احموا مصر يا ابناء مصر

[naghm_rna]

مصر بتضييع واحنا اللى هندفع التمن غالى اوى
هندفعه من امننا..من سلامتنا..من استقرارنا
مظاهره بكره دى هتكون مذبحه دمويه مش مظاهره
انا مش ضد التظاهر ولا خاينه لبلدى زى ماناس ممكن تفتكر
بالعكس
انا كنت فخوورة جدا بالمظارهات من يوم 25يناير
وفرحت وافتخرت بشباب بلدى الشرفاء اللى نظموا المظاهرات دى
وافتخرت بيهم اكتر لما وقفوا ايد واحده يدافعوا عن بيوتهم وعن الممتلكات العامة
وقفوا وقفه رجل واحد يحمو مصر
مصر وطننا اللى كلنا عاوزينه احسن
مصر بلدنا اللى لازم نحافظ عليها
بالله عليكم عاوزين هدنه ..هدنه بس مش بقول ننسحب
مش بقول نبقى سلبيين تانى
مش بقول نسيب حقنا وكرامتنا
بقول بس هدنه نشوف الحكومه الجديده هتعمل ايه
دلوقتى يا جماعه اتعمل للمصريين حساب
محدش هيقدر يضحك عليهم تانى
محدش هيقدر ياخد حقوقهم
محدش هيقدر يظلمهم
لانهم شافو اراده الشعب وقوته
بس خلاص الرساله وصلت
اهدوا شويه وشوفو الايام الجايه هيبقى فيه تغيير ولا لا
لو بقى فيه تغيير يبقى الحمد لله اخدنا اللى احنا عاوزينه بخساير يعنى ان شاء الله نقدر نعوضها
لو محصلش التغيير الميادين موجوده
وكلنا موجودين واللى منزلش المره اللى فاتت اكيد هينزل المره دى لانه اعطى فرصه اخيره للحكومه الجديده
باختصااار
ياريت نهدى بكره..
انا مرعوبه حاسه ان لو حصلت مظارات بكره ممكن مصر تتدمر
خايفه من تدخل الدول فينا
خايفه امريكا تدخل اسطولها السابع زى ما بتقول عشان تحمى الناس
خايفه اسرائيل تتدخل عشان تحمى الاقتصاد


لا للتظاهر حقنا للدماء
لا للتظاهر اخمادا للفتنه
لا للتظاهر كيدا فى اعدائنا المتربصين
لا للتظاهر رأفة بمصر من الانهيار

يارب احمى مصر
يارب احمى شباب مصر