مهم لكل الشباب و البنات اللي في الجامعة و بالأخص اللي داخلين الجامعة السنادي

[محمد.فوكس]

السلام عليكم..
أنا في الموضوع ده بكلم الشباب و البنات اللي داخلين الجامعة السنادي و كمان الشباب اللي في الجامعة اصلا..
دلوقتي احنا داخلين مرحلة جديدة و تفرق كتير عن اللي قبلها على عكس المراحل اللي قبل كده كنا بنطلع من مدرسة ندخل مدرسة أما دلوقتي في فرق كبير..
جامعة يعني حرية يعني مسؤلية...
و معظمنا اذا مكانش كلنا بيفكر في الحياة الجديدة اللي في الجامعة..و اكيد بيخطر على باله الاختلاط..
قضينا مش اقل ست سنين في المدارس (الاعدادية/الثانوية بنين) , (الاعدادية/الثانوية بنات)
و نضجنا في هذه المرحلة و اكيد ان من اهم التحولات اللي بتحصل و احنا داخلين الجامعة هو الاختلاط..
مكنتش بتلاقي بنات معاك الا لو في درس مدة قصيرة لكن دلوقتي هيبقى معاك بنات طول اليوم في الكلية.
و انتي كمان نفس الكلام مكنتيش بتلاقي ولاد الا في الدروس و دلوقتي هيبقو في وشك طول اليوم.
تصرفك هيبقى ازاي..هتتعامل مع التطور ده ازاي هل هتدخل في الشلة المختلطة او تعرف حد من الجنس الآخر؟
على فكرة انا مش عامل الموضوع ده عشان انبهكم للموضوع و اقولكوا تعملو كده لا سمح الله و في نفس الوقت مش بتبنى رأي معين في الحكاية دي انا طالب زيكو و فكرت في الموضوع ده..
الموضوع ده ممكن يتاخد بكذا جانب .. ففي الجانب الديني اللي هيقول ان الاختلاط ممنوع..و ممكن حد يتكلم فيه بضحك و يقول "يعني الحياة هتبقى طرية شوية بعد ما كانت ناشفة"..و في اللي هياخده بمنطق بين احساس الطالب او الطالبة انه نفسوا يعمل كل حاجة جديدة و يستغل الحرية و بين القيود اللي لازم تلتزم بها الطالب في علاقاته في الكلية..و جانب الطالب اللي عايز يفتعل قصة حب..الخ.
انا عايز اعرف آرائكم في الموضوع ده..هيبقى ايه موقفك من جو الاختلاط اللي موجود في الجامعة؟
و يا ريت اللي يحط رأيه يقولنا هو في كلية اصلا ولا لسه داخل السنادي..
مستني ردودكم .. و احب اكرر اني مش تبع رأي معين انا طالب برضه لسه هدخل السنادي .
شكرا.. سلام عليكم..