من سيد درويش ...للدكتور نظيف

[أحمد بلما]

من سيد درويش.. للدكتور نظيف

أحمد نظيف
مساهمة: شفيق سلوم

الحلوة دي قامت تفْطر ما لقيتشي رغيف
والديك ينوِّح كوكوكوكو باردون يَا نظيف
وحكومة عايقة وذكيَّة وميّه الميّه
وقعدة طريّة تحت التكييف
***
صبح الصباح فتاح يا عليم والبيتْ ما فيهشي ولا مليم
لا صحَّة نافعة ولا تَعليم في الزمن الزَّيّف
يا مصر يا مّه أنا فْ عرضك حرست طولك مع عرضك
والعصبة دي سرقت أرضك الطف يا لطيف
***
يا مصر يا مَّه الله يسامحك ملامحي ما عادتشي ملامحك
النيل حداكي وفين قمحك جاوب يا خفيف
لمّا المسائل قوى ماعت والأرض بالمتر اتباعت
الناس في أرض النيل جاعت في الشتا والصيف
***
طول عمري شقيان وباعافر طبْ ما انتى عارفة الجوع كافر
أنا ح اركب البحر واسافر أصطاد لي رغيف
ولو غرقت ابقى هاتيني وف قلب حُضنك ضميني
وبطلي عياط وورِّيني وبدون مصاريف
***
القمح بييجي لْنا إعانة واللقمة متعاصة إهانة
الشلة تلهط إلاّ أنا أنا أصلي عفيف
فبقينا في العالم عبرة خارج التصنيف
والحلوة دي قامت تفطر ما لقيتشي رغيف