعدادي وبنسمع كلما كتير عن تجاوزات غير اخلاقيه لبنات وشباب فى الزراعات دي قدام المدرسه ومحدش بيقدر يتكلم ..
فانا مش امن نفسي اروح هناك لان حتى شكلي بلبسي مختلف تماما عن البيئه هناك وملفت للنظر .. واخاف على نفسي يجرالي حاجه فعلا

2- انا ساكنه اصلا فى مكان بعيد جداااا عن مدرستي والمدرسه الجديده تعتبر ابعدلي كمان هما قارنوها بان المدرستين فى ظهر بعض لكن انا بركب تاكسي لمدرستي والمدرسه التانيه لان طريقها فى الزراعات محدش بيرضو يدخل هنا

والموجه بتاعي بيتحجج بانهم فى ظهر بعض مع ان كل مدرسين مدرستي من المنطقه دي وكلهم رجاله يعني سهل يمشوا الخطوتين دول


3- انا الوحيده فى المدرسه اللى مؤهلي اعلى منهم لان المسمى الوظيفي بتاعي اعدادي انا بكالوريوس علوم ودبلوم تربوي

يجي بعدي مدرس بكالوريوس تربيه

وبعد كده دبلوم معلمين واخدوا دبلومه تربوي

وفى دبلوم صنايع وبيدي رياضيات لسنه رابعه

هل ليا الحق انه انا اللى انتدب بما اني الاحدث للمدرسه ولا المفروض يوزعوا الحصص عليا انا الاول والمدرس اللى بكالوريوس تربيه باعتبار انه احنا الاساسيين وبعد كده المدرسين اللى اصلهم دبلوم معلمين

وبالتالي ينتدبوهم هما وانا لا ؟


4- انا اصلا جدولي فى مدرستي من اول السنه 24 حصه

وبقية المدرسين لانهم كلهم رجاله وبيتدلعوا علييا اللى شايل 8 حصص واللى شايل 16 حصه

ولان 3 منهم مسيحيين بيكملولهم بحصتين تلاته دين وعاملينها حجه انهم بيدوا دين مسيحي فمش عايزين ياخدوا نصابهم فى الرياضه

طيب المنطق يقول انه انا اللى شايله 24 حصه اطلع انتدب برا انتداب جزئي وانا اللى شايله نصابي

ولا اللى مش مكمل نصابه هوه اللى يطلع ينتدب براا ؟


5- دلوقتي الانتداب جزئي يعني 3 ايام فى المدرسه التانيه وفى مدرستي يومين

ونصاب الرياضيات للفصل الواحد 8 حصص اسبوعيا يعني معنى ذلك اني لازم في يومين ادخل 8 حصص

ينفع بقى انهم يعملولى الجدول ادخل الفصل 4 حصص يوميا ؟



............

دلوقتي انا عاوزه الغي الانتداب ده هل لو رحت للموجه الاول رياضيات هيسمعنى ويعمل حاجه .. وانه انا فعلا معايا حق ويشوفوا غيري

ولا اخدها من قاصرها واقدم على اجازه او نص اجر عشان اهرب من الانتداب ده

وهل مفيش قانون ينظم حركة الانتدابات ؟

يعني ينفع انتدابين فى السنه الواحده ؟ او كل سنتين مثلا ؟