وحشتينى

[الشاعر/محمد علي]

ويدق قلبى وينخلع لما أقابلك بعد ما كنا حبايب مش قادر أقولك وحشتينى ولا قادر أبص فى عيونك


وحشتينى

وحشتينى ياللى نور عنيكى
لسَّـــــه فَاكرُه
لسه شايف ضحكِتِك
لسَّه جوايا كلامِك
لسَّه فى إيديا سلامِك
لسه كُوم الأسئله
من غير إجابه
لسَّــه الديابه
عمَّاله تنهش فى اللُّقا
واخاف
أجرى بعيد
والا أقـــرَّب
والا أجــرَّب
مصل الشجاعه
مرمِى ف طريق مــش لاقـــــــى آخـــره
وانتى هناك
والبلاد بينــك وبينى
والبعاد قاسى علينا
والقلب حاير
والقلب ثايـر
وايه ينفع يوصلنى أول بلادك
ومين يقدر يحصلنى
بسلاح كتير
ومين يقدر يبصرنى
بخرايط الدنيا
ياللى عنيكى هىَّ الخرايط
سيبانى واقف
مش قادر أفرد فى الخطاوى
مش لاقى سكه
ولالاقى ضحكة
ترسم طريقى
بعد ما كنتى طريقى
مش لاقى بيت
لما أعدى عليه أحن
لما أشتاق له أكن
روحى رايحه من كيانى
وألقانى
من غيرك وحيد
ألقانى من غيرك شريد
ألقانى عطشانك
ألقانى داير ع الموانى
مستنى رجوعك
مستنى تحنى
ياللى اخترتى بعادى
وحكمتى ع المحكوم عليه
وعرفتى أنا من غيرك ايه

مع تحياتى
محمد على