المدرسين" عن الشقاء أتحدث" رسالة لكل طلابنا

[نهي نوير خميس]

بما إني مدرسة في مدرسة بنات فكلامي للبنات وطبعا ينطبق كلامي علي الطلاب الذكور
عزيزتي الطالبة
طبعا إنتي كطالبة لما بتخلصي مراجعة مع المدرس في ليلة الإمتحان بتفتكري إن المهمة الكبري للمدرس في جمع فلوس المراجعة هي دي المهمة العظمي وبعدها خلاص المدرس بيرتاح وينام قرير العين
عايزة أقولك بمجرد ما المدرس بيخلص مراجعاته معاكي وسيادتك بتخلصي الإمتحان بتبدأ المهمة الأكبر والأشق.....عن تصحيح أوراق الإجابة أتحدث
طبعا حضرتك كطالبة بتشوفي إن تصحيح أوراقك شئ واجب علي المدرس.......طبعا عندك حق بس سيادتك متعرفيش مدي التعب اللي بيحصل للمدرس علشان يخلص تصحيح ورقتك بضمير وبدون أخطاء
المدرس مننا بيفضل علي الأقل 5إلي 6ساعات بيصحح ورق الإمتحان لحد لما تطلع عينه وضهره ورقبته تصرخ من الألم "وخاصة في التلج ده والإيدين مرصرصة من التلج"
وطبعا بنوتة حتقول بكل بساطة هو أنتوا لازم تصححوا كل الورق في يوم واحد
حرد وأقولك أه طبعا علشان الكنترول يلحق يسجل درجاتك علشان تاخديها علي طول بعد الإمتحانات وحضرتك وولي أمرك تتطمنوا علي نفسكم
الخلاصة
المدرس اللي إنتي بتبصيله علي إنه أداه لجمع الأموال بيتعب مش بس في الشرح طول السنة "وده واجبه طبعا"وكمان في المراقبة والمراجعة والتصحيح
عايزة أقولكم إني روحت النهاردة من التصحيح من مادة التربية الوطنية وأنا حالتي يرثي لها من ألم شديد في الرقبة وإضطريت أخد حقنة مسكنة للألم علشان أعرف أروح وأنام بدون ألم
أنا بحكي كل ده علشان تراعي المهمة اللي بيقوم بيها كل مدرس
يعني مش إنتي بس اللي بتتعبي في المذاكرة إحنا كمان كمدرسين بنتعب وبردوا حكرر تاني ده واجب علينا وبناخد عليه مرتب بس بنحب اللي يقدر مجهودنا ويعرفه
تحياتي لكم ....وياريت تدعولنا ربنا يقوينا كلنا طلبة ومدرسين
ن.ن