ارائكم تهمني ..ارجو من الجميع الدخول ..

[ياسمينايا]

السلام عليكم ورحمه الله وبركاته..

الاول كل سنه وانتو بالصحه والسلامة ..

انا ترددت كتير قبل ما اكتب الموضوع ده..بس اكتشفت ان انا لحد دلوقتى مضايقة ..

بصو ياجماعه ..انا بدرس اللغه الاسبانيه فى الجامعه ..ومن ضمن الدكاترة ..البيدونا فى دكتور اسبانى الجنسية ملحد الديانة ..بيدينا ماده اسمها مقال ..وبيخلينا كل اسبوع ..نكتب موضوع او مقال عن حاجه معينه ..
وهو بياخد مننا المقالات عشان يصححها ..المهم فى احدى المقالات ..قبل ما اكتب الموضوع ..كتبت (بسم الله الرحمن الرحيم )..لما ادانى المقال ده بعد تصحيحه لقيته كاتبلى جمبب(بسم الله ..)ان ده مش عقد كتب كتابي عشان اكتب العباره دى..ده مجرد تعبير انشائي في الجامعه مش مستاهل ان انتى تكتبيها ..
بصراحه انا مكنتش مستوعبة ..ومصدقتش..كل الكلام ده ..عشان العباره الانا كتبتها ..
قولت لا لازم أساله هو كتب التعليق ده ليه ..لانى شايفه ان مفهاش حاجة ..المهم رحت وسالته ..قعد يقولى الموضوع مش مستاهل ..ومتفتكريش ان انتى لما تكتبي العباره دى ربنا هيوفقك وهتجيبي درجه حلوة فيه ..انتى هتجيبي درجه كويسه..عشان انتى الكتبتيه كويس وانتى الفكرتي فيه ..من غير اي تدخل ..من ربنا((بجد أستغفر الله العظيم ))..المهم انا قعدت افهمه ان دي حاجه متعودين عليها في مصر ..راح قالى انا بتنرفز اصلا لما بشوفها على الصبورة او فى اي كتاب ..قولتله انا هاكتبها ومظنش انها هتعمل مشكلة لحضرتك ..قالى انا كان ممكن اصلا اشطبلك عليها ..((كانه بيهددنى يعنى ))..وصمم يكمل كلامة عن الموضوع على نفس المنوال ..طبعا انا معرفتش ارد عليه كويس لان هو كان بيتكلم اسبانى ..وانا لسه مش متمكنة في اللغه قوى ..النرفزني ..ان كان معايا بنتين صحابى وكان مبينين له ..انهم متفقين معاه جدا ..وهو ده الادالو الفرصه انو يكمل كلامه المش عارفة اوصفه بحاجه تعبر انا مضايقه منو قد ايه ..
فى ناس قعدت تقولى بلاش تكتبيها عشان هو ممكن يبقى بيشرب خمرا مثلا ويحطها جمب الورقه بتاعت المقال ..او ممكن يبقى راميها ع الارض..المهم انا فى المقال البعديه مكتبتهاش ..فلما خد منى الورقه اخر مره كان باين عليه انو مبسوط جدا ..حاسس بالانتصار ..يعلم ربنا انا مكتبتهاش ليه ..اولا عشان ميكنش بيحط جمبيها خمرا ولا حاجه اثناء ما الورقه بتكون معاه ..ثانيا ..عشان ميصتقددنيش في الدرجات وانتو عارفين الدكاترة ..وبقيت اقول العبارة فى سري ..لان انا متعوده قبل ما ابدأ اي حاجه اقول بسم الله الرحمن الرحيم ..
انتو رايكو ايه ..صح الانا عملتو ولا ايه ..وصح ان انا مكتبتهاش ولا ايه ..
بجد محتاجه ارائكو ..لانى مش عارفه انا كده اتصرفت صح ولا ايه ...