انا تعبان جدا جدا جدا جدا جدا

[بقايا قلب]

السلام عليكم

معلش .. انا عارف انكم بداتوا تتخنقوا منى جامد

بس هحكى لمين يعنى


انا والله العظيم والله العظيم حياتى مدمره جدا


الوقت خلاص .. يعتبر خلص

وكل يوم بيسلم اللى بعده

وفعلا مش عارف اذاكر

والاقى واحد بيقولى ايه
طب ذاكر حتى ساعتين




اتحسر اكتر وافتكر انى فى يوم كنت هموت نفسى لانى مخلصتش الا هما 8 ساعات بس


دلوقتى

قاعد فى الاوضه

الكتب منظرها وحش

ومش طايق ابص فى الكتاب


كل الناس بتكلمنى ع المذاكره

وكل ما حد يكلمنى اقوله

طب والله ما انا مذاكر


عملت مشاكل كتيرر جدا بسبب المذاكره



..


نفسى اخرج من الحكايه دى

انا بصلى الفجر الحمد لله وبقرا قران

برتاح جدا .. بس مجرد انى اشوف اى حد او اكلم اى حد

بتخنق وبتضايق موووووووت



السنه دى باينها ضاعت


يا خساره التعب اللى الواحد تعبه

[Ahmed_Alex1]

صلى على النبى (قول عليه الصلاة والسلام)
ايه رأيك لو تنزل يوم مع صحابك او مع اهلك تتفسح وتفك عن نفسك حبة ؟؟
وترجع تقرا قرآن حبة وبعدين تصلى ركعتين و تروح تذاكر ..
واتخيل يومك لما تجيب مجموع عالى فى نهاية السنة حيديك دفعة انك تذاكر .. افتكر حلمك وهدفك اللى بتسعي عشانه وقول يارب عاوز احققه واسعي له
اعمل اللى عليك والباقى على ربنا بس ماتحطش في دماغك انك مخنوق من المذاكرة ولا حاجة قول يارب اقرا ادعية المذاكرة وقول بسم الله وابدأ

ده اللى اقدر اقولهولك وانتظر باقى الاعضاء بس افضل حاجة تستعن بالله

[Dr..Soha]

انا والله بزعل علشانكو اوووووووووى طيب انا هقولك على حاجة حلوة خاااااااالص سيب الدروس علشان متقابلش حد يدايقك تانى واحنا نتفق كلنا هنا انا وانت مثلا وناس تانية كلنا تالتة ثانوى ونتفق اننا نذاكر من الساعة كذا لحد الساعة كذا ونفتح نشوف عملنا ايه بس عشان خاطرى متقفلش الدنيا كدة وتقولى مش هعرف لا انت هتعرف ومحدش هينفعك ابدااااااااااااااا انت الوحيد اللى هتنفع نفسك وانت الوحيد اللى هتضر نفسك ابقى شوف دلوقتى قبل متقوم سلسلة نجاح بلا حدود للدكتور العظيم ابراهيم الفقى _رحمه الله رحمة واسعة من عنده واسكنه فسيح جناته_ . يلا بقى قووووووووووووم حااااااالا اتوضا وصلى وانام ساعتين وبعدين نصحى نسمى الله ونقرا قران ونصلى ركعتين ومننساش اذكار المساء ونفضل نذاكر طول الليل علشان الجو جمييييييييل بالليل لكن دلوقتى حرررررررررررررررر اوووووووووى . امنيتى انك تستجيب للكلام ومتقفلش دماغك مفضلش وووووووقت وشوف انت عاوز تذاكر ايه وننظم وقتنا .بالتوفيق.

[doha94]

والله كلنا بنمر بأيام صعبه ربنا يعديها على خير انا كمااان بذاكر بس حاسه الكلام مش بيثبت فى دماغى علشان حاسه انى مضغوطه او انى هنسى الكلام فى اللجنه وبزهق بسرعه

وكماااااااان متخانقه مع البيت كله ما عدا ماما وحلفت انى مش هكلمهم غير بعد ما الامتحانات تخلص

بس انت حاول تناااام براحتك طول اليوم وتصحى تذاكر بليل لما كله يكون نايم والله بليل بيبقى حلو اوووى
ولما تحس انك مخنوق اطلع فى الشباك شويه الهوااااا بيبقى رهيب

ومش مهم انك تذاكر ساعات كتير لو ذاكرت ساعتين بتركيز حلو اوووى ومتعقدش نفسك
وان شاء الله ربنا يكرمنا ويرزقنا كلنا

[mohamed fouadd]

استعين بالله , ادعي ربنا سبحانه وتعالي وخليك ملح في الدعاء انه يصلح لك حالك ويوفقك فيما يحبه ويرضاه

[suzy m]

لاتيئس من رحمة الله ربنا كبير قوى وتاكد انك لو بتعمل فعلا الللا عليك فربنا لايضيع ماعملته لانه عادل وادعى دائما ولا تتشائم واطمان الامتحانات ان شاء الله هتكون كويسه وتوكل على الله واعمل اللى عليك وبالنجاح ان شاء الله المهم لاتنسى تبلغنا بالخير ان شاء الله

[جهاد14]

صلي قيام الليل كل يوم قبل ماتنام صدقني هترتاح واطلب منه انه يهديك للخير

[mzbh1973]

ربنا يهديك يارب و يصلحلك الحال الأعضاء كلهم عملوا اللي عليهم و زيادة في تقديم النصيحة بس فعلا أحسن حاجة بعد الإستعانة بربنا إنك تغير جو بأي شكل تخرج مع أصحابك ، تلعب على الكمبيوتر ، إنشالله حتى تسافر يوم أو يومين تعمل فيهم ريفريشمينت لحياتك و بعدين حتلاقي نفسك كويس خالص

[مرام احمد]

فاضل حوالي 18 يوم علي نهاية شهر 5 ممكن تبدا فيهم في حاجة انا بعملها ذاكر ساعة واحدة في مكان بعد كدة 5 دقائق اعمل فيهم حاجة سريعة اشرب حاجة او تمارين رياضية بسيطة بعد كدة الساعة التانية زاكرها في مكان تاني يعني مثلا الساعة الاولي في الاوضة التانية في الصالة مرة علي المكتب مثلا ومرة علي تربيزة صغيرة وهكذا التغيير هيشيل الملل وكل يوم اعمل تحدي مع نفسك انهردة مثلا ذاكرت فصلين في 4 ساعات بكرة هذاكر 3 فصول في خمس ساعات وهكذا وحاجة كمان شغل قرآن بصوت قارئ هادئ ووطي الصوت شوية وانت بتذاكر ده هيخلي نفسيتك تهدي شوية والسنة ماضاعتش ولا حاجة قادر سبحانه وتعالي انك تكون الاول بمذاكرة الايام اللي جاية ولاتنسي الدعاء

[To Be Is To Do]

بالله عليك أوعى تقول السنه ضاعت... ده كده بيزيد حزنك ومشاكلك أكتر وأكتر
اعمل إللى عليك ف الحبه إللى فاضلين دول وسلمها لله
وإحنا رالله العظيم تحت أمرك ف أى حاجه تطلبها مننا ومش ح نسيبك أبدا بعون الله
ماسيج صغير لأى واحد فينا حتلاقيه تحت أمرك والله

ربنا يعينك ي رب ويوفقك السنادى ويفك كربك ويزيح همك إن شاء الله
آميييييييييييييييييييييييييييييييييين

[SwOrD OF JusTice]

الثانويه زى المرجيحه يوم تحت وفوق ترترترترتى يما ناس مذاكره ومرتاحه وياما ناس زينا


---------------------------------------------------------------------------------------


بص ياسيدى اعمل الاتى : على فكره مش بهزر ده مثبت ف علم النفس


اقعد قول انا هذاكر انا هذاكر انا هذاكر 50 مره


انا بفهم بسرعه انا بفهم بسرعه ... خمسين مره


بحفظ بسرعه .... خمسين مره


وبعدين ادعيلى وهتذاكر

-----------------------------------------------------------

ثانيا حاجه مهمه جدا


بعد ماتذاكر متدورش على الامتحانات الصعبه وتحلها


خليك ف السهل الاول علشان يديك ثقه فى نفسك بعدين ابقى ادخل للى انت عايزه بقلب حديد

[Aya Mn Allah ♥]

وربنا كلنا اتخنقنا من الثانويه
بس لازم نمسك نفسنا ف الكام يوم دول
ونفكر ف اليوم اللى هيفرح فيه اهلنا لما يعرفوا النتيجة
ونفكر ف اهدافنا اللى بقالنا سنتين بنتعب عشانها
مش معقولة نضيع التعب ده كله ف كام يوم
قوم صلى واقرا قران ونام واصحى وابدأ صفحة جديدة ف حياتك
وافتكر دايما ان الله لا يضيع اجر من احسن عملا

[هالة محمد 2]

لا بلاش تقول ضاعت انتا ممكن والله تلحق نفسك بس حط هدف فى بالك وانك عايز تخلص المذاكرة واكيد هتخلص شوف حد يشجعك على المذاكرة حتى لو مش عندك هنا فى المنتدى ممكن حد يساعدك ويشجعك واعمل الى عليك كلنا النسة دى تعبنا مش انتا بس بس الى عندة عزيمة يقدر يتغلب على الى فية كل ما تحس انك مخنوق صلى وادعى من ربنا يفك همك ويوفقك وان شاء الله كلنا نجيب مجاميع حلوة يارب

[THE CodeR]

بص يا صديقي
انا معاك ان الثانوية ملهاش اي تلاتين لزمة في الحياة
لكن زي ما ابويا بيقول (بتقصّر المسافات)
فكر كده مع نفسك ... انتا عايز ايه من ثانوي ؟؟ اقولك ايه الاجابة اللي اكتشفتها بقي :
1- انا بدرس عربي (مع انها نصوص ركيكة و شعر هزيل من اللغة) عشان لما اجي كباحث او دكتور في جامعة بكتب تقرير مكتبش (وقد وجد الباحثين ) أو ماشابه ... انا بدرس اللغة عشان مبقاش جاهل و انا بقرأ القرآن
انا بدرس اللغة عشان اعرف اكتب من غير ما حد ينتقدني (و ما اكثر من يُنتَقَدوا )
حاول تخرج من العربي بالمهارة دي .... غيرك في سنة واحدة اتعلم يكتب شعر و بقي شاعر ... و برة في الدول العربية اللي بيدرسوا عربي بجد بيدرسوا علوم متسمعش عنها زي العروض و المثلثات في اللغة
2- احنا بندرس الرياضيات : اكيد عشان التخصص بعد كده ... لو مكانش عشان التخصص هيبقي عشان ايه ؟؟ طب انا هطلع منها بمباديء مهمة جداً و هتدرسها تاني في كلية
لكن لو فهمتها دلوقت هيبقي ده تقصير المسافات (و الفهم حاجة و انك تعرف تحل مسائل عليها حاجة تانية )
3- بدرس الفيزياء : الفيزياء وصف للطبيعة ... بدرسه عشان يبقي عندي فكرة عن الطبيعة
و الاهم من ده كله يا صديقي انك تبقي عارف ازاي الفيزيائي بيتعامل مع كل ظاهرة في الطبيعة (ده الاهم من النهج نفسه و ده اللي لازم تفهمه) لانك لما تطلع كلية هتحتاج تفكر كتير في حاجات زي دي فحاول تعود نفسك عليها
4- الانجليزي : بتدرسه طبعاً لان ده طريقك انك تفهم مالاتفهم في الحياة .... اقولك حاجة : من كام يوم كنت في الجامعة الامريكية كانوا عاملين عرض في الفيزياء اسمه قطة شرودنجر ، اكتر من نص كلامهم كان بالانجليزي
انا كنت فاهم تقريباً كل كلمة بتتقال علي العلم اني دارس بالعربي عادي .. لكن مكنتش اعرف اتفاعل معاهم لاني معرفش اتكلم انجليزي زيهم ... معرفش اركب القواعد علي بعض ... دي مهارة لازم تتعود عليها و هتتعود عليها بالكلام الانجليزي الكتير او قراءة الانجليزي اكتر (منها قطع الانجليزي اللي في الامتحانات )
هقولك كام نصيحة كده فكر فيهم :
- Think out of the box يعني فكر بطريقة مختلفة في المنهج - دور كل حاجة جت منين و حاول تحقق المتعة في المذاكرة ... و دور علي التطبيقات الحياتية عليها في خيالك و لوحدك كده
- غير الكتب اللي بتذاكر منها : يعني مثلاً جرب تفتح كتاب المدرسة او تجيب مذكرة من علي النت (او الحاجة اللي علي المستوي الشخصي بحب اعملها اني اذاكر منهجي من مرجع علمي او من علي ويكيبيديا )
- اطلب من اهلك يوفرولك الهدوء الكافي عشان تقدر تاخد راحتك في المذاكرة
- لازم يكون عندك مكتب بتذاكر عليه بيريح ظهرك و رقبتك (ضرووووووووووووووووووووووووووووووري لاقصي الحدود )
جرّب الروشتة دي كده و قولي رأيك .... لو منفعش بقي يبقي اسمحلي اخد ايميلك نتكلم عليه إن شاء الله

[eng.emy ahmed]

ربنا معااااااااااااااااااااااااك يارب



استحمل بلاش لفظ السنة ضاعت دى لا مش بعد التعب دا تمل من السنة


اعمل الى عليك وانت قريب من ربنا ربنا هيوفقك ان شاء الله



ومفيش داعى لاحاديث اصحابك اعمل الى عليك والباقى ع ربنا مش اصحابك هم مش هيفدوك ف حاجة ولا هيزعلوا لو حصلك حاجة


انت صاحب قرارك ومصلحتك استحمل وان شاء الله هيوفقك



ربنا يوفقك يا رب