أحمد يا شوقي .. كلنا أحبابك

[أحمـدنجـم]

يا ابو قلب صغير وبيقدر يوسع للناس
يا أبو قلب حنين و مبين صدق واحساس
يا ابو قلب اتعذب كان نفسه يلقى الإخلاص
يا أحمد (شُوقي) بيشيلك في العين ع الراس
************
انا هجمع كلمة وكام كلمة وهعملهم صحبة
يبعتهم قلبي هوا لقلبك ويكونلك صحبة
وافضل احكيلك اغنيلك اشواق ومحبة
قوم يا أحمد يلا نسهلها الأيام الصعبة
************
وبحسك ابني وضنايا بتجمعنا ملامح
وكلامك حرك جوايا حكايات امبارح
وحكاوي كتيرة تقدمها سينما ومسارح
نتألم لكن في قلوبنا هنا شوقنا وطارح
******
فتحولك قلب اكيد شافوا كام سهم ورمش
كام قصة حب وحدوتة شوق ما بتكملش
وان نامت عينك لقوا عين القلب ما بتنامش
وف قلبك صورة لحبيبك اللي ما رحمش
***********
قوم يا أحمد وارجع هنا لينا كلنا احبابك
قوم وافتح صدرك للدنيا وافتح لها بابك
انت اقوى بقلبك صدقني واقوى بشبابك
خليك ملهوف ع اللي يحبك
يلا انسى قلب نسا وسابك
قوم يا أحمد
وارجع
هنا لينا
كلنا أحبابك