كل شئ زاد سعره إلا البشر!!!!

[وردة امل]

الموضوع حلو
لانه بيمس اغلب الشعب المصري
كأسر متوسطة او حتى فوق المتوسطة
فمابالك بالاسر اللي تحت خط الفقر

بالنسبالي انا ماستغنيتش عن حاجة
مش شطارة مني لكن الحمد لله نقدر نجيب اللي نفسنا فيه
انما بجد اللي صعبان عليا ان فيه اسر ماتقدرش
يعني ايه كيلو الطماطم يبقى ب 10 جنيه
والكوسة في البيت بيتك بيقولوا بقت ب 16 جنيه
طب دا مفيش اكتر من الكوسة في بلدنا
انا اصلا لا بحبها في الطبيخ ولا في التعامل
بلاها كوسة
لكن هانقول بلاها ايه والا ايه والا ايه
طيب ايه بقا الرخيص اللي الكل يقدر ياكله
الفول؟؟؟؟؟؟؟؟؟؟
مابقاش رخيص
والطعمية بقت اد حبوب المغص
العيش ودا حلته تصعب على الكافر
طب هنا في بلد زي الاسماعيلية العيش فيها يعتبر جميل في مناطق كتيرة

انما فيه محافظات تانية ماتقدريش تاكلي العيش
وكمان ماتقدريش تبصيله وانتي بتاكلي لتقرفي من شكله " استغفر الله العظيم "
يعني هناك بيضطروا يشتروا عيش غير مدعوم
الرغيف بربع جنيه
تخيلي الاسرة تاكل بكام
دا اذا افترضنا ان الكل بيلاقي ياكل اصلا !!