فكر شوية كدة!!

[Reham1222]

السلام عليكم
انا بصراحة عاوزة اتكلم عن افشل حاجة فى مصر وهى التعليم
وهبدأه من الحضانة للجامعة
الحضانة: ليه كل الناس فى مصر بتستسهل موضوع الحضانة دة اوى ؟ فكر كدة شوية.........
فكر كدة شوية لو الناس اهتمت بيه مش بزمتك لما الاطفال هيدخلوا المدرسة هيبقوا احسن بكتير
ومش هيخافوا طبعا يقعدوا فى المدرسة لوحدهم زر زميلة لى من 8سنين او 9 فاتوا ما كنت فى اولى ابتدائى
وفى اول يوم من المدرسة كانت هى بتعيط جامد جدا وبتصرخ لدرجة انهم جابوا لمامتها كرسى وقعدوها جنبها فى الفصل!
وطبعا انا كنت فرحانة جدا بالمدرسة يوميها واول لما ماما قالتلى هروح قلتلها روحى خلاص لانى وبكل بساطة كنت فى حضانة
من قيل كدة.

الابتدائى: ليه طبقوا نظام ان الاطفال تدرس انجليزى من اولى ابتدائى لو كانوا فاكرين ان دة فى مصلحة الطفل لأ يبقوا فاهمين غلط. ازاى طفل صغير لسة فى بداية تعليمه يقدر يدرس عربى وحساب ودين وانجليزى طبعا مع وجود مواد ملهاش لزمة فى 1 ابتدائى
هما لو عاوزين يطلعوا جيل كويس لو كان دة قصدهم من انهم يدرسوا الانجليزى من 1 ابتدائى
فمش لازم لان وبكل بساطة دول اطفال يعنى بيحبوا اللعب مش هيقدروا على كل دة
بس فكر كدة شوية لو كان الانجليزى دة من 2 ابتدائى اكيد كانت هتفرق كتييييير......................

وكمان حكاية 6 ابتدائى دى ملهاش لزمة ! ليه يعنى يضيقوا سنة على الطلاب وخلاص
السنة دى ملهاش لحد دلوقتى اى ايجابيات من وجهة نظرى
فكر كدة شوية ..... ولاحظ ان السنة دى 2006-2007 مش هيبقى فيها تالتة اعدادى
وفى سنة مش هيبقى فيها 3 ثانوى وبالتالى مفيش تنسيق!
ومفيش دفعات جديد فى الجامعات وطبعا هييجى سنة ومش هيبقى فيها دفعات تخرج
لا من طب ولا صيدلة ولا هندسة ولا اعلام ولا شرطة ولا حتى من اى جامعة
غير الحالة النفسية اللى طبعا الطلاب فيها لانهم من وجهة نظرهم خسروا سنة من حياتهم!
(الحمد لله فلت منها لانها اطبق على الدفعة اللى بعدى)


الأعدادى: (يا ساتر يا رب من الدروس)
جينا لمرحلة الاعدادى وكتررررت اوى الدروس الخصوصية
انا بالنسبة لية وهنا فى محافظتى الدروس مش زى القاهرة لأ
هنا الطلبة هما اللى بيروحوا للمدرس فى حجرة الدرس
(مدرس يأجر شقة فى دور منخفض والطلبة هما اللى يروحوا عنده علشان ياخدوا درس)
وطبعا مفيش مجموعة بتقل عن 20 فرد!
وفيه كمان بيبقى فيهم بال35 فرد
يعنى كأنه فصل
وطبعا دة سببه ان المدرسين مش كلهم بيشرحوا حلو فى الفصل
وعلشان كمان اعمال السنة (لما تأخد عند مدرس الفصل درس خصوصى يديك اعمال السنة كلها) مبدأالعصر الحديث!


الثانوى: (دخلاه ربنا يستر)
ليه مثلا اولى ثانوى فيها كل المواد دى وكمان فيها اعمال سنة
وليه فى 2 و3 ثانوى العيال تذاكر من اول السنة لاخرها وفى الاخر الامتحانات تيجى اصعب من الصعوبة ومايجبوش مجموع
وينتحروا!

وطبعا محدش بيلحق الكلية اللى هو عاوزها!

وانا انهاردة جايبلكوا أسماء كليات خاصة كتير
زى 6 اكتوبر
جامعة مصر للعلوم والتكنولوجيا
(دول فى مدينة 6 اكتوبر)
جامعة الشروق(الاسكندرية)
جامعة العاشر من رمضان (مدينة العاشر من رمضان)

الجامعات دى فيها كل الكليات

والتنسيق فيهم اقل من التنسيق الحكومى
مثلا جامعة 6 اكتوبر بتقبل الطلبة اللى جايبين80%
فى كليات الطب والصيدلة والاسنان والعلاج الطبيعى
جامعة مصر للعلوم والتكنولوجيا ودى جامعة محترمة جدا
بتقبل تقديم الطلاب للطب البشرى للى جايبين مثلا94%
والصيدلة 91%
والاسنان 93% تقريبا

بس طبعا مش كل الناس تقدر على الجامعات الخاصة دى لانهم بيدفعوا دلوقتى مثلا حوالى 35 الف فى السنة علشان يدرسوا طب بشرى مثلا وكل سنة الفلوس بتزيد كمان
دة غير ان فى جامعات بتاخد بالدولار ودة نظام السنة دى فى جامعة 6 اكتوبر
فكر كدة شوية لو كانوا المسئولين فى الوزارة حاسين بكل دة مش كانوا فكروا صح
وكان التعليم بقى احسن
بس يا خسارة دلوقتى بقوا كل اللى فى الثانوى محطمين وبقوا بينتحروا
ومقولة ان الشعب المصرى اذكى شعب فى الوطن العربى شكلها كدة هتتغير قريب اوى

شفت بقى اللى بيحصل والظلم اللى ماسكنا من الحضانة لحد الجامعة

اتمنى الموضوع ينال اعجابكم
ومستنية تعليقاتكم وردودكم
ريهــــــــــــــــــــــــــــــــام egyptian girl