اقدم ثانوي منازل ؟ ولا اعمل ايه؟

[dr samsoma]

السلام عليكم
انا اول مره اكتب موضوع واعذروني لو طولت عليكم لان ماعنديش غيركم يفيدني وبصراحه ماعرفش ده القسم المناسب ولا لا
الحكايهه باختصار من 8 سنين جيبت 96.3 في الثانويه الازهريه
وكان حلمي صيدله لكن للاسف اخدت بواحد في الميه اعلي
رحت علوم لا بقيت فرحانه ولا زعلانه لكن للاسف حصل اكتر من حاجه كلهم ادوا في النهايه اني لازم احول من علوم وبصراحه هو كان قرار خطا لكن ماكانش في حل غيره
المهم علشان ماطولش دخلت دراسات اسلاميه 3سنين وانا كارهاها مادخلتش الكليه الا ايام الامتحانات فقط
واتخرجت من 4 سنين وانا رافضه اشتغل بيها
للان لسه حلم صيدله بيراودني رحت حاولت ارجع علوم مانفعش لاني اصبحت خريجه
فاروس راسلتهم لما عرفت انهم بياخدوا الشهادات لفايه 10 سنين وصرفت نظر لان المصروفات غاليه جداااااااااااا
مشيت في الثانويه السودانيه جوزي رفض بسبب الاضطرابات الامنيه والازهر مارضيش يديني بيانات النجاح اصلا
راح سالي في الاداره التعليميه قالوله ممكنن اخد ثانوي منازل
المشكله بقي اني لسه قدامي 3 سنين بحالهم والموضوع ده تاعبني جدا
وبعدين مفيش حد بيديني اجابه قاطعه هل لو جبت مجموع في الثانويه وانا سني كبير ليا كليه عملي ولا تعب 3 سنين يروح عالارض
هل في وسيله تانيه تختصر السنين دي ولا لا
التقديم في شهر 10 وانا الي الان محتاره وماحدش بيدي اجابه شافيه اصلا