حس بالغلابة يا ريس ياسمين محفوظ

[حمدى حسام]

حس بالغلابة يا ريس

ياسمين محفوظ
http://elwatannews.com/news/details/717300


في مصر لما عملنا ثورة الغلابة هما اللي دفعوا التمن.. لما حكمنا الإخوان الإرهابيين الغلابة هما اللي دفعوا التمن.. الإرهاب بيستهدف الغلابة.. الغلاء ييستهدف الغلابة.. العجز بيستهدف الغلابة.. المياه المسممة بتستهدف الغلابة.. نقص الغاز بيستهدف الغلابة.. تشريد العمال بيستهدف الغلابة.. الفساد بيستهدف الغلابة.. ال***** في الأقسام والموت والسب بالأب والأم بيستهدف الغلابة.. الإعلام العقيم بيستهدف عقول الغلابة.. التعليم السيئ بيستهدف الغلابة.. التلوث بيستهدف الغلابة.. المستشفيات الحكومية ما هي إلا مشرحة للغلابة.. طوابير العيش للغلابة.. رحلة البحث عن أنبوبة غاز بأسعار مضاعفة من نصيب الغلابة.. حتى جهاز الكفتة بتاع اللواء عبد العاطي متاجرش غير بأحلام الغلابة.. عمرك شفت غني بيشتكي من زحمة الطوابير؟! ولا من سوء المعاملة في أقسام الشرطة؟!! ولا من المياة المسممة؟!! ولا ومن إلغاء الدعم؟!! ولا مش لاقي سرير في مستشفى حكومي؟! ولا معندوش مولد كهربي لما الكهربا تقطع؟! ولا انفجرت فيه قنبلة وهو بيقلب في صناديق الزبالة؟!! ولا واقف متضامن مع العمال الغلابة اللي اتشردوا؟!! ولا بيشتكي من سواقين الميكروباصات اللي رفعوا تعريفة الأجرة؟!! الخ الخ .. م الآخر الغلابة هما اللي بيحاسبوا علي المشاريب اللي مشربوهاش.. الغلابة هما اللي انتخبوك يا ريس مش أصحاب الجيوب المنتفخة اللي هما بيحاربوك دلوقتي من تحت الترابيزة.. احنا عايزين وطن للغلابة يا ريس.. عايزين كرامة للغلابة يا ريس.. يا سيادة الرئيس السيسي الغلابة دول رأس مالك وسندك أنت من غيرهم ولا حاجة.. دول لا عملاء ولا تبع الأمريكان ولا ممولين.. ورغم المر اللي شايفينه محدش منهم شتم في البلد وإن شتموا فيها ده من كتر حبهم فيها ومع ذلك ياكلوا بأسنانهم اللي يغلط في بلدهم رغم الذل اللي شايفينه.. ارتقي بالغلابة حتى يرتقي وطنك يا ريس.. إرضاء الغلابة وإعلاء شأنهم هو الحل يا ريس.

اعذرني عشان المقال بالعامية أصل أنا بكتب بلسان الغلابة يا ريس