كفاية انا بجد تعبت

[كــارمن]

السلام عليكم ورحمه الله وبركاتة

انا عندى مشاكل كتيرة قوى وخلاص مبقتش قادرة استحمل حاجة ودخلت فى مرحلة انى قربت اعزل نفسى عن الناس كلهم لان بقى فى نظرى كل الناس الى اعرفهم عايزنلى الشر

هدخل فى الموضوع علطول

انا تميت السنادى ثانوية عامة علمى علوم بمجموع 95 ونص فى المية

شعبة علمى علوم

كنت فى سنة تانية جايبة مجموع عالى يعدى 99 فى المية

بس هو دة نصيبى المهم انا رضيت وحمدت ربنا رغم انى كنت هموت من صدمة مجموعى

انا مكنتش بسيب الكتب ليل ونهار بذاكر

مكنتش بنام وحليت الامتحانات كلها كويس

بس حمدت ربنا وهو اكيد لية حكمة فى كدة

بابا وماما اتصدموا وبقيت كل ماشوفهم اعيط لان انا كسرت قلبهم من غير ما اقصد

وهما بسبب مجموعى بقيت كل شوية اسمع اهانات وتجريح فيا

وقدام الناس يبينوا ان الموضوع عادى ولما نبقى لوحدنا يزعقوا فيا

ويحسسونى انى سبب الحزن فى بيتنا

اكتر منا حاسة بكدة

ماما قالت انها هدخلنى جامعة خاصة وقالت الموضوع لبابا وبعد معارضة شوية وافق

وقدمت الحمد لله وقبلت

وابتدى جو البيت يهدى شوية

وكنت فاكرة ان كدة خلاص هرجع لحياة مستقرة زى زمان

بس للاسف الذل زاد فيا اكتر من اخواتى من ناحية وبابا وماما من ناحية

بابا كل شوية يفكرنى انى داخلة كلية بالفلوس وانة

فى اى وقت ممكن يحرمنى منها

وماما نفس الكلام دة غير مابقعدوا يعدوا عليا زمايلى الى جايبين

درجات عالية

ومن يوم النتيجة الى الان وانا مش عارفة اعمل اية

وجالى فى التنسيق طب بيطرى

وكل شوية عمالين يقولولى انتى خلاص مبقاش ليكى وجود فى البيت

ولا ليكى كلمة على حد من اخواتك الاكبر والاصغر

لانك فاشلة

الكلمة دى سمعتها مليون مرة

انا بجد زهقت من حياتى من الناس من كل الى بيضايقونى وانا معملتلهمش حاجة

قولولى اعمل اية انتم الامل الوحيد الى ليا
والحمد لله على كل شىء