اشمعنى أنا !!! ربنا ما هدانيش !!!

[تغريد الطيور]

نكمل مع أسرار سورة الفاتحة

نأتي لاعتراف الحب من العبد إلى الملك

(( إياك نعبد و إياك نستعين ))



حتة عربي

تقديم المفعول به على الفعل

دا معناه ان الفعل مرتبط فقط بالمفعول به

يعني احنا بنعبد ربنا بس

و بنستعين بربنا بس

قال تعالى :

وَاسْأَلْ مَنْ أَرْسَلْنَا مِن قَبْلِكَ مِن رُّسُلِنَا أَجَعَلْنَا مِن دُونِ الرَّحْمَـٰنِ آلِهَةً يُعْبَدُونَ
﴿الزخرف: ٤٥﴾

طيب يعني ايه عبادة ؟؟

عرفها شيخ الاسلام ابن تيمية :

هي اسم جامع لكل ما يحب الله و يرضا من القول و العمل ظاهرا و باطنا

و اذا وقفنا على المعنى دا

هنلاقيه ان دا من يسر الاسلام

ان حتى بسمتك عبادة

و صدقة

الكلمة الطيبة عبادة و صدقة

بل الحب في الله عبادة

كلمة عبادة جاية من الفعل عبد

يعني نحن عبيد لله

و اذا أمر الملك أطاع العبد

و يبتغي بالعمل اللي قام بيه الملك فقط

لذلك أهم حاجة نطلع منها من إياك نعبد :

1- أنك لا تعبد إلا الله

2- العبادة مش بس صلاة و صوم و زكاة بل حياتك كلها عبادة حتى حركاتك اذا احتسبت فيها النية الصح هتكون عبادة ان شاء الله و الدليل البسمة

( تبسمك لأخيك المسلم مش لأختك المسلمة )

3- العبادة ما ينفعش تكون ظاهرية بس و لا باطنة بس

يعني لازم الاتنين سوى

ما ينفعش تعمل عمل لا تبتغي به وجه الملك لأن للأسف هيكون حسرة عليك يوم القيامة

قال تعالى :

إِذْ تَبَرَّأَ الَّذِينَ اتُّبِعُوا مِنَ الَّذِينَ اتَّبَعُوا وَرَأَوُا الْعَذَابَ وَتَقَطَّعَتْ بِهِمُ الْأَسْبَابُ ﴿١٦٦﴾ وَقَالَ الَّذِينَ اتَّبَعُوا لَوْ أَنَّ لَنَا كَرَّةً فَنَتَبَرَّأَ مِنْهُمْ كَمَا تَبَرَّءُوا مِنَّا ۗ كَذَٰلِكَ يُرِيهِمُ اللَّـهُ أَعْمَالَهُمْ حَسَرَاتٍ عَلَيْهِمْ ۖ وَمَا هُم بِخَارِجِينَ مِنَ النَّارِ ﴿١٦٧﴾

الناس اللي اتخذت ناس و أحبتهم كحب الله و بقوا يسمعوا كلامهم و يرجو رضاهم على رضا الله

الناس دي تبرأت من بعضها يوم القيامة

و يريهم الله أعمالهم حسرة و مستقرهم النار

إوعى تقدم ( حبيبتك ) على ربنا هتكونوا أول اتنين بتتبرؤوا من بعض يوم القيامة

فظبط نيتك و توكل على الله في العمل و اترك ما يقف في طريقك إلى الله

و ما ينفعش تكون عبادة باطنية من غير ما يظهر العمل

يعني ما ينفعش واحد خايف من النار و مش بيشتغل لله انه ينجيه منها

و لا عايز يدخل الجنة و مش بيسعى وراها

مثال : انا مسلمة و بحب ربنا و مش مقتنعة بالحجاب أو لما أتجوز

أنت أمة أي عبد لله

و إذا أمر الله يبقى لازم تطيعي

و تأكدي تماما إن الأمر دا لمصلحتك أنتِ و كوني على يقين أن

من ترك شيئا لله عوضه الله خيرا منه

النقطة التانية المهمة عشان عبادتنا تكون مقبولة انه يكون موافق لفعل النبي صلى الله عليه وسلم و زي ما اتفقنا اننا عبيد

يعني ربنا أمرنا نعبده بطريقة معينة يبقى نعبده كما أمر و كما أراد

مش بكيفنا يعني

إياك نستعين

يعني احنا لا نطلب العون و التأييد إلا من الله سبحانه و تعالى

و المعنى دا النبي صلى الله عليه وسلم أكدهولنا في الحديث

قال صلى الله عليه وسلم :

إذا سألت فاسأل الله ، وإذا استعنت فاستعن بالله ، واعلم أن الأمة لو اجتمعت على أن ينفعوك بشيء ، لم ينفعوك إلا بشيء قد كتبه الله لك ، وإن اجتمعوا على أن يضروك بشيء لم يضروك إلا بشيء قد كتبه الله عليك
( رفعت الأقلام وجفت الصحف )

أجمل حاجة في معنى الاستعانة انها بتزرع في قلوبنا التوكل

و انك تبقى عارف ان الأمر كله بيد الملك أراد بك خير فهو رازقه

و ان تعسر عليك أمر أو فلان مستقصدك أو حد واقف في طريقك

تيقن ان دا بأمر الملك و ان من يعينك على حياتك هو الملك

فلن تسأل إلا الله و لن تستعين إلا بالله

طيب دا معناه اني ماطلبش من صاحبي حاجة ؟؟

الأصل انك تستعين بالله على قضاء حوائجك

و ممكن تستعين ببشر لكن إياك أن يتعلق قلبك انه هو من سيعينك

هو أيضا عبد لا يملك نفعا و لا ضرا إنما جعله الله سبب في قضاء حاجتك

فقلبك يفضل متعلق بالله انه من يملك الأمر كله و تسأله و تدعي كتير و لن يردك ربك أبدا



إياك نستعين مرتبطة جدا بإياك نعبد

لأن انت مش هتقدر تعبد ربنا إلا بإنك تستعين بيه

عارف يعني ايه لا حول و لا قوة إلا بالله

يعني لا مانع و لا معطي القوة إلا الله

العبادة و الطاعة رزق

و اللي يقدر على رزقك الطاعة و العبادة هو الله وحده و هو اللي هيدبرلك أمرك

قال تعالى في الحديث القدسي :

يا عبادي كلكم ضال إلا من هديته . فاستهدوني أهدكم

تخيل نفسك تسأل الله الهداية 17 مرة في اليوم

و امتى و أنت واقف في مقابلة الملك !

لازم تبقى متيقن بالإجابة و لازم تبقى مستشعر عظمة ما تطلب و عِظم من تسأل

و بعدين توكل عليه في أمرك كله و أنه هيرزقك الطريق الصح و تعيش أحلى حياة

قال تعالى :

وَتَوَكَّلْ عَلَى الْحَيِّ الَّذِي لَا يَمُوتُ وَسَبِّحْ بِحَمْدِهِ وَكَفَىٰ بِهِ بِذُنُوبِ عِبَادِهِ خَبِيرًا ﴿الفرقان: ٥٨﴾

فكما قال أهل العلم

الفاتحة سر من أسرار القرآن

إياك نعبد و إياك نستعين سر من أسرار الفاتحة

نشوفكم المرة الجاية ان شاء الله