معلم مساعد

[aladdin027]

يوم الخميس اللي فات قلت أعمل فيها بطل و أروح الادارة أستفتسر عن تأخر قرار التعيين ، اللي حصل بأه :
أول واحد رحت له راجل جدع أوي ، و بأستبشر خير بوشه لأنه أول واحد بشرنا بالعقود اللي جاتلنا من سنتين ، اتقدمت خطوة و اتأخرت اتنين و قرأت المعوذتين في سري و كأنني داخل بيت أشباح
المهم دخلت عليه المكتب و كان هذا الحوار :
- السلام عليكم يا حاج / أحمد
- و عليكم السلام اتفضل يا بني
- و الله كنت جاي أسأل علي التعيينات .
- تعيينات ايه ؟ و الله يا بني الكلمة دي ما سمعتهاش من زمن ، هوا لسه الحكومة بتعين حد دلوقت ؟
- يا حاج أحمد انت مش فاكرني و لا ايه ؟ أنا علاء المدرس المساعد
- المساعد ربنا يا بني
ابتدا شعور التحفز و الانقضاض يستعد داخلي و أنا أقول :
- يا أستاذنا فيه ايه ؟ حد مزعلك و لا ايه ؟
- يا بني انت عايز ايه بالضبط ؟
- احنا دخلنا امتحان الكادر و نجحنا و مستنيين التثبيت ، و كنت جاي أسأل ما فيش جديد ؟
- في ايه بالضبط ؟
عندها فقدت أعصابي ، و صحت قائلا :
- و بعدين يا أستاذنا ، حضرتك مش معايا خالص ، هما كلمتين و رد غطاهم ، في أخبار جديدة و لا لأ ؟
- ممكن تسأل فوق في الدور الثاني في قسم التعيينات
- طاب ما تقول كدا من الصبح يا أستاذنا !! الظاهر انك
ما اتسحرتش كويس امبارح ؟
- لا يا بني ، بس انت دخلت عليا و انا بعمل حسبة مصاريف العيد و المدارس للعيال .. اعذرني ؟
- و لا يهمك ، و ربنا معاك ، لكن مش الكادر سد شوية معاك ؟
- لا و الله يا بني ، حتي الكادر مش (كادر) يسد المصاريف الكتييييير دي

و تركته متوجها للدور الثاني

انتظروا
الجزء الثاني