معانا مش هتقدر تفتح عينيك....أصحاب القلوب الحُونينة يمتنعون...متجدد(أسدات وماجدولين)

[د/ ماجدولين]

اية الموضوع؟؟!!
وأنتوا مين؟؟؟...........ومش هنقدر نفتح عنينا لية ان شاء الله؟؟
ولية أصحاب القلوب الحونينة ميدخلوش؟؟؟
يعنى هل دة اتهام ان احنا قلوبنا قاسية وبنخوف العيال
أولا
يا سادة إحنا الأختين الحلوين
أسدات وماجدولين
ومش هتقدروا تفتحوا عينيكوا....عشان اللى هنقولة
هيجيلك بعدة سكتة قلبية
وتغمض عيونك العسلى......وتنعم بالنوم الدائم والهادئ فى قبرك
Rest in peace
وهو دة غاية أمانينا وأحلامنا
وكدة نكون حققنا رسالتنا فى الحياة
الموضوع يا سادة ان احنا هنتكلم عن الرعب
أكيد طبعا مش جايين ومشمللين عشان نحكيلكوا حكاية أبورجل مسلوخة
والسلعوة اللى بتاكل العيال اللى مش بتسمع الكلام
والعفريت اللى يعض صوباعك لما تحطة فى بوقك
ولا كمان هنكلمكوا عن جثث مكونة من خمسمية حتة
وعيون مُقتلعة من جثث أصحابها
وأحشاء الإنسان عندما يطردها جسدة خارج غشاء البريتونى لما يطلع علية اتنين بمطوة قرن غزال بعد نص الليل
لأن دة قرف ....مش رعب
احنا هنتكلم عن الرعب النابع من احساس الخوف من المجهول
هنتكلم عن الناحية الأخرى من حائط شديد الإرتفاع
وهنتكلم عن أسرار مدفونة منذ الأزل يتناولها الناس فى همس
وعن الطارق الذى يدق بابك بعد منتصف الليل
وعن كتب كان يحرق من يمتلكها دون نقاش
هنتكلم عن سبب عواء الكلاب وانتصاب شعر القطط
كل الأمورو السابقة تشترك فى شيئ واحد
أنها شيئ مجهول وغريب بالنسبة لك
هتقولولى مجهول .....ماشى
لكن غريب...هنخاف منة ازاى؟؟
هقولك براحة بس وتخيل معايا كدة
انك ماشى فى الشارع فى عز الضهر
ع الساعة تلاتة قبل الفجر كدة
وطلع عليك اتنين مساطيل
ولا قدر الله...فتحوا عليك المطوة
وأحدثوا جرحا لابأس بة أسفل المعدة
وانت داخل ع الطحال كدة والبنكرياس على شمالك
طبعا حضرتك متوقع نافورة من الدم
والحقوووووووووووونى
بس فجأة
ملاقيتش دم ....مفيش وجع
طحالك وبنكرياسك مية مية للأسف

متقوليش انك مش هتتخض
وهتفرح وتهيص وتقول أنا سوبر ماااااااان يا جدعاااااااان
وتشكر المساطيل اللى عرفوك كدة
وتطلب منهم مطوة فى عينك على سبيل التأكيد مش أكتر
دة أنت هتموووووووت من الرعب
يا ترى فيا اية؟؟؟
اية اللى غلط
أنا منزلتش دم لية؟؟
للدرجة دى معنديش دم ولا أحساس
بجد بجد ...رعبك فى الوقت دة هيتعدى رقم ستة على مقياس رختر
أعتقد كدة الموضوع بقى واضح
لو حد لسة مفهمش قصدنا
بنصحة نصيحة خالصة
أنة ينط من فوق السطوح أو يشرب سم فران أو يولع فى نفسة
صدقونى
الحاجات دى نتائجها رائعة ومضمونة جدااااااااا
ان شاء الله يوم السبت من كل أسبوع
اشمعنى السبت؟؟!!
هل الليلة دى مرتبطة بحاجة مرعبة زى ليلة اكتمال القمر مثلا
لأ يا فالحين
السبت عشان دة المعاد اللى فاضين فية...!!
فى اليوم دة
هنكلمكوا عن حاجة من الحاجات اللى قولنا عليها
وهننتظر أرائكو الصائبة اللى من غيرها العالم يوقف بدون تقدم

وعقارب الساعة تتجمد فى مكانها

وفى الأسبوع التالى
هيكون معادنا مع حلقة جديدة
الموضوع سيستمر الى أن يمل أحدنا الآخر
أو النت يبوظ فى مصر
أو نخلى عندنا دم ونبدأ نذاكر بجد من الترم التانى
يعنى ايهما أقرب
ها اية رأيكم؟؟!!
عموما سواء وافقتم أو لأ
هننفذ اللى فى دماغنا

أسدات وماجدولين

________________
ملحوظة صغيرة..
أسدات هى صاحبة الفكرة الأصلية للموضوع
وأنا دراع الباشا مش أكتر