هدوم العيد .. كله جديد ف جديد

[أحمـدنجـم]

سألتني منة (بنتي)
بابا يا بابا انت جبت هدوم العيد؟
وسألني يوسف (ابني) نفس السؤال
وكمان محمد من لحظتين نفس السؤال
بابا يا بابا أنت جبت هدوم العيد؟
بصراحة دخلوا عليا على سهوة
خلوني نسيت ع النار القهوة
لحد ما فارت
ونزلت ما بنهم غطوني
وعيوني اتدارت
وقالولي بابا يا بابا يا أحلى بابا
يعني انت تعبت وقاسيت
ونزلت السوق مع ماما في الحر
لفيت
جبتلنا يا بابا كل جديد
وانت مجبتش ليه يا حبيبنا هدوم العيد؟

أصلي نسيت

ولقيت الفرحة حقيقي جوه عيونكم
ولقيت الفرحة ف لهفتكم
جريتكم ع الشنطة في ايدي
شايلة هدومكم
بتقيسوا حاجتكم حلوة عليكم
بتحلي كل الدنيا في عيني
بتخلي سنيني كلها عيد
بجد نسيت
أصلي اتربيت على كده يا ولاد
جدو ونينه كانوا يجيبوا الدنيا عشانا
وينسوا حتى يجيبوا عشانهم منديل
ولو هتضلم يوم الدنيا علينا يقيدوا
حبنا في قلوبهم مليون شمعة قناديل
بجد نسيت
لكن حسيت
إن دولابي اتملى بهدوم من عند باريس
وقميصي العادي يا أولادي
لما بتفرحوا
بكون جواه وكأني عريس
وبحس بكل بيبان الراحة اتفتحت
واتشالت كل الترابيس
بجد نسيت

وانا بتكلم
ولاد الايه مشيوا وسابوني
ضحكت وقولت ولاد الايه
هم صحيح كده بيحبوني؟
قولت اكمل قهوتي
من فرحتي نسيت قهوتي بتكون مظبوطة؟
ولا زيادة ؟
ولا ...
فجأة لقيتهم بيشدوني

بابا يا بابا قولنا رأيك
رأيي في ايه؟
اصلنا حوشنا مصروفنا
وجبنا عشانك لبس جديد
قولنا أكيد راح تنسى أكيد
تاني عشانا .. هدوم العيد
..
ولاد ايه كده بيحبوني
نزلت ما بينهم وهروني
قصدي ,,, هههههه ,,,, باسوني
ولاد الايه...