اشعار : للشاعر العظيم " احمد مطر "

[احمد رضا]

السلام عليكم و رحمه الله و بركاته

ازيكم يا جماعه ؟ عاملين ايه ؟ يارب تكونوا بخير

انا النهارده جايبلكم الراجل اللي من رأيي يستحق انه يمثل الوطن العربي في الشعر

الراجل ده مخافش من حد


قال رأيه بكل صراحه


وبكل أدب و اخلاق


و اركز علي اخلاق اوي دي


عشان نفرق بين الوقاحه و الصراحه و الجراءة و اقصد طبعا " فؤاد نجم " و " نجيب سرور"

الراجل ده هوا " احمد مطر "

احمد مطر اتولد في الخمسينات في قريه اسمها" التنومه " في البصرة انتقل مع اهله لما كبر شوية الي محله الأصمعي

بدأ احمد مطر يكتب الشعر و هوا عنده 14 سنه و تخيلوا يا جماعه انه في الأول كل شعره و- لما اقول كله يبقي اقصد كله – كان في الغزل و الرومانسيه ولكن بدأ يلاحظ الظلم و القمع و الصراع اللي في بلده و في الوطن العربي كله


ورمي نفسه في المعترك السياسي و بدأ يشارك في مسابقات و يلقي الشعر علي المنصه بدون خوف و كانت القصائد بتاعته في الأول تعدي 100 بيت في القصيده الواحده و كلها فيها تحريض علي عدم السكوت عن الحق و المطالبه بيه


وطبعا مكانتش بتعدي بالساهل يا جماعه بدات السلطه تحاربه


اضطر انه يسيب وطنه عشان يهرب من اضطهاد السلطه له و راح الكويت

وهناك في الكويت اشتغل في جريده اسمها " القبس " كمحرر للقسم الثقافي و مكنش بيسيب موضوع واحد غير لما يكتب فيه و بدأت الجريده تعجب بشعره و بكل جرأة بدأت تنشر شعره


و في الجريده دي قابل الفنان الجامد اوي " ناجي العلي " و الاتنين كانوا بيحترموا بعض جدا و بيحبوا بعض جدا فكان احمد مطر يكتب في الصفحه الأولي احدي لافتاته الجريئه جدا


و ناجي العلي يرسم في اخر صفحه معبر عن اللي في اللافته اللي كاتبها احمد مطر

وارتفعت شدتهم هما الاتنين و بالسلامه يا معلمين


اتنفوا الاتنين من منفي إلي منفي


هما الاتنين مع بعض دلوقتي في باريس منفيين بقالهم تقريبا 21 سنه تخيلوا يا جماعه 21 سنه نفي


بس و الله حظهم حلو لو ينفع يبعتوا لأهاليهم و يجوا هناك تبقي ميه ميه و تظبيط


بس للأسف يا جماعه احمد مطر تعبان جدا دلوقتي ياريت تدعوله بالشفاء عشان هوا راجل محترم بجد

والموضوع ده ان شاء الله هيبقي متجدد لشعر احمد مطر


لان مش هيكفي اني احط قصيده او اتنين او تلاته.. الراجل ده عبر عن الوطن العربي بأفضل التعبيرات اللي ممكن نشوفها

وجبتلكم النهارده بعض من قصائده ياريت تقلولي رأيكم ايه في الشاعر العظيم ده