ندالة أهلها

[أسيل رزق]

السلام عليكم ورحمة الله وبركاته

لقيت القصيدة الجامدة اللى هتقروها دلوقتى وكنت عايزاكم فى حاجة فى آخر الموضوع

ميت ألف فرصه عشان أسيب مصر
ولا عمري سبتها
علشان هى بلادي اللي بجد بحبها
بحبها بكدبها وصدقها
بحب فيها أصالة وندالة أهلها
بحب فيها السهر بحب
زيفها وأصلها
بحب فيها طلعة الشمس
تنور وشها
بحب فيها القمر طالع
يغازل حسنها
بحب فيها المشي علي شط
نيلها وبحرها
بحب فيها بناتها
راسمين ملامح شعبها
دي بنت مايصه وحاطه
ورده فـ شعرها
ودي بنت جد ونازله
جري لشغلها
هتلاقي فين بلد
فيها الكنايس والجوامع
بتحضن بعضها
مسلم مسيحي إخوات
راضعين طيبة من صدرها
نبع الحنان ويناموا حاضنين
أرضها
هتلاقي فين تاني بلد
كل حاجه فيها
تخليك تحبها
هتقولي ظالمه هقولك
برضو بحبها
هتقولي ضالمه
مهو ده سواد شعرها
هتقولي زحمه هقولك
علشان بنعشق أرضها
هتقولي فيها فساد
هقولك ده من طيبة شعبها
جرب كده تسهر ولو وحدك
علي ضف نيلها وحبها
جرب تشوف بنت حلوه
مع شاب واقف جمبها
بيحبها شايل في قلبه
هموم الدنيا كلها
وبرضو بيحبها
جرب كده تاكل دره وترمس
علي شطها
وتشوف وشوش الناس
واضحك زيها
طب وانت ماشي لوحدك
ووقعت في مشكله
مش بتلاقي ألف واحد
جمبك بيحلها
لا تعرفهم ولا يعرفوك
بس جمعكم حبها
أهي هي دي مصر
زاحمه ظالمه
فاسده ضالمه مش مهم
ده كفايه خفت دمها
هافضل لمصر أقول وأعيد
أنا أصلي عاشق أرضها

وطبعا ده كله كلام في الهوا
أنا لو تجيني نص فرصة هقول لها
بالسلامه يا مصر
ومش عايز أشوف وشها
وهي دي بقى ندالة أهلها

طبعاً اللى قراها ضحك لما شبع ضحك .. بس أنا لما لقيت القصيدة دى وكانت فى أكتر من منتدى عربى ومش قادرة أقولكم قمة الاستهزاء بينا شكلها عامل إزاى من الإخوة العرب المحترمين

أنا عايزة أقول مثل بسيط يا ريت يعرفوه : تعرف فلان؟؟ أه أعرفه .. عاشرته؟؟ لأ .. تبقى ماتعرفوش

لو الشعب المصرى ندل فعلاً مع إنه مش كده .. يبقى الوطن العربى كله يبيع أهله علشان اللى فى باله

بس كده دا اللى كنت عايزة أقوله .. ولو بإيدى كنت حطيت الموضوع فى العام