خليك فى حالك

[هانى الشرقاوى]

ياريت اللى يقرا يكمل الموضوع لاخره لان الموضوع ليه جوانب كتير مهمة مح&EcirEcirc;اجين ناخد بالنا منها، ولو فى حد مننا بيعمل الحاجات دى يحاول يبطلها لانها من اسوأ العادات.
نتكلم بقي فى الموضوع.
يا جماعة موضوع الاعتداء على حرية الاخرين والتدخل فى شئون ملناش علاقة بيها ، وعدم احترام اراء الآخرين ، والنميمة على اى حد حتى لو ماشي فى الشارع ومنعرفش عنه حاجة بقت حاجة منتشرة وسخيفة قوى وغير محترمة .وانا اقصد بكلمة التعدى على حرية وحقوق الاخرين الحقوق الدينية والدنيوية .يعنى مثلا الراجل اللى بيشرب سجاير فى اى مكان يدخله ، دة واحد بيتعدى على حقوق الاخرين فى الراحة فى المكان اللى هما فيه، هما مش داخلين عشان يتخنقوا او يتضروا صحيا.دى حاجه .
وحاجه تانيه .
الناس بقي اللى بتسأل فى اللى ملهاش فيه خالص دى يعنى مثلا.
1هو انت متجوزتش ليه لحد دلوقتى؟
2هو انتى مش محجبة ليه؟
3هو انتى ليه لابسة كدة؟
3هو انتى ليه متلبسيش اسدال؟ (الإسدال نوع من انواع الحجاب )
4هو انت ليه متحاولش تبصى كدة فى القرأن وتقارنى بين الدين الاسلامى والمسيحى (الاسئلة فى الموضوع دة كتيرة اوى اوى واشكالها مختلفة)
5 الست دى ماشية كدة ليه؟
6هو الراجل دة لابس كدة ليه؟
7ايه دة ايه حد فى الدنيا يلبس احمر على ازرق؟ دة طبعا واحد بينم على واحد ميعرفوش اصلا .
8هو ليه مش بيشترى هدوم كتير ويغير فى لبسه؟
9دى اكيد بنت قليلة الادب طالما ماشية مع اولاد؟ (وطبعا ممكن تكون ياعينى ماشية مع اخوها ولا خطيبها ولا جوزها )
10هو انتوا ليه اتطلقتوا؟
11ولما تيجى تتكلم فى التيفون تلاقي واحد متعرفوش اصلا بيقللك كنت بتكلم مين؟
12هى ليه بتتكلم فى التليفون وهى ماشية فى الشارع ؟.. يا عم دى بتتمنظر علينا، آل يعنى محدش غيرها معاه موبايل. (على اساس انه متأكد انها بتتكلم عشان تغيظه مثلا)
13انت ليه بتحب النوع دة من المزيكا ؟ (سؤال غبي طبعا)
14انت ليه مدايق اوى كدة ؟ (ولو قال مثلا مفيش حاجة مدايقانى او قال معلش دى حاجة خاصة اللى قدامه يزعل ويتخنق ويقول دة بيتكبر عليا مع إن تبقي ممكن علاقتهم مكملتش اسبوع)
15انتى ليه تخينة اوى كدة ؟ ( متخسي)
او انتى ليه رفيعة اوى كدة ؟ (انتى لازم تتخنى شوية
مع ان اللى بيقول كدة دة ممكن يكون مفيش علاقة بتربطه باللى قدامه ابدا )
16انتى ليه صابغة شعرك اللون الغبي دة؟ (طبعا هنا مفيش احترام للاذواق خالص)
17هو انتى او انت مرتبط ؟؟ (بردو ممكن حد حشري يسألك السؤال دة وهو ملوش علاقة بيك ولا حاجة خالص)
18انت على فكر رأيك متخلف جدا؟
(هنا طبعا مفيش اى احترام للاراء ودى جملة بس مختصرة فى اشكال كتيره من الكلام اللى مفهوش احترام للاراء)
19انت ليه مبتقلش السلام عليكم؟ ليه بتقول مساء الخير؟
دى بعض الجمل اللى مش بتعجبنى لو قعدت اقول فى جمل زى كده مش هخلص.
الجمل دة ممكن نقبلها من حد قريب قوى مننا ،انما مش من اى واحد كدة يسأل فى اى حاجة.
دى حاجة حاجة تانية مهمة قوى بقي،سواقين التاكسي الرغايين اوى دول اللى الشكوى زادد منهم قوى ، نفسي يرحموا أ نفسهم من التدخل،يعنى مثلا وحدة ولا واحد يركب معاه ،يبتدى ، هو انت بتشتغل ايه هو انت مش عارف ايه؟؟
هتقللي ناس طيبين وغلابه ، حأقول لك ماشى . بس ميتكلموش فى حاجات شخصية.
فهل الناس مش عارفين كلام ربنا ((( يَا أَيُّهَا الَّذِينَ آمَنُوا لا يَسْخَرْ قَومٌ مِّن قَوْمٍ عَسَى أَن يَكُونُوا خَيْرًا مِّنْهُمْ وَلا نِسَاء مِّن نِّسَاء عَسَى أَن يَكُنَّ خَيْرًا مِّنْهُنَّ وَلا تَلْمِزُوا أَنفُسَكُمْ وَلا تَنَابَزُوا بِالأَلْقَابِ بِئْسَ الاِسْمُ الْفُسُوقُ بَعْدَ الإِيمَانِ وَمَن لَّمْ يَتُبْ فَأُوْلَئِكَ هُمُ الظَّالِمُونَ ))
انا حصل معايا موقف غريب جدا يمكن هو اللى خلانى اتشجع انى اتكلم فى الموضوع
انا كنت فى عيادة قريبى وكنت بأسمع برنامج العاشرة مساء فى التليفزيون ،وكمان كان موجود بعض السيدات منتظرين دورهم فى الدخول للكشف ،
المهم خرجت اتكلم فى الموبايل ولما رجعت لقيت واحدة منهم قفلت التليفزيون من غير ما تستأذن ،انا دخلت بصيت كدة ،فقالت لى انا اللى قفلته اصلى مش قادرة اسمع حاجة.انا بصراحة مردتش عليها بس جه ف بالى على طول انها عملت حاجة مش من حقها.
ولا الناس بقي اللى عايزة تعرف كل حاجة عن حاجة وبتتكلم فى كل حاجة
لو واحدة مثلا مش محجبة يفضلوا يتكلمو ويجيبوا الكلام يمين وشمال عشاان يعرف اذا كانت مسلمة ولا مسيحية؟
وكمان مبقاش فى حاجة اسمها احترام للاديان ابدا--
ومبقاش فى احترام لاراء الاخرين ولا بقي فى احترام لانه وارد جدا ان اذواقنا واراءنا وسلوكنا وعاداتنا تختلف .ياريت ناخد الناس زى ما هى. منحاولش نفرض رأينا عليهم .
يعنى مثلا لو اتعرفت على واحد ندل وانت عارف انه ندل مش كل بقي ما يعمل موقف نداله تزعل منه مانت خلاص عرفت انه ندل اتأقلم بقي او سيبك منه خالص وريح نفسك.
قولولى بقي يا جماعة ليه الناس مبقتش بتحترم لا اراء حد ولا دين حد؟
مش هقول ان الغرب احسن مننا فى كدة ولازم نكون زيهم لا.
هقول ان الاديان وربنا سبحانه وتعالى امرنا بإحترام الأديان ونهانا عن النميمة والكلام عن الناس والكلام على الفاضى وعلى المليان والتدخل فى شئون الغير.
وفى موضوع كمان مهم قوى ،وانا شايفه ان بعض الناس فاهمه غلط ،وهو.
انه لما يقول لواحد اقرا فى المصحف علشان كده تعمل خير وتاخد ثواب .ويكون عارف انه مسيحى مثلا .
طب مهو فى مليوووون حاجة خير ممكن تعملها غير دى وممكن لو يعنى لازم قوى تدعو للاسلام. انت ممكن تدعو للاسلام بتمسكك بيه وباحترامك ليه .
لاننا لو تمسكنا بتقاليد وعادات الاسلام هنبقي احسن شعوب العالم احتراما وتقدما وكل حاجة .وهنا نبقى بندعى للإسلام بهدوء وبالراحه وبطريقه عمليه .و بكدة ممكن ندعو للاسلام دين الرحمة .

انا اسف قوى طولت عليكم بس بجد الموضوع مهم عندى قوى .
اتمنى ان اجد ردودا ومناقشات فى هذا الموضوع المهم حتى استفيد من المناقشات والاراء ،
وارجو من حضراتكم ان تناقشونى اذا كان لى اخطاءا فى ارائى

[alesandro]

السلام عليكم ورحمة الله وبركاته

بجد مش عارف اشكرك ازاى على موضوعك الغايه فى الجمال والاهمية ده
وفعلا الناس بقت الايام دى تخنق لدرجة انى احب اقعد لوحدى احسن من انى اختلط بيهم
وربنا الواحد هيجيله الضغط بسببهم

فى حاجه اسمها موده ومحبه بين الناس
دى معاناه اتفهم غلط .. او بمعنى اصح ( اتقلب )
بقى رغى ونميمة وزى ماحضرتك شرحت

وردا على استفسارك وتعجبك من الناس اللى بتسال اسئلة كتيرة قوى زى اللى حضرتك قلتها
ده نوع من انواع الفضول المكروه سورى .. ده فضول غبى
ماحدش عارف ظروف الواحد وهو ماله وفى ايه عنده
وتلاقى واحد او واحده شغاليين رغى وكلام مش بينتهى
والله وصلت لانى كرهت الكلام

والمصيبه ان الناس مش طبع واحد او شخصية واحده
دول شخصيات ولازم الواحد بقى يحاول يتعلم ازاى يعامل ده وده وده
وازاى تحاول تهرب من لكلام مع ده او بمعنى تانى .. تخلع منه بشياكه

بصراحه لو قعدت اتكلم اكتر من كده مش هخلص .. هكتفى بالقدر ده

الف شكر ليك على المشاركه الفعاله جدا دى

[MohammeD el_SadaT]

فيه مثل بيقول
( عيوبى لا أراها وعيوب الناس أجرى وراها )
الواحد من دول بيحس أنه مجرد من الأخطاء وإن الناس اللى حوليه كلهم غلط ولازم ينتقد عيوبهم عشان يصلح الكوكب مش مهم عنده إزاى ينتقدها لكن مهم إنه ميسبش حد فى حاله

[هانى الشرقاوى]

ميرسى لمرور حضراتكم