حرااااام عليكم و الله حراااااااام حقيقه ما حدث امس بالتحرير

[Asa7be Wawa]

• اولا حسبى الله و نعم الوكيل حسبى الله و نعم الوكيل فى كل اللى بيقولوا ان اللى فى التحرير دول بلطجيه بجد يعنى الناس ديه مفتريه

• انا روحت امبارح و أسمحولى احكى لكم على اللى حصل بدأت الحكايه من الساعه تلاته الفجر يوم 29 انا صحبت على الأذان كنت مطبق اليوم اللى قبله المهم فتحت الفيس بوك لقيت ان الدنيا والعه و أهالى الشهداء اتضربوا انا اول ما سمعت كده اتجننت دخلت على كذا موقع و دخلت على تويتر و اتأكدت ان الشرطه عادت زى ما كانت لقيت فيديوهات على اليوتيوب لسه نزله و لقيت واحد بيضرب و بيتصعق على الأرض من الشرطه قلت الشرطه رجعت زى ما كانت انا اتجننت اعدت كده لغايه الساعه 9 قلت مش حينفع كده لازم اتأكد من نفسى انا أهلى علمونى ان اللى يشوف غير اللى يسمع و ربونى على كده و على الحريه لقيت صاحبى فتح على الساعه عشره كده قلت له الموضوع و قالى يلا ننزل المهم على 11 كده نزلنا التحرير لقينا ناس متجمعه مش كتير هناك قلنا لهم فى ايه
• قالوا لنا الناس عند وزاره الدخليه قلنا نروح وزاره الداخليه روحنا هناك لقينا الناس بتجرى فيه ايه فيه ايه فى قنبله اترميت جرينا معاهم و بعدين وقفنا كنت جايب كمامات معايا و صاحبى جايب خل حطيناها و روحنا بعد ما معركه القنابل هديت عند الوزاره لقين ناس نظيفه و شباب كله زينا او اكبر مننا شويه شباب كتيير من الجامعه الامريكيه شباب نظيف جدا كانوا بيتكلموا مع الامن المركزى عند الوزاره بلغه محترمه جدا (بلطجه مش كده)
• المهم بقا كان فيه ناس غلابه او يعنى تقول عليهم طبقه اقل كانوا بيهتفوا ورا الشباب النظيف ده و الله كلهم جدعان الناس ديه كل شويه واحد يجى يقولنا يا رجاله و انا 16 سنه بس فاكرنى يعنى كبير خدوا خل علشان الغاز و يصبوا لنا خل و ناس محترمه و جدعه بجد اما بقى الجديد و اللى بجد انا عمرى ما شوفت جدعنه و رجوله اكتر من كده
• شباب الموتسيكلات اللى بيعلوا اصوات الاغانى الشعبيه هما اللى كانوا بينقلوا المصابين و المغمى عليهم بسرعه جدا و يرجعوا يأخدوا مصابين تانى و محدش قلهم لكن هما دول الرجاله المهم بقا الناس الغلابه و الشباب الطبقه العاليه كلهم نزلوا زينا عايزين يفهموا ليه الداخليه عملت كده مع أهالى الشهداء
• المهم بعد ما الشباب كان بيتكلم مع الأمن المركزى سمعنا صوت مخيف كأنوا اطلاق نار طلع غاز مسيل للدموع كلنا جرينا و من هنا بقا الواحد عرف ان الداخليه زى ما هى و حدفوا بتاع 10 قنابل فى كل حتا و اتحاصرنا انا جالى اختناق شويه و بعدين هديت و روحنا تانى الظهر أذن كلنا روحنا نصلى (معلش اصل البلطجيه بيصلوا دلوقتى علشان ربنا يكرمهم ) و رجعنا نقف تانى فضلنا فى كر و فر تقريبا مع القنابل و المصابين بأختناق بيكتروا كل شويه انا مسكت قنبله اتحدفت جنبا لقيتها صنع فى امريكا فى شهر مايو 2011 !!! يعنى بدل ما يشوفوا الشعب عاز ايه بعد الثوره و بيشتكوا من المزانيه راحوا جابوا قنابل جديده اصل اللى قبل كده كانت منتهيه الصلاحيه و على فكره كان فيه قنبله منهم و الله سنه 1983 قبل ما اتولد ب 12 سنه !!!
• عمتا على الساعه 3 كده نزلت قوات خاصه من الجيش فريق المظلات و حاموا الوزاره قلنلهم الجيش دلوقتى بيحمى الشرطه مش الشعب و هتفنا الشعب و الشعب ايد واحده قالوا لنا مش حنعمل حاجه احنا هنا بنحميكم انتوا كمان و مفيش حاجه حتتحدف عليكم تانى المهم مشينا و الكل اتجمع فى الميدان لغايه الساعه 5 كده قرروا يعتصموا لغايه ما الداخليه البلطجيه تتحل
• رجعت بقا البيت بعد يوم طويل و صعب و شاق جرينا كتير فيه و هربنا كتير لقيت انه اتقال علينا بلطجيه و احنا اللى ضربناعم و حنخرب البلد و لكن و الله و الله احنا كنا سلميين و الله على ما أقول شهيد انا شوفت الرجوله و الجدعنه بتاعه الطبقه الفقيره و شوفت الرجاله و البنات اللى بميت راجل بتاعه الطبقه العليا و احترامهم للعسكرى الامن الغلبان اللى مش بيعمل حاجه غير انه بينفذ أوامر ناس هما اللى يتقال عليهم بلطجيه

• بجد اعذرونى انى طولت و اعذرونى انى كنت متعصب انا أسف و اعذرونى برضو على الأخطاء الأملائيه انا بحبوكوا كلكم و بجد بعشق المنتدى الجميل ده قلت اوضح الصوره اللى معظمكم مش شايفها انا الحمد لله ما حصلييش حاجه غير انى اتخانأت شويه و عينى فضلت توجعنى كتير لكن الحمد لله على كل شىء أنا اسف على التطويل و الله على ما أقول شهيد

[ابراهيم جمال محروس]

والله يابني انته خصارتك وعاوزاقوللك حمدالله علي السلامه والبلطجيه لسه ماتقبضش عليهم واللي اتقبض عليه منهم ماتحاكموش
وحمدالله علي السلامه مره تانيه مصدرموثوووووووووق فيه (اوبس طولت عليك)

[Asa7be Wawa]

الله يسلمك و ربنا يخليك يا ابراهيم و الله نورت الموضوع

[soosoo_kotp2000]

انا من ضمن الناس اللى كانوا ظالمينكوا

وص التوضيح

شكراااااااااااااااااااا

[عاشقة الطفولة]

ربنا يستر يا رب

وربنا ياخد بحق كل مظلوم

[soosoo_kotp2000]

وصل يا qqwawa

[msh835]

حمد الله على السلامة ولكنك لم تحضر الموضوع من أوله . المشكلة اللى فى الأول

[العو2000]

و الشباب اللذيد الفانكي رايح عند مبني الوزارة الفجر يعمل ايه..........بيسلام علي العساكر

سنة الحياة الناس بتنام بالليل مش بتلف تعمل شو..

.انا لو سمعت هيصة غريبة بره بيتي الفجر هقول حرامية مش شباب رايق بيهيس عليينا

[alaa20022003]

لابد من تطهير الشرطة من الداخل

أمناء الشرطة الفاسدين الذين يقلبون الحقائق ويرتشون لتغيير المحاضر و..........................

[موسى محمد السيد]

بلا دستور بلا انتخابات عايزين حق الشهيد اللى مات


شهداء 25 يناير...وسام على صدر
كل مصرى وعربى...حقهم علينا نكمل المشوار
ونطهر مصرنا من الفساد والاستبداد...ومن لم يكمل
المشوار فهو خائن لهم وللوطن

عشان كده قررت أكمل المشوار

اوعوا تنسوا...اللى ضحوا بحياتهم عشانكم

هنجيب حقكم ان شاء الله مهما
استمر التباطؤ
وكتر التواطؤ

[Asa7be Wawa]

المشاركة الأصلية كتبت بواسطة soosoo_kotp2000

انا من ضمن الناس اللى كانوا ظالمينكوا

وص التوضيح

شكراااااااااااااااااااا

نورتى يا اسراء الموضوع و الله المشكله الاعلام زى ما هو انا مبصدقش غير النت و مش كله و من عينى بس اعمل ايه اهلى ربونى على كده

[المايسترو mmed]

لا حول ولا قوة الا بالله العلى العظيم
يا رب اظهر الحق وانصر كل مظلوم

[ابو سلمى غزالة]

يارب على كل ظالم يارب وانصر المصريين وارحم شهداء الثورة
يارب ارحمهم

[Dr.Nariman]

لك الله يا مصـــــــــــــــر

[راغب السيد رويه]

جزاك الله خيرا