يا خالد قوم من قبرك

[حميد بدوى]

يا خالد قوم من قبرك

وقول مين موتك ومين ضربك

وقول مين عذبك ومين قهرك

قول مين ذالك ومين سحلك

بيقولوا الداخلية برئية من دمك

هو انت يعنى الاول ولا الاخير

كل يوم فية كتير زايك

ماهو دة فايدة الامن والنظام

أنها تحرق قلبنا وقلبك

انها تكسر عضمك

يا خالد أطلع من قبرك


والله حتى لو طلعت

والله لو بعد الموت نطقت

ماحد هيسمعلك

هو انت لما كنت بتموت

كان مين رحمك

كان مين سمعك

ياخالد قوم من قبرك

يمكن نقوموا بعدك

يمكن نقوموا بعدك

مش انت لوحدك اللى مت

دا احنا كلنا ميتين من قبلك

يمكن نقدروا نأخدوا حقنا وحقك

كل الناس اللى شاهدوا

محدش سمعهم طظ فى كلامهم

هما ما بيسمعوش غير نفسهم

التقارير كلها جاهزة عندهم

بيقولوا انك مسجل خطر من زمان

و عليك قواضى وعليك احكام

وكويس انهم ريحوا البشرية منك

تقرير الطب الشرعى اول وتانى

بيقول ان البانجو عملك احتباس حرارى

اه يا نارى


هما يعنى هيغلبوا ما هما اتعودا

وكل الجرايد الحكومية بتقول انك مفترى

وحتى وانت ميت على الناس بتفترى

وأنت اللى خنقت نفسك بنفسك

وأنت اللى كسرت ضلوعك وكسرت الجمجمة


ومحدش فيهم جه ناحيتك ولا لمسك ولا قالك مرحبا


انت اللى طحنت نفسك بنفسك ودخلت المفرمة

وظلمت المخبرين علشان مهما ناس طيبة

والواحد فيهم ايدية مطرحتين

انا عارف ان القضية مش قضية مخبرين

القضية قضية شعب كاتم

وساكت وشايل الطين

وميعرفش حقة فين

ومكسور الجناح ومطاطى الجبين

معندوش ارادة طيب هو هيجيب الارادة منين

وصورة خالد قدامة عينة

القضية قضية دولة عدوها الاول هو شعبها

ودايما شيفاه حمل تقيل على قلبها؟؟؟؟؟؟؟؟؟؟؟

وعايزة تخلص منه ومش عارفة تودية فين ؟؟؟؟؟؟؟؟؟؟؟؟؟؟؟


الشاعر
عبد الحميد بدوى