جهاد إيه بس
خلينا ماشيين بالعقل
نفرض إننا هنروح نجاهد .. هنضرب فى مين بالظبط ؟؟
أكيد إسرائيل .. طيب وحماس وفتح دول لازمتهم إيه
لما هما شغلتهم هناك يضربوا فى بعض وسايبين الدنيا تضرب تقلب .. لما مصر تروح تحارب إيه اللى هيضمنلنا إن فتح أو حماس مايغدروش بينا ويضربونا فى ضهرنا
لما يصفوا مشاكلهم مع بعض يبقى نفكر نروح نحارب
ده أول سبب
سبب تانى
اللى بيروح يحارب بيكون عنده كفاية ذاتية
طيب ،،إحنا تقريباً إسمنا مصر .. يعنى فى حوالى 30 مليون مصرى مش لاقى لقمة عيش .. ودى حقيقة ويمكن أنا مش عارفة أوضحها كمان .. بقى عندنا نص الشعب مستواه تحت الحديدة ونروح نحارب !! طيب إزاى؟!!!!
السبب التالت
مصر لواحدها مش هتقدر تدخل تحارب .. وماتنسوش إن إسرائيل حبيبة أمريكا
السبب الرابع
إنتصارنا فى 73 ماكنش إنتصار كامل .. هتقولولى لأ طبعاً إنتصار كامل .. هقولكم لأ بنود المعاهدة بينا وبين اليهود كانت فى صالحهم .. و أقلها إننا ماندخلش فى حروب ضد إسرائيل
السبب الخامس
تشتت العرب .. كله هيخاف يحارب .. مهو برده دى أمريكا وإسرائيل .. مش هنروح جهجهونى كده ونضرب أى حاجة وخلاص
طيب هننقذ غزة إزاى ؟؟!!!
الإخوة اللى إتهموا مصر بالخيانة والإتهامات المقززة بتاعتهم
بتهيقلى مصر الوحيدة اللى بتساعد غزة مساعدة كبيرة جداًً من نقل دم ل تبرعات عينية ل علاج الجرحى وده أكبر شىء نقدر نقدمه ليهم بعد الدعاء طبعاً
و على رأى المثل على قد لحافك مد رجليك
و طبعاً كلهم هتعارضونى .. دا جهاد فى سبيل الله .. انتى خايفة انتى...
مش خوف ولا أى حاجة
وكلنا بالتأكيد نفسنا نمسك ولو حجارة ونحارب بيها
بس ربنا ميز الانسان بالعقل والحكمة
هتقولوا إحنا بنقول من غير تورط أى حكومات
هقولكم هتبقى الحكاية طبعاً من غير نظام ولا شكل ولا أى حاجة فا بالتالى يبقى ماعملناش أى حاجة
لذلك فإنى لا أؤيد فتح باب الجهاد إلى غزة الآن
20-01-2009, 10:48 PM
العرض الشجري
