فزاعة الاخوان و انشقاق المعارضة يهددان اللحظة التاريخية!

[محمد.فوكس]

سلام عليكم..
فزاعة الاخوان اللي بيستخدمها الحزب الواطي كمحاولة لل(فلفصة) من الموقف المحرج اللي ه فيه.
كل شوية يطلع واحد من حزب الحكومة و يقول احنا فرحانين بشباب مصر (و كأنهم مسمعوش الهتافات) و يقولو بس مش عايزين جماعات محظورة (و كأن في 100 جماعة محظورة) تركب المظاهرة و تستغلها لاهداف خاصة.
و كأن الاخوان مش مصريين و كأن مطالب الديمقراطية و الانتخابات النزيهة و الغاء الطوارىء هي مطالب خاصة و فئوية.
و كأن اي حد غير متفق مع الاخوان لما يسمع كلام حزب الحكومة هيخاف من الاخوان و يبطل مظاهرات على اساس الاخوان ميستغلوهاش.
لكن العيب لو طلع من اهل العيب ميبقاش عيب.
الخطر الاكبر ان في بعض المعارضين(و الله اعلم اذا كانو معارضين بجد) بيتكلمو بنفس اللهجة و مش بس على الاخوان لكن كمان على الوفد و غيره و كأن الانتماء لتيار سياسي جريمة (اللي المفروض انه مظهر حضاري).
حتى مجدي الجلاد رئيس تحرير المصري كتب مقالة بيحقد فيها على البرادعي بيقوله ان الناس اللي عاملة المظاهرات و ضحت هي الاولى منك بالقيادة.
يعني هل المطلوب ان هذا الرجل الستيني يقف في اول صف من المظاهرات و يتبادل اللكمات مع الامن المركزي.
و لا ذنبه انه شخصية دولية و النظام المصري مقدرش يسجنه و يلفقله تهم زي ايمن نور و غيره.
و عن عدم تواجده يوم 25 , يعني الراجل موراهوش شغل مهو بيسافر في شغل ثم ان الجمعية اللي هو رئيسها كانو من دعاة يوم الغضب.
المطلوب ببساطة يا اساتذة يا معارضين اللي بتقولو انكم عايزين الحرية عشان بتحبوا الوطن.
ان المعارضة تتحد و تنسى الخلافات الفكرية اللي لازم هتكون موجودة لحد ما نعمل ديمقراطية و ساعتها المنافسة هتكون شريفة بصانديق الانتخاب.
لكن المرحلة دي لازم كله يتحد اخوان و وفد و يسار حتى لو في احزاب نازية او شيوعية.
و اي حد هيحاول يهاجم زميل له في المعارضة ميزعلش لو اتهم بانه تبع حزب الحكومة.
تحيا مصر...