ولادنا هنربيهم على ايه؟؟؟؟؟؟

[الضوء الشارد]

النهاردة عايز اكلمكم عن حاجةفى المستقبل حولت افكر فيها . امبارح وانا قاعد فى الروف بتاعنا باخد مج الكابتشينو بتاعى (معلش ثقافتى انجليزى) سرحت بخيالى كده وفكرت فى الجيل اللى جاى يعنى اولادنا . ياترى هتبقى ظروفهم عاملة ازاى وياترى هيبقى ايه شكل الحياة بالنسبة لهم. وياترى ولادنا هيورثوا مننا الصفات الكويسة اللى مش فينا وبرضك هيورثوا الصفات الكويسة . وياترى هل هيعاملونا بنفس المعاملة اللى بنعامل بيها مع الأباء والأمهات. وياترى هيبقوا اذكى مننا والتكنولوجيا هتبقى متطورة عن كده ؟ . وياترى ظروف بلدهم هتتحسن ولا هتبقى اسوء من ظروفنا . وياترى احنا برضه هنتخانق معاهم ونقول ان طريقتهم غلط واحناكنا صح . وسرحت شوية كمان وفكرت ياترى هيبقى فيه صراع اجيال ذى اللى بينى وبين باباى .وياترى هنربيهم على ايه . يعنى هنقولهم ان احنا كنا احسن ناس فى جيلنا وماكناش بنغلط . وياترى هنربيهم على الشجاعة ولاالجبن . وياترى انت او انتى لم هتيجى تربى ابنك هيبقى مين مثلك الأعلى فى التربية. وياترى جيلهم هيقول ايه عن جيلنا.وهل هنربيهم بنفس طريقة تربيتنا . فكرت كتير وسرحت وفجأة سمعت صوت حد بينده عليا عشان ياخد الكوباية منى يغسلها . فبطلت تفكير وسألت نفسى ياترى هنربيهم على ايه.؟؟؟؟