توضيح لوجهة نظر المحتجين

[عمرو نصر]

اكتب الاسطر التالية لتوضيح وجهة نظر المحتجين وتبيين علامات الاستفهام التى قد تغيب عن الكثيرين واني فى البداية ارجو ان تكون التعليقات متعقلة وليست عاطفية حتى نستطيع الرد على الواقفين فى التحرير
1 بداية اسمحوا لى ان ارصد المشهد من 25/1 حيث خرجت المظاهرات ولم تتحرك اي من اجهزة الدولة سوى الجهاز الامنى
2 يوم الجمعة 28/1 بدا الامن فى قمع ودهس المواطنين بدون اى ذنب حتى الساعة الرابعة عصرا ثم اختفى الامن وتحرك الجيش وفى لحظة واحدة دمرت السجون واحرقت بعض الاقسام ووصل السجناء من وادى النطرون الى غزة في 6 ساعات مما يؤكد وجود يد خفية فى الموضوع
3 خرج السيد رئيس الجمهورية الساعة 12 منتصف الليل ليعلن انه اقال الحكومة بالرغم ان المسالة كانت تجاوزت هذا القرار فعلا
4 يوم الاحد تم تشكيل الحكومة ب 60 % من الحكومة السابقة والتى سبق ان اعترف الرئيس ورئيس مجلس الشعب والشورى بانها حكومة فاشلة اذن النظام احتفظ ب 60% من الفشل
5 يوم الاثنين عقدت جلسة لمجلس الشوري التى حضرها 50 عضو فقط تم الحديث فيها عن انه يجب معاقبة المتظاهرين فى التحرير بجريمة الخيانة العظمى والتحريض على قلب نظام الحكم وعل ذلك قام المحتجون بالدعوة الى التظاهرة المليونية
6 فى الساعة العاشرة والنصف مساء اعلن الرئيس انه لم يكن ينتوي الترشح لفترة قادمة وانه ارتضى حكم التاريخ وانه سيموت في هذا البلد
7 بمجرد انتهاء خطاب الرئيس انقسم المحتجون الى قسمين
الاول وهم الشباب الواعي المتابع وكان رايه ان هذا الرجل ( الرئيس ) قوي وكويس اوي انه لم يجر البلاد الي خراب ودمار ولايجب ان نطلب من الرئيس ان يركع امامنا
الثانى وهم ثلاث مجموعات
أ الاخوان المسلمون الذين وجدوا ان استمرار الضغط سياتي بالمزيد من النتائج
ب القائمين على التنظيم وكانو يخشون ان يتم رصدهم والقذف بهم في المعتقلات
ج افراد بينهم وبين النظام ثأر شخصي ( واحد ابنة مات فى عبارة واخر اخوه مات من التعذيب فى قسم شرطة وثالث
والده مات في قطار العياط الخ .....) هؤلاء يرون ان اخذهم بالثأر يتمثل في رحيل الرئيس مبارك
8 يوم الاربعاء ( وارجو ان يتسع صدر الجميع لفرضية سوء الظن التي ساطرحها هنا )
كان هذا اليوم نقطة تحول حيث كان اول تصريح للنائب هو انه لا تفاوض مع المعارضة قبل انتهاء جميع التظاهرات ( لاحظ عدنا لمنطق القوة مرة اخرى )
خرج الالاف من انفسهم لتاييد الرئيس واؤكد من انفسهم
توجه بعض من هؤلاء المؤيدين لتحرير ميدان التحرير وبدات المجزرة
لاحظ ان
1 بدأ التحرش الساعة 2 ظهرا تقريبا ولم تدخل اي عربة اسعاف قبل الساعة 6:30 مساء رغم كثرة الاستنجادات
2 خروج الشرفاء من الحزب الوطنى ليدعوا ان من فعل هذا هم بعض اعضاء الحزب الوطني المستفيدين من حالة الاضطراب لحين تصفية اعمالهم وهروبهم خارج مصر
3 يرفض الجيش التدخل لفض التشابك حرصا على الحياد التام ثم يتخل الجيش عن هذا الحياد يوم الخميس الساعة 12 ظهرا ( لاحظ لماذا لم يتخل الجيش عن حياده قبل ان تسقط كل هذه الاعداد من الجرحى والقتلى )
4 وجود عناصر امنية بين المؤيدين الذين قامو بالاشتباك ( هل هم من الغباء ان يحتفظو ببطاقات هوياتهم فى هكذا توقيت كما انه من يتم امساكه يسلم الى الجيش ( فلم لاتكون اليد التى امرت بتدخل الجيش متاخرا تكون نفسها من اتفقت على ان كل من يسلم للجيش ويثبت انه من الداخلية يتم اطلاق سراحة )
5 الكل يعلم ان المؤيدين استخدموا قنابل المولتوف ومياه النار والحجارة لمحاربة المحتجين وهذه اساليب البلطجية مش الناس المحترمة او الموظفين وعلى ذلك يكون المشهد ان البلطلجية خلصت على المعارضة او العكس واللى يتبقى الدولة تخلص عليه وبكدة تكون البلد نضفت ومفيش غير اللى تابعين للنظام
6 الرئيس لم يقل فى خطابه انه لن يترشح بل انه لم يكن ينوي الترشح ( فما المانع ان تستمر المماطلة حت ياتي شهر سبتمبر ثم تخرج علينا جحافل الماجورين والحزب الوطنى ويطالبوا الرئيس بالترشح وهو نزولا على رغبة الجماهير يترشح وينجح و.....................
7 الموجودون في ميدان التحرير الان هم
1 اصحاب الظن السئ مثلى والذين يخشون ان تعود ريما لعادتها القديمة
2 الاخوان المسلمون والذين يسعون للخروج باكبر فائدة
الحل
الحل الذي اطرحه هو
1 مفيش حاجة معطلة فى البلد غير المجمع فيتم توفير بديل عنه للفترة القادمة وترك المحتجين في الميدان
2 بدا خطوات فعلية من رئيس الوزراء ونائب الرئيس مثل نزول الشارع لهولاء المحتجين
3 البدء فى محاكمة حبيب العادلى فورا لان تاخير المحاكمة يطرح مزيدا من سيناريوهات سوء الظن
4 مع كامل تقديري للرئيس مبارك لكن يجب ان يبتعد قليلا عن الصورة ويترك مساحة اكبر للنائب حت يتاكد الجميع انه قد قرر عدم الترشح فمثلا ماهى الرسالة التي يبعث بها عندما علمنا انه قام بعمل اجتماع مصغر اليوم بعد الانفجار فى خط الغاز الطبيعى المؤدى لاسرائيل لماذا لم يقم بهذا الاجتماع نائب الرئيس

فى النهاية اود ان اكون شرحت وجهة نظر المحتجين واعتذر على الاطالة

[يا جبل ما يهزك ريح]

معك حق
الحزب الوطنى برجاله إلا من رحم ربى كذابين
لو الرئيس صادق فعلا كان حل مجلس الشعب والشورى
وكان غير الحكومة بعيد عن الحزب الوطنى لكن واضح فعلا نيتهم السوداء

[جارةالوادى]

برضو الناس دى مش بتتكلم بلسانى ولابلسان 80 مليون اكيد كلنا كان نفسنا فى اصلاحات وتغيير بس مش لازم بخراب وبلطجة ووقف حال وبهدلة للبلد واجندات من كل حتة ايران وامريكا وغيرهم وبعدين الرئيس مش عيل ولارجل صغير عشان متصدقوش كلمته ان دى اخر سنة له ومش هيرشح نفسه تانى ولما متبقاش مطالبكم تتنفذ ابقى اقفو تانى وهو الميدان هيطير بس يلا اهو اللى فاضل من الرجالة الجدعان بتوع 25 يناير شوية عيال وطبعا العيل متوقع ان اللى بيكلمه دماغه زيه وكلمته برضو والا تفسر بايه كلمة ارحل الان دى وهو يعنى لازم نمشى على الكتالوج التونسى بالظبط حتى التوانسة مش راضيين عن اللى هما فيه حكومات انتقالية تعبانة وفوضى عارمة وكل شوية مظاهرات لان الحكومة مش هاضمها الشعب مع انه لسة مشافش حاجة منها
وبعدين اهو كل حد عنده حاجة خرج علشانها وقال كلمته وفك خاطره كفاية بقى خساير فى الارواح والممتلكات وعموما الدنيا مش هتوقف وهتفتح المصالح الحكومية وخليهم قاعدين فى الميدان ودا اللى المفروض كان حصل من البداية بس شوية غباء سياسى على حبتين من الامن ساعد فى ولعة الدنيا وتوقيف الحال

[soma elsaied]

الشعب يريد اخلاء الميدان
الشعب يريد اخلاء الميدان
الشعب يريد اخلاء الميدان

[MISS.DINA]

عندك حق والله ياجارة الوادى عارفة الحكومة لوسابتهم ومعبرتش خلاص هيزهقو ويسيبو الميدان لكن الحكومة عملتلهم قيمة زيادة عن اللزوم

[sohagy]

وجهة نظرك وصلت يا استاذ عمرو .. وأتمني أن يخيب الله ظنك ..

[sosoreda]

لماذا السخرية من المحتجين فى ميدان التحرير اليست مطالبهم هى مطالبنا جميعا السنا جميعا نريد الاصلاح والديموقراطية والحرية والعدل والمساواة والكرامة الذين ظهروا لنا حتى الان بنهم فظيعة مثل الفساد وسرقة المال العام وبيع ممتلكات البلد والنهب والاستبداد من الذى كاتن له الفضل فى سقوط هولاء والبدء فى التحقيق مع بعضهم الان اليسوا هم المحتجون اللى فى الميدان وسقوط جحافل الحزب الوطنى الحزب المستبد المزور العائق لكل سبل الاصلاح فى مصر اليسوا هم المحتجون واذا حدث تغير وقد حدث بالفعل الان واستيقظت الدولة اخيرا من سبات ثلاثون عاما من الظلم والقهر وقمع الحريات اين كان النظام من التعديلات والاصلاحات فى المجتمع افتكرها الان طيب بفضل من اليسوا المحتجين من سيستفيد من الاصلاحات والتعديلات المحتجين فقط ام كل الشعب المصرى هولاء القابعون فى ميدان التحرير هم الذين سيذكرهم التاريخ بسطور من نور كان لديهم الشجاعة واستطاعوا قول كلمة لا للفساد لا للظلم لهم كل التحية والاجلال والتقدير

[محمد حسن ضبعون]

الأعضاء الكرام أبناء مصر الأوفياء

نناشدكم عدم تكرار نفس المشاركة بموضوعات أخرى حتى لا يفقد الموضوع مصداقيته ويمل منه القارء
فريق المنتدى يتفحص جميع المشاركات ونهيب بحضراتكم أن نرتقى بمشاركاتنا وننتقى الردود ولا داعى للتجريح والتشدد والعصبية هدفنا واحد ( مصر أولاً ) والأصلاح ثانياً حافظو على مكانة مصر وشعبها وليعلم الجميع أن كل من حولنا ينظر الى تصرفاتنا ونحن من علمهم العلم والأخلاق والكرم والجود والشجاعة والتضحية

يمنع منعاً باتاً التوجه بالسب أو القذف أو التجريح لأى شخصية أو حزب أو جماعة
سواء الرئيس أو غير الرئيس
يمنع السب والشتم نهائياً
قل أنه على خطأ أو على صواب
وافق على مبدأ حزب ما
وانتقد الآخر لكن دون تجاوز
وعلى الأخوة المشرفين والمراقبين القيام بحذف أى مشاركة تحمل سباً أو قذفاً أو إساءة
يد بيد وعقولنا معا وقلوبنا متوحدة على التغير للأحسن والأفضل
لا للأكاذيب والفبركة بعد اليوم
شعارنا
الصدق والشفافية
الأعتراف بالسلبيات ومعالجتها
تعزيز الصحيح واثابته
وتصحيح الخطأ ورفضه

[ayafollaa]

المشاركة الأصلية كتبت بواسطة sosoreda

لماذا السخرية من المحتجين فى ميدان التحرير اليست مطالبهم هى مطالبنا جميعا السنا جميعا نريد الاصلاح والديموقراطية والحرية والعدل والمساواة والكرامة الذين ظهروا لنا حتى الان بنهم فظيعة مثل الفساد وسرقة المال العام وبيع ممتلكات البلد والنهب والاستبداد من الذى كاتن له الفضل فى سقوط هولاء والبدء فى التحقيق مع بعضهم الان اليسوا هم المحتجون اللى فى الميدان وسقوط جحافل الحزب الوطنى الحزب المستبد المزور العائق لكل سبل الاصلاح فى مصر اليسوا هم المحتجون واذا حدث تغير وقد حدث بالفعل الان واستيقظت الدولة اخيرا من سبات ثلاثون عاما من الظلم والقهر وقمع الحريات اين كان النظام من التعديلات والاصلاحات فى المجتمع افتكرها الان طيب بفضل من اليسوا المحتجين من سيستفيد من الاصلاحات والتعديلات المحتجين فقط ام كل الشعب المصرى هولاء القابعون فى ميدان التحرير هم الذين سيذكرهم التاريخ بسطور من نور كان لديهم الشجاعة واستطاعوا قول كلمة لا للفساد لا للظلم لهم كل التحية والاجلال والتقدير

صدقت والله انا بأيد كل كلمه قولتيها فعلا لولا الشباب البطل دا كان زمانا فى النظام الفاسد دا حتى نكون فى عهد الملك محمد جمال حسنى مبارك (التاسع عشر)
الشباب اللى بتتهموهم انهم فى الميدان عشان وجبه كنتاكى ولا خمسين جنيه بينهم ناس من كبار مثقفى مصر ورموزها الشباب اللى نقدر نقول عليه واعى هو الشباب اللى لم يتاثر بكلمه الرئيس مبارك العاطفيه زياده عن اللزوم فهو فهمها حتى قبل ان تدركها المعارضه ولا الاخوان اللى مش عاجبنكوا دول هو عرف من ساعه ماقال الرئيس "ان نختار مابين الفوضى او الاستقرار"ادرك حينها ان الاستقرار يعنى بقاء مبارك ونظامه والفوضى التى هدد بها قد حدثت عندما اغار البلطجيه او المؤيدين اللى خرجوا من نفسهم زى مانتوا بتقولوا
داخلين بجمال واحصنه كاننا فى العصور الوسطى بسيوف وقنابل حارقه ومسيله للدموع معرفش جت منين ولا يمكن المتظاهرين شوحوها على نفسهم زى مازوروا الكارينيهات بتاعه الامن بعد ما قبضوا عليهم .
يقول "اننى لم اكن انتوى الترشح لفتره رئاسيه جديده"وقبلها بشهور يعلن الحزب الوطنى ان مرشحه فى الانتخابات الرئاسيه القادمه سيكون حسنى مبارك
وغيرها كتير لو هنعلق على خطابه وبعد كل دا لسه فى امل انه يصلح
المتظاهرين لو حتى زى ماحضرتك بتدعى انك بتقول وجهه نظر المحتجين وبتقول ان معدش فيه فى الميدان الا قاده المظاهرات خايفين من الاعتقال والشباب الواعى مشى فانا شايفه ان حضرتك اخطأت فى هذا الادعاء الشباب الواعى اللى فهمها هو اللى معتصم فى ميدان التحرير وهو اللى هيخلد فى التاريخ يمكن يكون مبينكلمش بلسان 85 مليون مصرى بس هو اكيد بيتكلم بلسان الفئه الواعيه المثقفه الوطنيه فى ال85 مليون
المعتصمين مش هيصمدوا قدام البلطجيه ويطالبوا بمطالبهم اللى هيا مطالب المصلحين فى البلد ويضربوا ويستشهدوا كل دا عشان وجبه كنتاكى
لسان العقل :ييايد المتظاهرين بالرحيل الان الان للنظام الفاسد
لسان القلب:هما اللى صعب عليهم الرئيس وهو عايز يموت فى مصر ودا حقه بس ميبقاش الرئيس وهما اللى عايزين المظاهرات تقف

[ayafollaa]

اولا:اللى بيقولو ان الفوضى هتعم لو مبارك مشى
فالدستور بيقول (عند خلو منصب الرئاسه يتولى رئيس مجلس الشعب الرئاسه لفتره مؤقته )
وبما ان مجلس الشعب مطعون فيه حاليا فيتولى بدلا منه رئيس المحكمه الدستوريه العليا
ثانيا:اللى بيقول ان الاخوان هما اللى عاملين المظاهرات هما اعلنوا انهم مش هيقدموا مرشح للرئاسه
ثالثا: اللى بيقول اننا نستنى ونصبر على الحكومه الجديده يمكن تصلح فاللى حصل من اعتداء على المتظاهرين اثبت ان مفيش نيه للتغير
اللى بيقول اننا صبرنا 30 سنه ايه اللى ميخليناش نصبر 7 شهور اقولهم لولا الشباب المعتصمين كان زمنا صابرين العمر كله هو صحيح الميدان مش هيطير بس الله اعلم لو الشباب اخلو الميدان وطبعا بعد حركه الاعتقالات والقتل اللى بتحصل من دلوقتى اصلا الله اعلم ممكن تحصل ثوره تانى ولا لا وساعتها كل الناس هتندم على الفرصه اللى راحت من ايديهم
اللى بيقول ميحقش للمصريين انهم يهينوا رئيسهم وهو يحق للرئيس انه يهين شعبه ومش محتاجه اشرح دى
وفى الاخر دا رايى اللى انا احاسب عليه واختلاف الراى لا يفسد للود قضيه