هلال رمضان (المسابقة الشعرية الرمضانية)

[مستر/ سيد أبو سعده]

(هلال رمضان)

زي النهاردة فـ كل سنة
نقعد كدة كلنا لمة
نستنى مولانا المفتي
نشوفه نفرح نتهنى
يقولنا رمضان بكرة
واليمن والخير يتمنى
ساعتها تملانا الفرحة
والدنيا كلها ماتسعنا
نخرج نهني ونبارك
والضحكة هلَّة على وشوشنا
والكل يغفر ويسامح
مهما اللي كان وحصل بينَّا
حتى اللي متخاصم صالح
عالحب رمضان جمَّعنا
وتلقى ألف فانوس نوَّر
والزينة تبقى على بيوتنا
ويشغَّلوا "رمضان جانا"
أهلا وسهلا يا واحشنا
من بكرة تلقى الخير زايد
والبركة شايفاها عيونّا
وفـ بيت عيلتنا هنتقابل
متجمعين بعد فراقنا
على سفرة واحدة تكفينا
نفطر وتتلاقى قلوبنا
ونروح نصلي في الجامع
تراويح نشيل بيها ذنوبنا
والكل للقرآن خاشع
دا نور حياتنا ودستورنا
وفي الأواخر نتسابق
على ليلة القدر تفرحنا
وزكاة الفطر نخرَّجها
علشان مايكونش فقير بينَّا
وفـ ليلة العيد ليك بنفارق
صعبان علينا تودعنا
والكل بينادي هلالك
طوِّل شوية وما تسيبنا
طوِّل شوية وما تسيبنا

مستر/ سيد أبو سعده
مدرس اللغة الإنجليزية