لأنك غالية ( نصائح للأخت المسلمة بلهجة عامية بسيطة )

[abomokhtar]

عمرك حسيتى قبل كدا إنك غالية؟!
ولو حسيتى الإحساس ده، يا ترى ليه حسيتى بيه؟!
عارفة إنت غاليه ليه؟
- أنك مسلمة.
عارفة يعنى إيه مسلمة؟ مسلمة تساوي ملكة.
أحد الإنجليز سأل واحدًا مسلمًا، وقال له: "ليه المرأة المسلمة لا تسلم على الرجالة كلهم؟"
رد عليه المسلم؛ وقال له: "عندكم فى بريطانيا، هل مسموح لأي شخصيه تسلم على الملكة؟"
رد عليه الإنجليزي؛ وقال: "لأ طبعًا! غير مسموح، عندنا سبع أصناف بس من الناس يجيز لهم القانون ده".
رد المسلم؛ وقال له: "وإحنا عندنا أصناف محددة كمان، هما بس اللي يجوز لهم ذلك، زى ما إنتوا بتعملوا ده للملكة، لإن عندنا فى الإسلام؛ (كل النساء ملكات).


إسراء الشقيري

[abomokhtar]

• آه لو عرفتي قد إيه الإسلام رفع من شأنك، وكرمك تكريم ملهوش مثيل!
• لازم تعرفي أنتِ غالية قد إيه علشان تحسي بقيمتك في الحياة!
• أنتِ كـ(أنثى) بتمثلي نص المجتمع، وبتولدي النص التاني، يعنى أنتِ المجتمع كله.
• أنتِ المسؤولة عن تربية الأجيال، يعني صلاح المجتمع مرهون بكِ أنتِ.
• أنتِ غالية أوي لدرجة إنك لو تأملتى في القرآن؛ معجزة ربنا الخالدة في الأرض، ما هتلاقي سورة اسمها (الرجال)، ولكن فيه سورة اسمها (سورة النساء)، فيه سورة كاملة سميت باسم امرأة؛ وهي (مريم') وفيه سورة نزلت في امرأة (سورة المجادلة)، وكذلك سورة (الممتحنة).
• أنتِ غالية لدرجة إن ربنا يقول: {يَهَبُ لِمَن يَشَاءُ إِنَاثًا وَيَهَبُ لِمَن يَشَاءُ الذُّكُورَ} [الشورى:49].
الوهب يعني العطاء، وربنا ذكرك قبل الرجال في الوهب، وده تكريم ليكِ، وإعلاء من شأنك.
• أنتِ غالية جدًا عند النبي صلى الله عليه وسلم؛ لدرجة إنه يخوض معركة، وغزوة مع اليهود، علشان واحد يهودي راود امرأة مسلمة؛ إنها تكشف وجهها!
أنتِ غالية جدًا عند النبي صلى الله عليه وسلم؛ لدرجة إنه بيوصي بيكِ في حجة الوداع، قبل ما يموت، وبيقول: «استوصوا بالنساء خيرًا» (صحيح البخاري؛ برقم:3331).
وأيضًا صلى الله عليه وسلم بيوصي بيكِ فى حديث آخر، وبيقول: «إن الله يوصيكم بالنساء خيرًا، إن الله يوصيكم بالنساء خيرًا، فإنهن أمهاتكم وبناتكم وخالاتكم» (السلسلة الصحيحة؛ برقم:2871).
أنتِ غالية جدًا عند النبي صلى الله عليه وسلم؛ لدرجة إنه يقول: «إن اللى هيموت وهو بيدافع عنك هيبقى شهيد؛ من *** دون أهله فهو شهيد» (صحيح الجامع؛ برقم: 6445).
أنتِ غالية جدًا عند النبي صلى الله عليه وسلم؛ وعلشان كدا قال: «رفقًا بالقوارير» (صحيح البخاري؛ برقم:6149).
شوفتي التشبيه الرائع ده من النبى صلى الله عليه وسلم للنساء بالقوارير، فى الرقة، والطيبة، والشفافية، والعاطفة، ووصيته للرجال باللطف بكِ، وعدم جرحهم لكِ.
• أنتِ غالية جدًا، وعلشان كدا الإسلام كرمك كـ(بنت)، وكـ(زوجة)، وكـ(أم).
• الإسلام كرمك كـ(بنت)؛ لدرجة إن النبى صلى الله عليه وسلم يقول: «من كان له أختان أو بنتان فأحسن إليهما ما صحبتاه، كنت أنا وهو فى الجنة كهاتين، وقرن بين أصبعيه» (صححه الألباني).
شوفتى؟ اللى هيحسن معاملتك هيبقى مع النبى فى الجنة.
• الإسلام كرمك كـ(زوجة)؛ وأوجب على زوجك الإنفاق عليكِ، وأمره بحسن معاشرتك، قال الله تعالى: {وَعَاشِرُوهُنَّ بِالْمَعْرُوفِ} [النساء:19].
وقال صلى الله عليه وسلم: «خياركم خياركم لنسائهم» (صححه الألباني).
• الإسلام كرمك كـ(أم)؛ لدرجة إن النبى صلى الله عليه وسلم يوصى بكِ، ويقول: «أمك ثم أمك ثم أمك» (صحيح مسلم؛ برقم:2548).
• الإسلام كرمك كـ(أم)؛ لدرجة إن النبى صلى الله عليه وسلم يقول: «إلزم رجلها، فثم الجنة» (صححه الألباني).
الجنة تحت رجلكِ.
فيه تكريم أكثر من كده؟!

[abomokhtar]

• تعالي نشوف بعض الأقوال عن المرأة فى الأزمنة السابقة:
1-عند الإغريقيين؛ قالوا عنها: "شجرة مسمومة"، وقالوا: "هي رجس من عمل الشيطان، و تباع كأي سلعة متاع".
2- وعند الرومان؛ قالوا عنها: "ليس لها روح"، وكان من صِور عذابها أن يصب عليها الزيت الحار، وتسحب بالخيول حتى الموت!
3- وعند الصينيين؛ قالوا عنها: "مياه مؤلمة تغسل السعادة"، وللصيني الحق أن يدفن زوجته حية! وإذا مات حُق لأهله أن يرثوه فيها!
4- وعند الهنود؛ قالوا عنها: "ليس الموت والجحيم والسم والأفاعي والنا أسوء من المرأة"، بل وليس للمرأة الحق عند الهنود أن تعيش بعد ممات زوجها، بل يجب أن تحرق معه!
5- وعند الفرس؛ أباحوا الزواج من المحارم دون استثناء، ويجوز للفارسي أن يحكم على زوجته بالموت.
6- وعند اليهود؛ قالوا عنها: "إنها لعنة"، لأنها سبب الغواية، و يجوز لأبيها بيعها!
7- وعند النصارى؛ عقد الفرنسيون فى عام ستة وثمانين وخمسمائة من الميلاد مؤتمرًا يبحثوا فيه: (هل تعد المرأة إنسانًا أم غير إنسان؟!) وإذا كانت لها روح، فهل هى روح حيوانية أم روح إنسانية؟!
و أخيرًا: قرروا أنها إنسان، لكنها خلقت لخدمة الرجل فحسب!
وأصدر البرلمان الإنجليزى قرارًا؛ فى عصر (هنري الثامن)؛ ملك إنجلترا؛ يحظر على المرأة أن تقرأ الإنجيل، لأنها تعتبر نجسة!
وعند ولادة المرأة، تقول الكنيسة: "دعهن يتألمن، وهيا نساعد الرب فى الانتقام منهن"!
8- وعند العرب قبل الإسلام؛ كانوا يكرهون المرأة مثل كره الموت، بل يؤدي الحال إلى وأدها، أي دفنها حية، أو قذفها في بئر بصورة تذيب القلوب الميتة!
بعد ما شوفتي الكلام الشنيع اللي فات ده، وشوفتى تكريم الإسلام لكِ يا غالية، يا ترى؛ حسيتي بقيمتك كـ(مسلمة) ولا لسه؟!

[abomokhtar]

أنتِ جوهرة غالية:
وعلشان كده، ربنا أمرك بالحجاب والستر، علشان يحفظك ويصونك.
أنتِ لؤلؤة جميلة:
وعلشان كده ربنا أمرك بعدم الخضوع في القول، وعدم الكلام مع الرجال إلا للضرورة، علشان تفضلي غالية.
في بلاد الغرب وأوربا، المرأة عندهم سلعة رخيصة أوي، قيمتها في العري، و الشهوة وبس!
وأنتِ بعد كل التكريم ده!
ليه رضيتي تبقي سلعة مكشوفة، الكل يبيع فيها ويشتري!
ليه بترخصي نفسك يا أختي؟! إيه اللي يستاهل علشان تعملي كده؟!
هو ده شكر ربنا على نعمة الإسلام؟!
شكر النعمة أنكِ تمشي على الموضة، وتخرجي بلبس ضيق!
وترجعي تقولي أنا بحب ربنا؟!
شكر النعمة أنكِ تكلمي ده، وتخرجي مع ده، وتتصاحبي مع ده، وتقولي أنا محترمة؟!
شكر النعمة إنك تفرّطي في الصلاة، وتهجري القرآن؟!
وتبعدي عن سنة حبيبك النبي؟!

[abomokhtar]

أنا اليوم هكلمك عن موضوع تاني، يهم كل بنت صغيرة أو كبيرة؛ هتكلم معاكِ عن:
الحب!
هنتكلم على أساس ديني وعقلي، وهنحكي قصص واقعية.
هنتكلم بكل هدوء، وهنحاول نرد على معظم الأسئلة اللي بتدور في تفكير البنات.
وهنحاول نفهمها صح، علشان نعيشها صح.
هو الحب حرام؟!
أول ما تقعد في أي مكان وتيجي سيرة الحب، تلاقي الشباب كلهم بيسألوا:
"هو الحب حرام؟"
وتلاقي بنت بتسأل وتقول: "أنا سمعت إن الحب في الإسلام جريمة! هل الكلام ده صح؟!
هقولك يا أختي: "مين قال كده؟!"
مين قال إن الإسلام بيجرّم الحب؟!
بالعكس تمامًا، ده اللي الكل لازم يعرفه إن: الإسلام دين الحب.
بس (الحب الحلال.. حلال، والحب الحرام.. حرام!
هتقولي: هو فيه حب حلال! وحب حرام؟!
هقولك : آه طبعًا، فيه حب حلال، وحب حرام، الحب الحلال.
زي أعظم حب في الوجود؛ حب الله، ربنا حبيبنا اللي خلقنا، وأنعم علينا بنعم ملهاش عدد، ولا حصر.
وكذلك حب النبي، اللي ربنا أرسله رحمة لينا، علشان ينقذنا من النار، ويكون شفيعنا يوم الدين.
ومن صور الحب الحلال أيضًا: حب الزوج لزوجته، وحب الزوجة لزوجها، حب الابن لأمه وأبوه، وحب المسلم
لأخوه المسلم، والمسلمة لأختها المسلمة، وحب الصالحين والأخيار.
كل ده حب حلال، والإنسان لو طبّقه، وأخد فيه النية، هياخد عليه ثواب كبير جدًا بإذن الله.
بل منزلة الحب في الإسلام وصلت لدرجة إن النبي صلى الله عليه وسلم قال إننا ما هندخل الجنة غير لما نحب بعض؛ قال صلى الله عليه وسلم: «والذي نفسي بيده لا تدخلوا الجنة حتى تؤمنوا، ولا تؤمنوا حتى تحابوا» (رواه مسلم).
بل الأعجب من كده إن النبي صلى الله عليه وسلم أخبرنا أن الإنسان هيتحشر يوم القيامة مع اللي بيحبه، فقال: «المرء مع من أحب يوم القيامة» (حسّنه الألباني)
اللي بيحب المغنيين والممثلين هيُحشر معاهم!
واللي بيحب الأتقياء والصالحين هيُحشر معاهم!
هتقولي: "طيب إفرض إنه ماعمل أعمال صالحة تبلّغه منزلة إنه يكون مع الصالحين؟"
هقولك: "برده هيكون معاهم، ولو أعماله كانت بسيطة".
وده بفضل ربنا ورحمته وكرمه، شوفي الحديث ده: عن أنس رضي الله عنه أن رجلًا سأل النبي صلى الله عليه وسلم: "متى الساعة؟" قال صلى الله عليه وسلم: «وما أعددت لها؟» قال الرجل: "لا شيء؛ إلا أني أحب الله ورسوله"، قال صلى الله عليه وسلم: «أنت مع من أحببت». قال أنس راوي الحديث: "فما فرحنا بشيء فرحنا بقول النبي صلى الله عليه وسلم أنت مع من أحببت؛ فأنا أحب النبي صلى الله عليه وسلم، وأبا بكر، وعمر، وأرجو أن أكون معهم بحبي إياهم (متفق عليه).
ده إيه العظمة دي كلها!
سبحان الله! الحب الحلال في الإسلام حاجة فوق الوصف بجد!
هتقولي: "جميل جدًا، ده الحب الحلال وعرفناه، إيه هو بقى الحب الحرام؟!
هقولك بس المرة الجاية إن شاء الله
عشان منطولش عليكِ.

[abomokhtar]

بعد أما اتكلمنا عن الحب الحلال.. إيه هو بقى الحب الحرام؟
الحب الحرام هو الحب القائم على علاقات غير شرعية، زي الحب اللي بنشوفه دلوقتي بين الشباب والبنات في المدارس والجامعات وعلى النت، بدون أي علاقة شرعية!

هتقولي: يعني كل الشباب والبنات اللي بنشوفهم بيحبوا بعض دول حبهم حرام وعليه ذنوب؟
هقولك: آه حرام.. والمسألة مفيهاش خلاف! وللأسف الشديد الشباب والبنات عمالين يضيعوا في عمرهم ويعصوا ربنا باسم (الحب)! أنا مقدّرة كويس وعارفة قد إيه الشباب والبنات دول متعلقين ببعض، وعارفة إن الموضوع صعب، والفراق أصعب!

وخصوصاً على البنت، الطرف الرقيق اللي بينجرح بسهولة جدًا، واللي في كل الحالات بتبقى هي الخاسر الوحيد!
علشان كده كان لازم نتكلم ونوعّي البنات ونفوّقهم قبل فوات الأوان! قبل ما يخسروا كل شيء!

وقبل ما أكمل كلامي.. أنا عايزاكِ وانتِ بتقرأي السلسلة دي تركني قلبك على جنب شوية، وتبدأي تفكري بعقلك وقلبك ولو مرة! انتِ يمكن تكوني قرأتي كتير قبل كده، وعارفة إن علاقتك مع اللي بتحبيه حرام!

وهتقولي أنا عارفة الكلام اللي هتقوله كويس؛ بس أنا برجوكي وبستحلفك بالله تكملي قراءة، وتفكري في الكلام كويس وتقلبيه في دماغك، وإن شاء الله تكون السلسلة دي سبب في تغيير مجرى حياتك للأحسن بإذن الله.
الحلقات التاليه هتكون عن طرق تسلل الحب الحرام وأهم أسبابه.